އަޑެއް ކިޔައިފިއްޔާ ރެނދެއްލާނެއެވެ.

ޕީޕިއެމް/ޕީއެންސީގެ ވެރިކަމަށް ގިނަ ބަޔަކު އިންތިޒާރުކުރީ މިހާރު މި ފެންނަ މަންޒަރުތައް ފެނިދާނެކަމަށް އުއްމީދުކޮށްގެންނެއް ނޫނެވެ. އެއިރުވެސް ބަޔަކު ސިފަކުރަމުންދިޔައީ މިއީ 5 އަހަރުގެ ވެރިކަމަކަށްވުރެ، ވެރިކަމުގެ ބާރާހެދި ބަޔަކު ތޮޅޭނެ 5 އަހަރުގެ ގޮތުގައެވެ. ތެދެކެވެ. މިހާރު މި ފެންނަނީ އެ މަންޒަރެވެ. ޕީޕީއެމް ދެބައިވެއްޖެއެވެ. ޕީޕީއެމްގެ ހިޔާވަހިކަމުން ކުރިފަޅައި، ޕީއެންސީ މިހާރު އަމިއްލަ ފައިމައްޗަށް ތެދުވެއްޖެއެވެ. ތެދުވިގޮތަށް ޕީޕީއެމް ފުނޑާލައިފިކަމަށް ގިނަ ބަޔަކު ދަނީ ބުނަމުންނެވެ.

ކަން އޮތީވެސް މިހެންނެވެ. ވެރިކަމަކީ ފާޑެއްގެ އެއްޗެކެވެ. ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުއަށް ވެރިކަމަށް އިންތިޚާބު ވެވަޑައިގެންނެވުނީ އިދިކޮޅު ލީޑަރު ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ފޮޓޯފުޅު ޖައްސަަވައިގެން ކަމަށާއި، އެ ކަން ހަނދުމަފުޅު ނައްތަވާލައްވައިގެން ނުވާނެކަމަށް ޕީޕީއެމްގެ އިސް ފަރާތްތަކުން މިއަދު އަންނަނީ ބުނަމުންނެވެ.

އެންމެ ބޮޑު ގުރުބާނީއެއް، އެންމެ ބޮޑު އަގެއް، އެންމެ ބުރަ ތަކުލީފު ހަތަރު އަަހަރު ޖަލުގައި ހޭދަކުރެއްވީ ރައީސް އަބްދުﷲ ޔާމީން އަބްދުލްގައްޔޫމެވެ. ރިޔާސީ ކެމްޕޭނަށް ނުކުންނެވީ ރައީސް ޔާމީންގެ ފޮޓޯފުޅު ޖައްސަވައިގެންނެވެ. ހެދޭނެ އެންމެ ބޮޑު ގޯހަކީ ޕީޕީއެމް/ޕީއެންސީއަށް ލިބުނު ކާމިޔާބީ ލިބުނު ގޮތް ހަނދާން ނައްތައިލުމެވެ.

ހަނދާންވެސް ނެތޭނެއެވެ. ވޭތުވެދިޔަ ދުވަސްތަކުގައި ފިިނިކޮޓަރީގައި ބަޔަކު ތިބީމައި ސިކުނޑި ގަނޑުވީކަމަށް ވެދާނެކަމަށް ޕީޕިއެމްގެ އިސް ފަރާތްތަކުން އަންނަނީ ބުނަމުންނެވެ. ޔާމީން ބަންދުގައި އަބަދު ޖަލުގައި އޮންނަވާނެކަމަށް ބަޔަކު ދުއްޓެވެ. ނަމަވެސް އެންމެ ފަހުން ގޭބަންދުން ރަށުބަންދަށް ބަދަލުވެވަޑައިގަތީއެވެ. އޭގެ ފަހުން މި ފެންނަ މަންޒަރުތަކާއި އިވޭ އަޑުތަކުން، ކުރިން އަޑެއް ކިޔައިފިކަމަށް ބުނި ބުނުމުގައި، މިއަދު ރެނދެއްލާފައި ހުއްޓައި ހަމަލޮލަަށް ފެނިއްޖެއެވެ.

