އާންމު ދިރިއުޅުމުގައި ބޭނުން ކުރާ އެކި އެއްޗެހިން ކުނީގެ ގޮތުގައި އުކާލަން ޖެހެނީ ކުޑަ މިންވަރެއް ކަމަށް ހީ ކުރެވުނު ކަމުގައި ވީ ނަމަވެސް، ލަންޑަންގެ ޓޭޓް މޮޑަރން އަރޓް ގެލަރީގައި ދާދި ފަހުން ހުޅުވާލި މަޢުރަޒަށް ބަލާލުމުން، އެއީ އަދި މުޅިން ރަނގަޅު ޤަބޫލު ކުރެވުމެއް ނޫންކަން ސާފުވެއެވެ. ހިޔުންޑާއި ކޮމިޝަނުން އެންމެ ފަހުން ދައްކާލި ފަންނުވެރި މަސައްކަތް ފުރިހަމަ ކޮށްފައި ވަނީ ފެންފުޅި ފަދަ ފުޅިތަކުގައި ޖަހަން ބޭނުން ކުރާ ޒާތުގެ 2 މިލިއަން މަތިގަނޑު ބޭނުން ކޮށްގެންނެވެ.
ފުޅީގެ މަތި ބޭނުން ކޮށްގެން ފަރުމާ ކޮށްފައި ވާ 3 އީޖާދެއް، މަޢުރަޒުގައި ވަނީ ދައްކާލާފައެވެ. "ބިހައިންޑް ދަ ރެޑް މޫން"ގެ ނަން ދީފައި ވާ މަޝްރޫޢުގެ ފަންނުވެރި މޭސްތިރިއަކީ ގާނާއަށް އުފަން އަރޓިސްޓެއް ކަމަށް ވާ އެލް އަނަތުސޫއީއެވެ. އޭނާގެ މަސައްކަތްތައް ދައްކާލަން ބަހައްޓާފައި ވަނީ، ޓަރބައިން ހޯލްގައި އެލުވާފައި ހުންނަ ކަހަލަ ގޮތަކަށެވެ.
ބަލާބެލުމަށް އެއީ ފުޅިފުޅީގެ މަތިތައް ބޭނުންކޮށްގެން ތައްޔާރު ކޮށްފައި ހުރި އެއްޗެއް ކަމަށް ހީވެސް ނުވާނެއެވެ. ފޮތީގެ ފަރުދާއެއް ފަދަ ފަރުމާތައް ތައްޔާރު ކުރުމަށްޓަކައި އަނަތުސޫއީ ވަނީ މަތިގަނޑުތައް ފިއްތާ، އެކި ގޮތްގޮތަށް އަނބުރާ ހެދުމަށްފަހު، އެކަތި އަނެކެއްޗާ ގުޅުވައިގެން ފަހާފައެވެ. ފުރަތަމަ ނަޒަރުން މާ ބޮޑު މާނައެއް ދޭހަ ނުވި ކަމުގައި ވީ ނަމަވެސް، މި ފަރުމާތަކަކީ މުހިންމު މެސެޖެއްވެސް ފޯރުކޮށްދޭ އުފެއްދުންތަކެކެވެ. އަނަތުސޫއީގެ އަމާޒަކަށް ވީ، އެފްރިކާއާއި ވިލާތުގެ އިތުރުން އެމެރިކާ ސަރަޙައްދުގެ ގުޅިފައި އޮތް މާޒީގެ ވާހަކަތައް ކިޔައިދިނުމެވެ.
ފަރުމާތައް އެކުލަވާލުމުގެ މަސައްކަތުގައި އިސްކޮށް ހުރި އޮސޭއީ ބޮންސޫ ކިޔައިދިން ގޮތުގައި ފަރުމާތަކުން ރަމްޒުކޮށްދެނީ އެފްރިކާއިން އެމެރިކާ ސަރަޙައްދުގެ ޤައުމުތަކަށް ހިޖުރަވެރިން ކުރި ދަތުރުގެ ވާހަކައެވެ.
