ފީނަން ގޮސް އުޅުނު ދުވާފަރު މީހަކު މަރުވެއްޖެ
މަރުވެފައިވަނީ އުމުރުން 51 އަހަރުގެ، އިސްމާއީލް މޫސާ
ރ. ދުވާފަރު
ފީނަން ގޮސް އުޅުނު ރ. ދުވާފަރުގެ މީހަކު މަރުވެއްޖެއެވެ.
"ރާއްޖެ އެމްވީ"އަށް މައުލޫމާތު ލިބިފައިވާ ގޮތުގައި އާދީއްތަ ދުވަހު ފީނަން ގޮސް އުޅެނިކޮށް މަރުވެފައިވަނީ އެ ރަށުގެ އުމުރުން 51 އަހަރުގެ އިސްމާއީލް މޫސާއެވެ. އޭނާ މަރުވީ އެ ރަށާ ކައިރި އޮންނަ ރިސޯޓެއް ކައިރިއަށް ފީނަން އެރި އުޅެނިކޮށް ކަމަށް މައުލޫމާތު ލިބެެއެވެ.
މި ހާދިސާގައި މަރުވި މީހާ ރ. އުނގޫފާރު ހޮސްޕިޓަލަށް ގެންދިޔައީ މެންދުރު 2:15 ހާއިރުއެވެ. ގެންދިޔައިރުވެސް މަރުވެފައި ވާކަމަށް ހޮސްޕިޓަލާ ހަވާލާދީ އެ ރަށު މީހަކު ވަނީ މައުލޫމާތު ދީފައެވެ.
ފުލުހުން ބުނީ ރ އަތޮޅު ޔޫ އެންޑް މީ ރިސޯޓު ކައިރިއަށް ފީނަން ފޭބި މީހަކު ޚަބަރު ހުސްވެގެން އުނގޫފާރު ހޮސްޕިޓަލަށް ގެންދިޔަ ކަމަށެވެ. އެ ހާދިސާގެ ރިޕޯޓު އެ އިދާރާއަށް ލިބިފައިވަނީ އާދީއްތަ ދުވަހުގެ މެންދުރުފަހު 2:12 ހާއިރު ކަމަށްވެސް މައުލޫމާތު ދެއެވެ.
