ނަޝީދުގެ އިތުބާރު ނެތްކަމުގެ މައްސަލަ - ނިޒާމު ނެތް ކަމަށް ވިދާޅުވެ ޖަލްސާ މެދުކަނޑާލައިފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ ގަރާރު އެޖެންޑާ ކޮށްފައި އޮތް ޖަލްސާ ފެށިތާ ކުޑަ އިރުކޮޅެއްގެ ތެރޭގައި، އެ ޖަލްސާގެ ނިޒާމު ނެތްކަމަށް ވިދާޅުވެ ރިޔާސަތުން ޖަލްސާ މެދުކަނޑާލައްވައިފިއެވެ.

މި ޖަލްސާގެ ރިޔާސަތު ބެލެހެއްޓެވީ މަޖިލީހުގެ ނާއިބުރައީސް އީވާ އަބްދުﷲއެވެ.

ޖަލްސާގެ ނިޒާމް ގެއްލިފައިވާކަމަށް އީވާ ވިދާޅުވި ނަމަވެސް ނިޒާމް ގެއްލިފައިވާ ކަމަށް ޤަބޫލުކުރައްވާ ސަބަބު ހާމައެއް ނުކުރައްވައެވެ. އަދި ދެން ޖަލްސާ ފެށޭނެ ވަގުތެއް އަންގަވާނީ އީވާ ކަމަށް ވެސް އޭނާ ވަނީ ޖަލްސާ މެދުކަނޑާލުމުގެ ކުރިން ވިދާޅުވެފައެވެ. އީވާ ޖަލްސާ މެދުކަނޑާލެއްވީ މެންބަރުން އިހުތިޖާޖުކުރަމުން ދަނިކޮށެވެ. އީވާ ޖަލްސާ މެދުކަނޑާލެއްވުމުން ވެސް ތަޅުމުގައި މެންބަރުން ގެންދަވަނީ އިހުތިޖާޖުކުރައްވަމުންނެވެ.

ހޯމަ ދުވަހު ހެނދުނު 09:00 އަށް ތާވަލްކޮށްފައި ވަނީ 2023 ވަނަ އަހަރަށް ލަފާކުރާ ސަޕްލިމެންޓްރީ ބަޖެޓާއި، 2024 ވަނަ އަހަރުގެ ބަޖެޓުގެ މަސައްކަތެވެ. އަދި މެންދުރު 11:00 އަށް އެޖެންޑާކޮށްފައިވާ ޖަލްސާ އަށް މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ވަނީ އެޖެންޑާކޮށްފައެވެ. ފުރަތަމަ ބޭއްވި ޖަލްސާ އަށް ކޯރަމް ހަމަނުވުމުންވެސް އީވާ ވަނީ އެ ޖަލްސާ ނިންމަވާ ނުލައްވާ 11:00 އާއި ހިސާބަށް ދިގުދަންމާލައްވާފައެވެ.