މަޖިލީހުގެ ދެވަނަ ޖަލްސާގެ ވަގުތު ޖެހުނުއިރު ވެސް އީވާ ބައްލަވަނީ ކޯރަމް ހަމަވޭތޯ
ހޯމަ ދުވަހުގެ ފުރަތަމަ ޖަލްސާ 9:00 އަށް ތާވަލްކޮށްފައިވާއިރު ދެވަނަ ޖަލްސާ ތާވަލްކޮށްފައި ވަނީ 11:00 އަށް
އީވާ އަބްދުﷲ - ރައްޔިތުންގެ މަޖިލީހުގެ ނާއިބު ރައީސް
ބަޖެޓާއި ސަޕްލިމަންޓްރީ ބަޖެޓްގެ މަސައްކަތް ތާވަލްކޮށްފައި އޮތް ޖަލްސާގެ ކޯރަމް ހަމަނުވާތީ ޖަލްސާ ކުރިއަށް ނުގެންދެވުނު ނަމަވެސް ޖަލްސާ ނިންމަވާ ނުލައްވާ, އެ ޖަލްސާގެ ކޯރަމް ހަމަވޭތޯ މަސައްކަތް ކުރައްވާނެ ކަަމަށް މަޖިލީހުގެ ނާއިބުރައީސް އީވާ އަބްދުﷲ ވިދާޅުވެއްޖެއެވެ.
ހޯމަ ދުވަހުގެ ހެނދުނުގެ ޖަލްސާގެ ރިޔާސަތު ބެލެހެއްޓެވީ މަޖިލީހުގެ ނާއިބުރައީސް އީވާ އަބްދުﷲއެވެ. ޖަލްސާ ފެށުމުގެ ވަގުތު ޖެހުނުއިރު ޖަލްސާގެ ކޯރަމް ހަމައެއްނުވެއެވެ. ބަޖެޓުގެ މަސައްކަތް ކުރިއަށް ގެންދިއުމަކީ މުހިންމުކަމެއް ކަމަށް ފާހަގަކުރައްވާ އީވާ ވަނީ ކޯރަމް ހަމަވޭތޯ މަސައްކަތް ކުރައްވާނެ ކަމަށް ވިދާޅުވެފައެވެ. ތަފާތު ތިން ފަހަރެއްގެ މަތިން ޖަލްސާގެ ކޯރަމް ހަމަވޭތޯ އީވާ ވަނީ މަސައްކަތްކުރައްވާފައެވެ.
10:45 އާއި ހަމައަށް ވެސް ކޯރަމް ހަމަނުވުމުން ޖަލްސާ ނިންމަވާލެއްވުމުގެ ބަދަލުގައި އީވާ ވަނީ އަނެއްކާ ވެސް ކޯރަމް ހަމަވޭތޯ ބައްލަވަން ގަސްތުކުރައްވާ ކަމަށް ވިދާޅުވެފައެވެ. ނަމަވެސް ދެން ޖަލްސާ ބާއްވާނެ ވަގުތެއް ހާމައެއް ނުކުރައްވައެވެ. އީވާ މިގޮތަށް އަމަލުކުރައްވަނީ މަޖިލީހުގައި ބާއްވަން ހަމަޖެހިފައިވާ ދެ ވަނަ ޖަލްސާ އަށް ހުރަސް އަޅުއްވަން ކަަމަށާއި ކޯރަމް ހަމަވޭތޯ ބެއްލެވުމުގައި އަމަލުކުރައްވަނީ ވެސް އާއްމުކޮށް ޢަަމަލުކުރާ އުސޫލާއި ޚިލާފަށް ކަަމަށް މެންބަރުން ގެންދަވަނީ ވިދާޅުވަމުންނެވެ.
ހޯމަ ދުވަހުގެ ފުރަތަމަ ޖަލްސާ 9:00 އަށް ތާވަލްކޮށްފައިވާއިރު ދެވަނަ ޖަލްސާ ތާވަލްކޮށްފައި ވަނީ 11:00 އަށެވެ. އަދި ދެވަނަ ޖަލްސާއަށް ހުށަހަޅާފައިވަނީ މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތް މައްސަލައެވެ.
ދެ ބަޖެޓެއް ހުށަހަޅަން ހޯމަ ދުވަހަށް ވަނީ ތާވަލްކޮށްފައެވެ. އެއީ 2023 ވަނަ އަހަރުގެ ސަޕްލިމެންޓްރީ ބަޖެޓާއި 2024 ވަނަ އަހަރުގެ ބަޖެޓެވެ. އެހެންނަމަވެސް އާލާސްކަންފުޅާ އުޅުއްވާތީ ވަޑައިގެންނެވެން ނެތްކަން ފިނޭންސް މިނިސްޓަރު ވަނީ މަޖިލީހަށް އަންގަވާފައެވެ. މަޖިލީހަށް ބަޖެޓު ހުށަހަޅާ ޖަލްސާގައި ޤައުމުގެ އިގްތިސާދީ ހާލަތާއި ބަޖެޓުގެ ހުލާސާ ބަޔާނެއް ފިނޭންސް މިނިސްޓްރީން ދެއެވެ.
2024 ވަނަ އަހަރަށް 49.5 ބިލިއަން ރުފިޔާގެ ބަޖެޓެއް ފިނޭންސް މިނިސްޓްރީން ރައްޔިތުންގެ މަޖިލީހަށް ވަނީ ފޮނުވާފައެވެ. މީގެ އިތުރުން ސަރުކާރުން މިއަހަރުގެ ބާކީ އޮތް ދުވަސްތަކަށް ޚަރަދުކުރުމަށް ބޭނުންވާ 6.5 ބިލިއަން ރުފިޔާގެ ސަޕްލިމަންޓްރީ ބަޖެޓް ހަމަޖެއްސުމަށް މަޖިލީހަށް ފޮނުވާފައިވެއެވެ.
ދައުލަތުގެ މާލިއްޔަތު ގާނޫނުގައި ބުނެފައިވަނީ ރައްޔިތުންގެ މަޖިލީހަށް ހުށަހެޅުމަށްޓަކައި ކޮންމެ މާލީ އަހަރަކަށް އެކުލަވާލެވޭ އެ އަހަރުގެ ދައުލަތުގެ ބަޖެޓު، މިނިސްޓަރު ތައްޔާރުކުރައްވާ ބަޖެޓު އެކުލަވާލެވޭ މާލީ އަހަރު ފެށުމުގެ އެންމެ ލަސްވެގެން 1 މަސްދުވަސްކުރިން ރައްޔިތުންގެ މަޖިލީހަށް ހުށަހަޅަންވާނެ ކަމަށެވެ. މީގެ ކުރިން ބަޖެޓާއި ސަޕްލިމެންޓްރީ ބަޖެޓްގެ މަސައްކަތް މަޖިލީހުގައި އެޖެންޑާ ކުރީ އޮކްޓޯބަރު މަހުގެ 31 ވަނަ ދުވަހަށެވެ. ނަމަވެސް އޭރު މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ހުށަހަޅާފައި ވާތީ، އެ ޖަލްސާ އަށް ފިނޭންސް މިނިސްޓަރު އަމީރު ވަޑައެއްނުގަންނަވައެވެ. އެ ޖަލްސާ އަށް ވަޑައިނުގަންނަވަން އަމީރު ނިންމެވީ އެޓަރނީ ޖެނެރަލް (އޭޖީ) ގެ ލަފާފުޅާއެކުގައެވެ.
