ޒަމާނާ އެއްގޮތަށް އިންތިޚާބުތަކާއި ބެހޭ ގާނޫނުތަކަށް ބަދަލު ގެންނަންޖެހޭ: ހަބީބު
ޝަކުވާ ހުށަހެޅުން ހަމައެކަނި ޝަކުވާ ފޯމުން އޮންނައޮތުމަށް ބަދަލުތަކެއް އައިސް ޒަމާނާ އެއްގޮތަށް އެމީހަކު ހުރިތާކުން އޮންލައިންކޮށް ޝަކުވާ ހުށަހެޅޭނެ ނިޒާމެއް ގާއިމުކުރެވެންޖެހޭ
އީސީގެ ނައިބު ރައީސް އިސްމާއީލު ހަބީބު
ޒަމާނާ އެއްގޮތަށް އިންތިޚާބުތަކާއިބެހޭ ގާނޫނުތަކަށް ބަދަލު ގެންނަންޖެހޭކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއީލު ހަބީބު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ހަބީބު ވިދާޅުވީ އިންތިޚާބުގެ ކަންކަން އޮބްޒަރވްކުރާ މީހުންނާއި މޮނިޓަރުންގެ ދައުރު ގާނޫނުގައި އެހާ ސާފުނޫންކަމަށެވެ. ބައެއް ފަހަރު އޮބްޒަރވަރުން ކުރާ ކަންކަމަކީ މޮނިޓަރކުރުން ކަމަށާއި މޮނިޓަރުންކުރާ ކަމަކީ އިންތިޚާބު އޮބްޒަރވްކުރުންކަމަށް ވާކަމަށް ހަބީބު ވިދާޅުވިއެވެ.
މީގެއިތުރުން ޝަކުވާ ހުށަހެޅުން ހަމައެކަނި ޝަކުވާ ފޯމުން އޮންނައޮތުމަށް ބަދަލުތަކެއް އައިސް ޒަމާނާ އެއްގޮތަށް އެމީހަކު ހުރިތާކުން އޮންލައިންކޮށް ޝަކުވާ ހުށަހެޅޭނެ ނިޒާމެއް ގާއިމުކުރެވެންޖެހޭކަމަށް ހަބީބު ވިދާޅުވިއެވެ.
މީގެއިތުރުން ކެމްޕެއިން ކުރުން މަނާވަގުތުގެ ގޮތުގައި ކަނޑައަޅާފައި އޮންނަ ވޯޓުލާ ދުވަސް ނިމި އަނެއް ދުވަހުގެ ހެނދުނު 6 އާ ހަމައަށް އޮންނައޮތުމަށްވެސް ބަދަލުތަކެއް އަންނަންޖެހޭކަމަށް ދެކެވަޑައިގަންނަވާކަމަށް ހަބީބު ވިދާޅުވިއެވެ. އެއީ އެގޮތަށް އޮތުމުން އިންތިޚާބު ކާމިޔާބުކުރާ ކެންޑިޑޭޓަށް އުފާފާޅުކުރުމުގެ ފުރުސަތު ލިބިގެންދަނީ އަނެއް ދުވަހުގައި ކަމަށްވުމުން ހަބީބު ވިދާޅުވިއެވެ.
ހަބީބު ވިދާޅުވީ ކުރިޔަށް އޮތްތަނުގައި ގާނޫނަށް ގެންނަން ބޭނުންވާ ބަދަލުތަކާއި ގުޅޭގޮތުން ސިޔާސީ ޕާޓީތަކާއި މަދަނީ ޖަމިއްޔާތަކާއެެކު މަޝްވަރާކުރާނެކަމަށެވެ. ނަމަވެސް އެއީ ކުރިޔަށް އޮތް ރައްޔިތުންގެ މަޖިލީހުގެ އިންތިޚާބަށް ފަހުކަމަށް ހަބީބު ވިދާޅުވިއެވެ.
