ތަހުގީގާ މަތިކޮށް، ލީގު ފެށުން ފަސްކޮށްފި

ފުލުހުން އެފްއޭއެމަށް ވަދެ ހިންގާ ޖިނާއީ މައްސަލަތަކުގެ ތަހުގީގާ މަތިކޮށް, ދިވެހި ޕްރިމިއަރ ލީގު އަލުން ފެށިން ފަސްކޮށްފިއެވެ.

ގައުމީ ޓީމް ބަނގްލޭޝްއާ ދެކޮޅަށް ކުޅެން އޮތް ދެމެޗާއި, މާޒިޔާ އޭއެފްސީކަޕްގައި ކުޅެން އޮތް ދެ މެޗަކަށް ވަގުތު ދިނުމަށް މެދުކަނޑާލި ލީގު ފަށަން ތާވަލްކޮށްފައި އޮތީ މިއަދުއެވެ. ނަމަވެސް މިއަދު ލީގު ނުފަށާނެކަމަށް ކްލަބްތަކަށް އަންގާފައިވާކަމުގެ މައުލޫމާތު ލިބިގެން ނޫސްވެރިން ތަކުރާރުކޮށް ސުވާލު ދެންނެވުމުން، އެފްއޭއެމްގެ ޖެނެރަލް ސެކްރެޓަރީ ހުސައިން ޖަވާޒު ވިދާޅުވީ ލީގު ފެށުން ފަސްކޮށްފައިވާކަމަށެވެ. ލީގު އަލުން ފަށާނެ ތާރީޚެއް ވިދާޅުނުވެ، އިޝާރާތް ކުރެއްވީ އެއިދާރާއިން ބުރާސްފަތި ދުވަހު ނެރުނު ނޫސްބަޔާނަށެވެ. ފުލުހުން އެފްއޭއެމަށް ވަދެ ޖިނާއީ ތަހުގީގަކަށް އެއިދާރާއިން ބައެއް ސާމާނު ގެންގޮސްފައިވާތީ އެކަމަށް އިޝާރާތްކޮށް ނޫސްބަޔާނުގައި ބުނެފައިވަނީ އެފްއޭއެމް ދުވަހުން ދުވަހަށް ހިންގުމަށް ބޭނުންވާ ބައެއް ސާމާނު ގެންގޮސްފައިވާތީ ހިންގުން ހުއްޓިފައިވާ ކަމަށެވެ. އަދި އަލުން މުބާރާތްތައް ނުފެށޭނެކަމާއި, ކުރިއަށް ހުރި ހަރަކާތްތައްވެސް ނުފެށޭނެކަމަށް އެ ބަޔާނުގައި ބުނެފައިވެއެވެ. މިއަދު ޖަވާޒު ވިދާޅުވީ އެބަޔާނުގައި ފާހަގަކޮށްފައިވާ ސަބަބުތަކަށްޓަކައި ލީގުވެސް ފެށެން ނެތްކަމަށެވެ.

ފުލުހުން އެފްއޭއެމަށް ވަނީ އެއިދާރާއަށް އެކި ފަރާތްތަކުން ފޮނުވާ ފައިސާ އެ އިދާރާގެ އިސްވެރިންނާއި, އިސްވެރިންނާ ގުޅުން އޮންނަ ފަރާތްތަކުގެ އެކައުންޓުތަކަށް ޖަމާކުރަމުން ދާކަމުގެ ތުހުމަތުގައެވެ. އަދި އެކަމުގެ ތެރޭގައި ޖިނާއީ ކުށް ކުރަމުން ދާކަމުގެ ތުހުމަތުގައެވެ. ފުލުހުން އެފްއޭއެމަށް ވަދެ ތަހުގީގު ފެށީ ޕީޖީގެ އަމުރަށެވެ.

ފުލުހުން އެފްއޭއެމްއަށް ވަނުމުގެ ކުރިންވެސް އެ އިދާރާއަކީ އެކަށީގެންވާ މިންވަރާ ގާތަށްވެސް ހިންގަމުންދާ އިދާރާއެއް ނޫނެވެ. މުވައްޒަފުންނަށް މުސާރަ ނުދޭތާ އެތައް މަހެއް ވެއްޖެއެވެ. ގައުމީ ޓީމަށް ގެނައި ކޯޗުންނާއި, ޓެކްނިކަލް އޮފިޝަލުންނަށް މުސާރަ ނުދީގެން އެފައިސާ ދިނުމަށް ފީފާއިން ވަނީ އަންގާފައެވެ. އެކި ފަރާތްތަކަށް ދައްކަންޖެހޭ ފައިސާ ނުދައްކައި އޮތުމުން ކޯޓު ހުކުމްތައް އައިސްފައި އެބަހުއްޓެވެ. މުބާރާތްތައް ފެށުމަށް ކަނޑައެޅިފައިވާ ތާރީޚުތަކަށް ތަކުރާރުކޮށް ބަދަލު އައިސް، ލަސްވެއެވެ.