ޕީޕީއެމުން ކެނޑިގެން ގިނަ ބަޔަކު ޕީއެންސީއަށް ދާ ދިއުން ޕީޕީއެމްގެ ލީޑަރަކަށް ހަމަގައިމުވެސް ތަހައްމަލެއް ނުކުރެއްވޭނެއެވެ. އެންމެ ފަހުން ކޯފާ އިސްކުރައްވައި، ޕީޕީއެމަކީ އެންމެ ވަރުގަދަ ސިޔާސީ ޕާޓީ ކަމަށާއި, އެހެންކަމުން ޕާޓީގެ އެއްވެސް މެމްބަރަކު އެހެން ޕާޓީއަކަށް ނުވަތަ ޕީއެންސީއަށް ފޯމުފުރަން ސޮއިކުރަން ނުޖެހޭނެކަމަށާއި, ސަބަބަކީ ޕީޕީއެމާއި ޕީއެންސީއަކީ އެއް ފިކުރެއްގެ ދެ ޕާޓީ ކަމަށް ވިދާޅުވެއްޖެއެވެ. އެހެންކަމުން ރައްޔިތުންގެ މަޖިލީހުގެ 2024ގެ އިންތިޚާބު ކާމިޔާބުކުރަން ވަރަށް މަސައްކަތްކުރަންޖެހޭ ކަމަށްވެސް ވިދާޅުވެއްޖެއެވެ.

ނަމަވެސް ޕީއެންސީން އޮތީ، ޔާމީން ބަންދުގައި ބާއްވައިގެން ޕީއެންސީގެ މެންބަރުން ނެރެ މަޖިލިސް އިންތިޚާބުވެސް ކާމިޔާބުކުރަން ތައްޔާރަށެވެ. ޔަގީންވާ އެއް ކަމަކީ، ޕީއެންސީން މަޖިލީހުގެ އިންތިޚާބުގައި ޔާމީންގެ ފޮޓޯފުޅު ބޭނުންނުކުރާނެ ކަމެވެ. ދެން ފެންނާނ ޕޯސްޓަރުތަކާއި ބިލްބޯޑުގައި މުއިއްޒުގެ ފޮޓޯއެވެ. ޔާމީނުގެ ސިޔާސީ ތަރި އޮއްސުވާލަން، މުއިއްޒުއާއި އަބްދުއްރަހީމާއި އަދި ޔާމީންގެ އަރިސް ބޭބޭފުޅުން މިހާރު ތިއްބެވީ ފައިންޕުޅު ވިއްދަވައިގެންނެވެ.

މިއަދު އެ މަންޒަރުވެސް ފެނެއެވެ. ޔާމީނަށް ލިބިވަޑައިގެންނެވި ކުޑަ މިނިވަންކަމާއެކު ބޭއްވެވި ފުރަތަމަ ބައްދަލުކުރެއްވުމުގައި ވެސް، މި ނަންގަތް އެއްވެސް ބޭފުޅަކު ނެތެވެ. އަޅައިވެސް ނުލެއްވިއެވެ. އެތަނަށް ވަޑައިގަންނަވާނެ އިސް ބޭފުޅަކުވެސް ނުވިއެވެ. ކޮންމެއަކަސް، ކުދި ރެނދު ލަމުންގޮސް ބޮޑު ރެނދެއްލާ ދުވަހު ޕީޕިއެމް/ޕީއެންސީން އަރައި އޮތް ބިންގާ ފުނޑުފުނޑުވެ، ވެއްޓޭނެއެވެ.

މިއަދު ފެންނަން އޮތް ހަގީގަތަކީ، މި ގައުމު ދުށް އެންމެ ވަރުގަދަ އެއް ސިޔާސީ ޝަޚުސިއްޔަތަކީ ޕީޕީއެމްގެ ލީޑަރު އަދި ކުރީގެ ރައީސް އަބްދުﷲ ޔާމީން ކަމެވެ. ރައީސް ޔާމީނާ އެއްހަމައެއްގައި ފައިންޕުޅު ސާބިތުކުރައްވަން އަދި 50 އަހަރު ނަގާނެއެވެ. ނަމަވެސް ވެރިކަމުގެ ދަހިވެތިކަމުގައި 50 އަހަރު 50 ސިކުންތަށް ހައްދަވަން ބަޔަކު މިއަދު ތިބީ ފޫގަޅުއްވައިގެންނެވެ. މިއަދު ޕީޕީއެމްގެ ވާހަކައެއްވެސް ނުދައްކަވައެވެ. އެ ބޭބޭފުޅުން ދައްކަވަނީ ޕީއެންސީގެ ވާހަކައެވެ. ޕީއެންސީ ވަރުގަދަކުރާ ވާހަކައެވެ. މުއިއްޒު 10 އަހަރަށް ވެރިކަންކުރައްވާނެ ވާހަކައެވެ.

އެއްކަލަ ދުވަހު މި ވާހަކަ ދެއްކީމައި ޕީޕީއެމް މެންބަރުން ގޮވީ ފިތުނަ އުފައްދަން އުޅެނީކަމަށެވެ. ނަމަވެސް މިއަދު މި ފެންނަނީ އެކަމުގެ ކުލަވަރެވެ. ދެން ފެންނާނީ މަންޒަރެވެ. ވެރިކަމާހެދި މީހަކު ކޮންމެފަދަ ކަމެއްވެސް ކޮށްފާނެއެވެ. މިއީ ދުނިޔަވީ ހަގީގަތެވެ.