މޯލްޑިވްސް ކަރެކްޝަނަލް ސަރވިސް (އެމްސީއެސް) އާއި ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އާ ގުޅިގެން ޕްރިޒަން އޮފިސަރުންނަށް ހާއްސަ ޓްރޭނިންގ ޕްރޮގްރާމެއް ހިންގައިފިއެވެ.
މި ޕްރޮގްރާމަކީ "ދި ޔުނައިޓެޑް ނޭޝަންސް ސްޓޭންޑަޑް މިނިމަމް ރޫލްސް ފޯރ ދަ ޓްރީޓްމަންޓް އޮފް ޕްރިޒަނަސް (ދަ ނެލްސަން މަންޑޭލާ ރޫލްސް)" އާއި "ބެންގްކޮކް ރޫލްސް" އާ ގުޅޭގޮތުން ކުރިއަށްގެންދިޔަ ޓްރޭނިންގ ޕްރޮގްރާމެކެވެ. މި ޕްރޮގްރާމް ކުރިއަށްގެންދިޔައީ ޔޫރަޕިއަން ޔޫނިއަންގެ ފަންޑިން މެދުވެރިކޮށެވެ.
ކަރެކްޝަނުން ބުނީ ތިން ގްރޫޕަކަށް ބަހާލައިގެން ކުރިއަށް ގެންދިޔަ މި ތަމްރީން ޕްރޮގްރާމް ހިންގާފައިވަނީ އައްސޭރި ޖަލާއި ހުޅުމާލޭ ޖަލާއި މާފުށީ ޖަލުގައި ކަމަށެވެ. މި ތަމްރީން ޕްރޮގްރާމްގައި ޖުމްލަ 69 އޮފިސަރުން ބައިވެރިވި ކަމަށް ވެސް އެ އިދާރާއިން މައުލޫމާތު ދެއެވެ.
މި ޕްރޮގްރާމަކީ “ދި ޔުނައިޓެޑް ނޭޝަންސް ސްޓޭންޑަޑް މިނިމަމް ރޫލްސް ފޯރ ދަ ޓްރީޓްމަންޓް އޮފް ޕްރިޒަނަރސް (ދަ ނެލްސަން މަންޑޭލާ ރޫލްސް)" ނުވަތަ ޖަލުތަކުގައި ބޭނުންކުރާ ބައިނަލްއަޤްވާމީ މިންގަނޑުތަކަށާއި ބެންގްކޮކް ރޫލްސްއަށް މޯލްޑިވްސް ކަރެކްޝަނަލް ސާރވިސްގައި މަސައްކަތްކުރާ ހުރިހާ ޕްރިޒަން އޮފިސަރުން އަހުލުވެރިކުރުވައި، ޖަލު އޮފިސަރުން ތަރައްޤީކުރުމުގެ މަގުސަދުގައި ކުރިއަށްގެންދިޔަ ޕްރޮގްރާމެއް ކަމަށް ކަރެކްޝަނުން ބުންޏެވެ.
މި ޓްރޭނިންގ ޕްރޮގްރާމުގައި އޮފިސަރުން ތަމްރީންކޮށްފައިވަނީ ޔޫއެންއޯޑީސީގެ ޕްރިޒަން އެކްސްޕަރޓް އެލިއުޑް އޮޕިލޯއެވެ.
