ގާނާއަށް މިހާރު ކުރިމަތިވެފައިވާ އިގުތިސާދީ ކާރިސާއާއެކު އެގައުމުގެ ރައީސްގެ އިސްތިއުފާއަށް ރައްޔިތުން ގޮވާލަން ފަށައިފިއެވެ.
ހޮނިހިރު ދުވަހު، 1،000ށް ވުރެ ގިނަ މީހުން ވަނީ ގާނާގެ ވެރިރަށް އަކްރާގެ މަގުތަކަށް ނުކުމެ، އެގައުމުގެ ރައީސް ނާނާ އަކޫފޯ-އައްޑޯގެ އިސްތިއުފާއަށް ގޮވާލާފައެވެ.
ގައުމަށް ދިމާވެފައިވާ އިގުތިސާދީ ގޮންޖެހުންތަކާ ދެކޮޅަށް ނުކުމެ އަޑުއުފުލި ރައްޔިތުން ވަނީ ރައީސް އިސްތިއުފާދެއްވާފައި ވަޑައިގަންނަވަން ޖެހޭ ކަމަށް ވިދާޅުވެފައެވެ. އަދި އިންޓަނޭޝަނަލް މަނިޓަރީ ފަންޑް (އައިއެމްއެފް)އާއެކު ސަރުކާރުން ކުރިއަށްގެންދާ މަޝްވަރާތަކަށް ވެސް ރައްޔިތުން ވަނީ ނޫނެކޭ ބުނެފައެވެ.
ގާނާގެ ފައިސާގެ އަގު އިންތިހާއަށް ދައްވެ، އެގައުމުގައި ތެލާ ކާބޯތަކެތީގެ އަގު ވަނީ އިންތިހާއަށް އުފުލިފައެވެ.
އިގުތިސާދު އަލުން އާރާސްތުކުރުމަށް ގާނާގެ ސަރުކާރުން ދަނީ އައިއެމްއެފް އިން އެތައް ބިލިއަން ޑޮލަރެއްގެ ފަންޑު ހޯދުމަށް މަސައްކަތްކުރަމުންނެވެ.
އާންމުން މަގުމައްޗަށް ނުކުމެ މުޒާހަރާކުރަން ފާށާފައި މިވަނީ އިގުތިސާދު ހަމައަކަށް އެޅުވުމުގެ މަސައްކަތް ސަރުކާރުން ކުރަމުންދާކަމަށް އެ ޤައުމުގެ ރައީސް ވިދާޅުވިތާ ހަފުތާއެއްހާ ދުވަސް ފަހުންނެވެ.
ފާއިތުވި ސެޕްޓެމްބަރު މަހު ގާނާގެ އިންފްލޭޝަން ވަޏީ 37 އިންސައްތައަށް އުފުލިފައެވެ.
ގާނާގެ ވެރި ރަށުގެ މަގުމައްޗަށް ނުކުމެ އަޑުއުފުލި މީހުން ބުނަނީ ރައީސް ފެއިލްވެފައިވާ ކަމަށެވެ. އަދި ތެލުގެ އަގުތައް ގާނާގެ އާންމުން މަރަމުންދާކަމަށް ސިފަކޮށް ވެސް އަޑު އުފުލަމުންނެވެ.
ބައެއް ރައްޔިތުން ވަނީ ސަރުކާރަށް ލޯނު ނުނިދުމަށް އައިއެމްއެފް އަށް ގޮވާލާ މިހާރު ފުދިއްޖެ ކަމަށްވެސް ބުނަމުންނެވެ.
މީގެ އިތުރުން ގާނާގައި ތެޔޮ އެބަހުރިކަމަށާއި، ރަނާ، ޖަވާހިރު އަދި މެގްނީޒިއަމްވެސް ގައުމުގައި އެބަހުރި ކަމަށާއި ބޭނުންވަނީ ގައުމު ހިންގޭނެ ރަނގަޅު ލީޑަރެއް ކަމަށް ގާނާގެ އާންމު ރައްޔިތުން ދަނީ ބުނަމުންނެވެ.
