ގައުމެއް ކުރިއަރައި ދިއުމުގެ ފަހަތުގައި އެތައް ސަބަބެއް އޮވެއެވެ. އެއީ އެ ގައުމަކަށް ލިބިފައި އޮތް މާލީ ތަނަވަސްކަމާއި، ގައުމު ހިންގަމުންދާ ވެރިންނާ ހިސާބުން ނިންމާލެވެން އޮތް ކަމެއް ނޫނެވެ. ބަވަނަވެފައި އޮތް އަދުގެ ދުނިޔޭގައި، ގައުމެއްގެ މަގާމާއި ހައިސިއްޔަތ ދެމެހެއްޓުމުގެ އެންމެ ބޮޑު ޒިންމާއެއް ހަގީގަތުގައި އުފުލާ ބަޔަކީ އެ ގައުމެއްގެ ޒުވާނުންނެވެ. ދާނެ ވަކި މިސްރާބެއް، މަންޒިލެއް ނޭނގި ވައިސޫރިއެއްހެން އެނބުރެމުން ދިއުމުގެ ބަދަލުގައި، މުސްތަގުބަލަށްޓަކައި ބިނާކުރަނިވި މަސައްކަތްތަކެއްކޮށް، ރައްކާތެރިކަމުގެ ކަމަރު ބަންނަމުންދާ ޒުވާނުންނެވެ.

އެންމެ ނުފޫޒުގަދަ ގައުމުގެގޮތުގައި މުޅި ދުނިޔެއަށް އަތްގަދަކުރަމުންދާ އެމެރިކާއަށް ސިހުމެއް ގެނެވޭނެ ގައުމަކަށް އޮތީ ޗައިނާއޭ ދެންނެވުމަކުން ގޯހެއް ނެތެވެ. ޗައިނާގެ ކޮންމެ ފިޔަވަޅަކަށް އެމެރިކާ ފާރަވެރިވެއެވެ. ނަމަވެސް، ތަރައްގީގެ ރޭހުގައި ޗައިނާއިން ހޯދަމުންދާ ކުރިއެރުންތަކާ ގާތަށްވެސް އެމެރިކާއަށް އާދެވިދާނެކަމާމެދު ސުވާލު އުފެދެއެވެ. ސަބަބެއް ނެތިއެއް ނޫނެވެ. ކުޅިވަރާއި މަޖަލާއި ސަކަރާތުގެ ތެރޭގައި އެމެރިކާގެ ޒުވާން އާބާދީ، ރޭގަނޑުގެ ވަގުތުތައް ހުސްކޮށްލާއިރު، ޗައިނާގެ ޒުވާން އާބާދީ މިސްރާބުޖަހާފައި އޮތީ ދިރިއުޅުން އުޖާލާ ކުރުމަށްޓަކައި އައު ހުނަރުތަކާއި މަސައްކަތްތައް ދަސްކުރުމަށެވެ. ދުވާލުގެ ވަގުތުތައް، ވަޒީފާގެ ބުރަ މައިދާނުގައި ހޭދަކުރުމަށްފަހު، ރޭގަނޑު ހުސްކުރަނީ ޕާރޓްޓައިމް ކުލާސްތަކުގައެވެ.

ޝަންހާއީ މާސް އާރޓް ސެންޓަރުގައި ހިންގާ ނައިޓް-ކުލާސްތަކަކީ، ފެންނަ ފެނުމަށް ވަރަށް މަގުބޫލު ކުލާސްތަކަކަށް އޮތީ ވެފައެވެ. މި އަހަރުގެ ޚަރީފު މޫސުމާ ދިމާކޮށް، އެ ސްކޫލުން ވަނީ 380 ކޯހެއް ހިންގަން ފަށާފައެވެ. 9000ށްވުރެ ގިނަ މީހުން ވަނީ އެ ކޯސްތަކުން ޖާގަ ކަށަވަރުކޮށްފައެވެ. ނައިޓް-ކުލާސްތަކަށް ދާ ދަރިވަރުންގެ އާބާދީއަށް ބަލާއިރު 90 ޕަސެންޓް ހިއްސާކުރަނީ 1980އާ 1990ގެ އަހަރުތަކުގައި އުފަންވި މީހުންނެވެ.

ރޭގަނޑުގެ ވަގުތުތަކުގައި ސްކޫލު ހިންގަން ފެށި މައިގަނޑު މަގުސަދަކީ، ތައުލީމީ ފެންވަރަށް ހެޔޮ ބަދަލެއް ގެނައުމެވެ. އެ ރޮނގު އިތުރަށް ފުޅާކުރަމުން ގޮސް، މިއަދު ޗައިނާގައި ހިންގާ ނައިޓް ކުލާސްތަކަކީ ޒުވާނުންނަށް އަމާޒުކޮށްގެން، ސަގާފަތާއި ފަންނުވެރިކަން ދަސްކޮށްދިނުމަށް ހިންގާ ކުލާސްތަކަކަށް ވަނީ ބަދަލުކޮށްފައެވެ.

