ޔުނައިޓެޑް ސްޓޭޓްސް ނޭވަލް އެކެޑެމީ، "ކުލާސް އޮފް 2028" ކޯހުގައި ބައިވެރިވުމުގެ ފުރުޞަތު އާންމުކޮށް ހުޅުވާލައިފި
މިކޯހަކީ ބެޗްލަރސް ޑިގްރީ ފެންވަރުގެ ކޯހެއް
އެމްއެންޑީއެފް
ޔުނައިޓެޑް ސްޓޭޓްސް ނޭވަލް އެކެޑެމީގައި ހިންގާ "ޔުނައިޓެޑް ސްޓޭޓްސް ނޭވަލް އެކެޑަމީ، ކުލާސް އޮފް 2028"، ކޯހުގައި ބައިވެރިވުމުގެ ފުރުޞަތު އާންމުކޮށް ހުޅުވާލައިފިއެވެ.
2024 ވަނަ އަހަރުގެ ޖޫން މަހުން ފެށިގެން ހަތަރު އަހަރުގެ މުއްދަތަށް ހިންގުމަށް ހަމަޖެހިފައިވާ މި ކޯހުގައި ބައިވެރިވުމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި، އޭލެވެލް ފުރިހަމަކޮށްފައިވުން ނުވަތަ އޭލެވެލްއާ އެއް ފެންވަރުގެ ނުވަތަ އެއައްވުރެ މަތީ ފަންތީގެ ސަނަދެއް ލިބިފައިވާ ފަރާތެއްކަމުގައިވުމާއި، ހަށިހެޔޮކަމުގެ އިމްތިހާނުން ފާސްވެފައިވާ އަދި ނަފުސާނީގޮތުންނާއި ޖިސްމާނީގޮތުން ދުޅަހެޔޮ ފަރާތެއްކަމުގައިވުމާއި، 2024 ޖުލައި 1 އަށް 23 އަހަރު ނުފުރޭ ފަރާތަކަށްވުމާއި، އަދި ޒަވާޖީ ހަޔާތެއް ފަށާފައިނުވާ ފަރާތަކަށްވުން ހިމެނެއެވެ.
މިކޯހަކީ ބެޗްލަރސް ޑިގްރީ ފެންވަރުގެ ކޯހެކެވެ. ކޯހުގައި ކުރިއަށް ދެވިދާނެ ދާއިރާތަކުގެ ތެރޭގައި، އެއޮރޮސްޕޭސް އިންޖިނިއަރިންގ، ކޮމްޕިއުޓަރ ސައިންސް، އިންފޮމޭޝަން ޓެކްނޮލޮޖީ، އިލެކްޓްރިކަލް އިންޖިނިއަރިންގ، އޯޝަންގްރޮފީ، ނޭވަލް އާކިޓެކްޗަރ، ފިޒިކްސް، ކެމިސްޓްރީ، ސައިބަރ އޮޕަރޭޝަން، އިކޮނޮމިކްސް، ސައިންސް، މެތަމެޓިކްސް، އޮޕަރޭޝަން ރިސަރޗް، ޕޮލިޓިކަލް ސައިންސް ދާއިރާ ހިމެނެއެވެ. މި ކޯސް ފުރިހަމަ ކުރުމުން، އެމްއެންޑީއެފްގެ އޮފިސަރެއްގެ މަޤާމު ލިބިގެންދާނެއެވެ.
މި ކޯހަށް ޝަރުތު ފުރިހަމަވާ ފަރާތްތަކުން، ކޯސް އެޕްލިކޭޝަން ފޯމް ފުރުމަށްފަހު، 2023 ނޮވެންބަރު 9 ވަނަ ދުވަހުގެ އޮފީސް ބަންދުވުމުގެ ކުރިން އެމްއެންޑީއެފް ބަންޑާރަކޮށްޓަށް އެޕްލިކޭޝަން ފޯމް ހުށަހެޅުއްވުން އެދެމެވެ. އަދި އީމެއިލްވެސް ކުރެވޭނެއެވެ.