މައުރަޒުގައި ހުރި ފަރުމާތަކުގެ ތެރެއިން ރަތްކަން ގަދަ ހިސާބަކަށް އިޝާރާތް ކުރަމުން ބޮންސޫ ބުނީ އެއީ ލިބިފައިވާ ގެއްލުމާއި ހިތާމަތައް ރަމްޒުކޮށްދޭ ބައި ކަމަށެވެ. އެއީ އެޓްލާންޓިކް ކަނޑު ހުރަސްކޮށް އަޅުންގެ ވިޔަފާރި ކުރަމުން ދިޔަ ދުވަސްވަރު، މަޖުބޫރީ ޙާލަތުގައި އެއްތަނުން އަނެއް ތަނަށް އުފުލި މުދަލާ، އެކަމުގައި ޝިކާރައަކަށްވި މީހުންގެ އިޙުސާސްތައް ރަމްޒު ކޮށްދޭ ބައި ކަމަށް ބޮންސޫ ކިޔައިދިނެވެ.
ފެންނަން ތި ހުރި ފަރުމާއަށް ކިޔަނީ 'ބިހައިންޑް ދަ ރެޑް މޫން'. މީ މައިގަނޑު 3 ފަރުމާއެއް އެއްކޮށްގެން އުފައްދާފަ ވާ ފަރުމާއެއް. މި ފަރުމާ ރަމްޒުކޮށްދެނީ އެފްރިކާއާއި ވިލާތާއި އެމެރިކާގެ ޤައުމުތަކުގެ ގުޅި، މަސްހުނިވެފަ އޮތް މާޒީ. މި ތައްޔާރު ކޮށްފަ މި ހުރީ 2 މިލިއަނަށް ވުރެ ގިނަ މަތިގަނޑާއި، ދަގަނޑު ކޮޅުތަކެއް އެއްކޮށް ފަހައިގެން. ގިނަ ބައިތަކަކީ ވެސްޓް އެފްރިކާގެ އަރޓް ސްޓޫޑިއޯތަކުގަ ފިއްތާ ކުދިކޮށްފަ ހުރި ބައިތައް. ބަލާބެލުމަށް ހީވާނީ ހަމަ ފޮތި ފަރުދާއެއް ދަމާފަ ހުރިހެން. މި ފަރުދާތައް ކިޔައިދޭ ވާހަކައަކީ، އެފްރިކާ މީހުން، އެމެރިކާ ސަރަޙައްދުގެ ޤައުމުތަކަށް ކުރި ހިޖުރައިގެ ވާހަކަ. ވަށާ ޖެހޭ ތާރީޚުގެ ވާހަކައާއި، ވަށްބުރު ބައްޓަމަށް އޮންނަ ފުޅި މަތިގަނޑު ގުޅުވާލެވޭތާދޯ.އޮސޭއީ ބޮންސޫ؛ އިންސްޓަލޭޝަން ކިއުރޭޓަރ
ޓޭޓް މޮޑަރންއާއި ހިޔުންޑާއި ކޮމިޝަން ގުޅިގެން އެކި ކަހަލަ ފަރުމާތަކާއި އީޖާދުތައް ދައްކާލުމަށް ކުރިއަށް ގެންދާ މަޝްރޫޢަކީ އެތައް އަހަރަކަށް ކުރިއަށް ގެންދާ މަޝްރޫޢެކެވެ. އެ މަޢުރަޒު ފަށާފައި ވަނީ 2014 ވަނަ އަހަރުއެވެ. އަނަތުސޫއީގެ މަސައްކަތްތަކަކީ، މަޢުރަޒަށް އެންމެ ފަހުން އިތުރު ކުރި ފަރުމާތަކެވެ.
2024 ވަނަ އަހަރުގެ އޭޕްރިލް 14 ވަނަ ދުވަހުގެ ނިޔަލަށް، ޓަރބައިން ހޯލްގައި، ބިހައިންޑް ދަ ރެޑް މޫން މަޢުރަޒުގެ ފަރުމާތައް ދައްކާލަން ބަހައްޓާފައި ހުންނާނެއެވެ.