މި ސެމިސްޓަރަކީ ސްކޫލުގައި ފުރަތަމަ ފަހަރަށް، ހޭންޑްޕޭން ކޯސް ހިންގަން ފެށި ސެމިސްޓަރެވެ. މި ކޯސް ހިމެނުނީ އެންމެ މަގުބޫލު ކޯސްތަކުގެ ތެރޭގައެވެ. ކޯހުގައި ބައިވެރިވާން ފުރުސަތު ހުޅުވާލިތާ އެންމެ 2 މިނެޓުގެ ތެރޭގައި ހުރިހާ ޖާގައެއް ފުރުނެވެ.

އާދަޔާ ޚިލާފު އިންސްޓްރޫމަންޓެއް ކުޅެން، އިންތިހާ ހެޔޮ އަގެއްގައި ދަސްކުރަން ލިބުމަކީ ބައެއް ޒުވާނުން އެ ކޯސް ޚިޔާރުކުރި އެއް ސަބަބެވެ. 12 ފިލާވަޅުގެ މައްޗަށް އެކުލެވޭ ކޯހުގެ ފީއަކީ އެންމެ 500 ޔުއާން ނުވަތަ 70 ވަރަކަށް އެމެރިކާ ޑޮލަރެވެ.

ކޯސްތަކުގެ އަގު ހެޔޮ ވުމަކީ ހަމަ އެކަނި ސަބަބެއް ނޫނެވެ. ނައިޓް-ކުލާހުގައި ހިންގާ ބައެއް ކޯސްތަކަކީ، ޗައިނާގެ އެހެން އެއްވެސް ހިސާބެއްގައި ހިންގާ ކޯސްތަކެއް ނޫނެވެ. ހަމަ އެހެންމެ، ކޯސް ހިންގާ މާހައުލަކީ، ރަހުމަތްތެރިންގެ ލިސްޓު ދިގުކޮށްލަން ބޭނުންވާ ޒުވާނުންނަށްވެސް އޮތް ރަނުގެ ފުރުސަތަކަށް ވުމީވެސް، ނައިޓް-ކުލާސްތައް މަގުބޫލުވުމުގެ ސަބަބުތަކުގެ ތެރޭގައި ހިމެނޭ ކަމެކެވެ.

ޝަންހާއީ މާސް އާރޓް ސެންޓަރުން ނައިޓް-ކުލާސްތައް ހިންގަންފެށީ 2016 ވަނަ އަހަރުގެ ތެރޭގައެވެ. މިދިޔަ 7 އަހަރުގެ ރެކޯޑަށް ބަލާއިރު، 450،000ށްވުރެ ގިނަ މީހުން ވަނީ ޝަންހާއީ މާސް އާރޓް ސެންޓަރުގެ ނައިޓް-ކުލާސްތަކުގައި ބައިވެރިވެފައެވެ. ސެންޓަރުގެ ބާނީ، ވޫ ޕެންގްހޮންގް ދަނީ އެހެން މުއައްސަސާތަކުންވެސް އެފަދަ ޕްރޮގްރާމްތައް ހިންގައި، އާންމުންނަށް ޚާއްސަކޮށްގެން ސަގާފަތާ ގުޅޭ ޚިދުމަތްތަކެއް ދިނުމަށް ގޮވާލަމުންނެވެ. އާންމު ގޮތެއްގައި ދުވާލުގެ ވަގުތުތައް، ވަޒީފާގެ މައިދާނުގައި ހޭދަކުރާ، އުމުރުން 18 އަހަރާ 55 އަހަރާ ދެމެދުގެ މީހުންނަށް ޚާއްސަކޮށްގެންނެވެ.

ޝަންހާއީ ސިޓީގެ 16 ޑިސްޓްރިކްޓްއެއްގެ 100އަށްވުރެ ގިނަ މަރުކަޒުގައި މިހާރު ނައިޓް-ކުލާސްތައް ހިންގައެވެ. ސަގާފީ ހުނަރުތަކާއި ފަރުމާކުރުމާއި، މޭކަޕްކުރުމާއި، ކެއްކުމުގެ ހުނަރުފަދަ ފަންނުވެރިކަން ދަސްކޮށްދޭ ކޯސްތައް ހިންގައެވެ.