މާލޭގެ ގަޑިބުރު ފަދައިން ކުރީގެ ހަނދާންތައް އާވާގޮތަށް ބަަދަލުކުރެވެން ހުރި އެހެން ދިމާދިމާތައް ބަދަލުކޮށް ނުވަތަ ރީވައިޓަލައިޒްކުރުމާއި އެ ވާހަކަތަކަށް އާރޯކަން ގެނެސް، ހިތްފަސޭހަކަން ގެނައުމަކީ މި ސަރުކާރުގެވެސް ވިސްނުން ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ ހޮނިހިރު ދުވަހުގެ ރޭ މާލޭގައި 1990 ވަނަ އަހަރު ހުރި ގަޑިބުރު، ޒަމާނީ ފެންވަރަށް ތަރައްގީ ކުރުމަށްފަހު އަލުން ހުޅުއްވަވާ ދެއްވާ ވާހަކަދައްކަވަމުންނެވެ.
ޒަމާނީ ގަޑިބުރު ފަދަ މާލޭގައިވެސް މިގޮތަށް ހުރި ތަންތަނަށް އާރޯކަން ގެނެސް، ފެހިކަން ގެނެސް، ހިތްގައިމުކަން ގެނައުމަކީ، ކައުންސިލާ ގުޅިގެން ކުރިއަށް ގެންދާނެ ކަންކަން ކަމަށާއި ރަށްރަށުގައިވެސް އެކަން ކުރިއަށް ގެންދާނީ، ލާމަރުކަޒީ ނިޒާމުގެ ތެރެއިން ކައުންސިލްތައް މެދުވެރިކޮށްގެން ކަމަށް ރައީސް ވަނީ ވިދާޅުވެފައެވެ.
ގަޑިބުރު ހުޅުވުމުގެ ހަފްލާ އަކީ ވަރަށްބޮޑު އުފަލެއް ލިބިގެންދާ ހަފްލާ އެއް ކަަމަށާއި އެއީ ކައުންސިލްގެ ސްޓްރެޓީޖިކް އެކްޝަން ޕްލޭން ފާސްކުރިއިރުގައި ކުރަން ނިންމި ކަމެއް ކަމަށް ރައީސް ޑރ.މުއިއްޒު ވިދާޅުވިއެވެ. އެހެންކަމުން އެ ޕްލޭނުގައި ވާގޮތަށް އެ މަސައްކަތް ފުރިހަމަވެގެން ގޮސް ގަޑިބުރު ހުޅުވިގެން ދިއުމުން އުފާކުރައްވާ ކަމަށް ވެސް އެމަނިކުފާނު ވަނީ ވިދާޅުވެފައެވެ. ރައީސް ވަނީ އެ މަސައްކަތުގައި އުޅުއްވި ހުރިހާ ފަރާތްތަކަށް ޝުކުރު އަދާކުރައްވާފައެވެ.
ޒަމާނީ ގަޑިބުރަކީ، ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) ގެ ސީއެސްއާރް ޕްރޮޖެކްޓެއްގެ ދަށުން ޕައިނިއާ މޯލްޑިވްސް އިން ތަރައްގީ ކުރި ބިނާ އެކެވެ. ރައީސް މުއިއްޒު ވިދާޅުވީ ކުރީގައި ގަޑި ބުރު ހުރި ތަނުގައި ހުރި ގަޑި ހުރި ކޮންސެޕްޓްގައި، އެ ޑިޒައިނާ އެއްގޮތްވާ ގޮތަށް އަދި އެހެން ނަމަވެސް، ޒަމާނީ ގޮތެއްވެސް އެއަށް ގެނެސް، ޑިޖިޓަލައިޒް ކުރުމުގެ ވިސްނުން އެއަށް ގެނެސްގެން ގަޑިބުރު ހައްދަވައިދެއްވަން އެދިވަޑައިގަންނަވާފައިވާނެ ކަމަށެވެ އަދި ސީ.އެސް.އާރު. މަޝްރޫޢެއްގެ ގޮތުގައި، ކޮމްޕެނީއާއި ސިޓީ ކައުންސިލާ ދޭތެރޭގައި ވެވުނު އެއްބަސްވުމެއްގެ ދަށުން މި މަސައްކަތް ކުރިއަށް ގެންދެވުނުކަން އެމަނިކުފާނު ވަނީ ފާހަގަކުރައްވާފައެވެ.
ރައީސް ވިދާޅުވީ ޒަމާނީ ގާޑިބުރު ތަރައްޤީކުރުމުގެ ބޭނުމަކީ ޒުވާނުންނަށްވެސް އަދި ޅަފުރައިގެ ކުޑަކުދިންނަށްވެސް، ޖުމްލަކޮށް ހުރިހާ ފަރާތްތަކަށްވެސް މަޤްބޫލު ވިސްނުންތަކެއްވެސް އެއަށް ގެންދިއުން ކަމަށެވެ.
ދެން މުހިންމު މެސެޖުތައްވެސް މި ޑިޖިޓަލް ސްކްރީނަށް، ކައުންސިލުން ބޭނުންވާ މެސެޖުތައް އެރުވޭގޮތަށް. އަދި މި ސީ.އެސް.އާރު ޕްރޮޖެކްޓް ހިންގެވި ފަރާތުން ހަމަ އެކަމާ ގުޅިގެން ހަމަ އެކި ފަރާތްތަކަށް އެކިކަހަލަ އިޝްތިހާރުތައް، ވިޔަފާރިތަކަށްވެސް އެއިން ފައިދާއާއި ނަފާވާގޮތަށް. ވީހާވެސް ގިނަ ފަރާތްތަކަށް އޭގެ ފައިދާވާގޮތަށް ފަރުމާކޮށްގެން، އެހެން ނަމަވެސް، ހަމަ އެއާއެކީގައި އަޅުގަނޑުމެންގެ މާޒީ އިޢާދަކޮށްދިނުން.ރައީސް މުއިއްޒު
ރައީސް ވިދާޅުވީ ތާރީޚާއި ޘަޤާފަތު އިޢާދަކުރަން ބަލާއިރުގައި، ކުރީގައި ކުރެވިފައި ހުރި މިފަދަ ކަންތައްތައް އަނބުރާ ގެނައުމަކީ، ދުނިޔޭގެ ތަހުޒީބު އެހެން ޤައުމުތަކުގައިވެސް އެކަން ކުރަމުންދާ ގޮތްކަމަށެެވެ. އެހެންކަމުން ގަޑިބުރުގެ ަމސައްކަތް ކުރީ އެ ވިސްނުމުގައި ކަމަށް ރައީސް ވިދާޅުވިއެވެ. އެކަމުގެ ސަބަބުން އާރޯކަމާއި ދިރުން އަންނަ ކަމަށާއި ރާއްޖޭގެ އެހެން ކަންކޮޅުތަކުގައިވެސް މިކަން ކުރުމަކީ ސަރުކާރުގެވެސް ވިސްނުން ކަމަށް ރައީސް ވަނީ ވިދާޅުވެފައެވެ.
އެގޮތުން ރަށްރަށުގައި ޕާކްހަދައިދިނުމަށް ހިތްގައިމު ތަންތަން ޤާއިމްކޮށްދެއްވާނެ ކަަމަށް ރައީސް ވަނީ ވިދާޅުވެފައެވެ.
