ބައިނަލްއަޤްވާމީ ކަނޑު ދަތުރުފަތުރުގެ ދުވަސް 2023 ފާހަގަ ކުރުމަށް ޚާއްސަ ހަފްތާއެއް ބޭއްވުމަށް ޓްރާންސްޕޯޓް މިނިސްޓްރީން ނިންމައިފިއެވެ.

ދުނިޔޭގެ ބައިނަލްއަޤަވާމީ ކަނޑު ދަތުރުފަތުރާ ގުޅޭ ދުވަސް ދިވެހިރާއްޖޭގައި މިއަހަރު ފާހަގަ ކުރުމަށްޓަކައި ރާވާފައިވާ ޕްރޮގްރާމް މި ފެށޭ ހަފްތާގެ އާދީއްތަ ދުވަހުން ފެށިގެން ހަފްތާ ނިމެންދެން ކުރިޔަށް ގެންދާގޮތަށް އެ މިނިސްޓްރީން ވަނީ ހަމަޖައްސާފައެވެ. އެގޮތުން މި އަހަރުގެ ބައިނަލްއަޤްވާމީ ކަނޑު ދަތުރުފަތުރާގުޅޭ ޝިއާރެއްގެ ގޮތުގައި އިންޓަރނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ) އިން ކަނޑައަޅާފައިވަނީ ' މާޕޯލް އެޓް 50 – އަވަރ ކޮމިޓްމެންޓް ގޯސް އޮން' އެވެ.

ދިވެހިރާއްޖޭގައި މިދުވަސް ފާހަގަ ކުރުމަށްޓަކައި ރާވާފައިވާ ޕްރޮގްރާމް ފެށުމަށްހަމަޖެހިފައިވަނީ މާލޭ ނޯތު ހާބަރުގައި 8 ސެޕްޓެމްބަރު 2023 ވަނަ ދުވަހުއެވެ. މި ޕްރޮގްރާމުގެ ތެރެއިން ކުރިޔަށް ގެންދާ ކަންކަމުގެ ތެރޭގައި މާލޭ ނޯތުހާބަރަށް އަންނަ މުދާ އުފުލާ އުޅަނދުފަހަރުގައި ހުރުން ލާޒިމްވާ ސަލާމަތާ ރައްކާތެރިކަމާއި ގުޅޭކަންކަން އުޅަނދުފަހަރުގައި ފުރިހަމަ ކުރެވިފައި ހުރިކަން ޔަގީންކޮށް ބެލުން ހިމެނެއެވެ. އަދި އުޅަނދުތައް ޗެކްކޮށް އެ އުޅަނދުފަހަރުގެ ވެރިންނަށާއި ކެޕްޓަނުންނަށް މައުލޫމާތު ފޯރުކޮށްދިނުމަށް ވަނީ ހަމަޖެހިފައެވެ.

އެގޮތުން ދެވޭ މަޢުލޫމާތު ތަކުގެ ތެރޭގައި 19 މެއި 2023 ގައި އަމަލުކުރަން ފެށި "ކަނޑު ދަތުރުކުރާ އުޅަނދުފަހަރަށް މުދާ ބަރުކުރުމާއި މުދާ އުފުލުމާއި ގުޅޭ ގަވާއިދު" ގައި ހިމެނޭ ކަންކަން ހިމެނޭ ކަމަށް އެ މިނިސްޓްރީން ވަނީ ބުނެފައެވެ. އެގޮތުން މުދާ އުފުލާނަމަ އެ އުޅަނދަށް މުދާ އެރުވިކަމުގެ ލިޔުން ދޭންޖެހޭއިރު އެ އެ ލިޔުމުގެ ސާމްޕަލް ފޮތްތަކެއް އުޅަނދުފަހަރަށް ދޫކޮށް މި މައުލޫމާތު ދޭންޖެހޭކަން އަންގާ އެކަމަށް އުޅަނދުފަހަރުގެ ކެޕްޓަނުން އަހުލުވެރިކުރުވުމާއި، އުޅަނދުފަހަރަށް އަރުވާ މުދަލާއި އުޅަނދުފަހަރުގެ ރައްކާތެރިކަމަށްޓަކައި އިންޝޫރަންސް އިން އަދާކުރާ ދައުރު ބުނެދިނުމަށްޓަކައި އަމާނާ ތަކަފުލްއިން އިންޝޫރަންގެ ބޭނުންތެރިކަމާއި، އިންޝޫރަންސް ނެގުމުގައި ގެންގުޅެންޖެހޭ ގޮތްތައް ބުނެދީ މިކަމަށް އަހުލުވެރިކުރުވުން ހިމެނެއެވެ. އަދި ހަމައެހެންމެ ސަލާމަތާގުޅޭ މައުލޫމާތު މިނިސްޓްރީ އޮފް ޓްރާންސްޕޯޓްގެ ކަމާބެހޭ ބޭފުޅުން ނޯތުހާބަރުގައި ދެމުން ގެންދާނެއެވެ. މީގެ އިތުރުން މާލޭ ސަރަހައްދުގައި އޮޕަރޭޓްކުރާ ދަގަނޑު އުޅަނދުފަހަރުން މުދާ އުފުލުމުގައި ގެންގުޅެން ލާޒިމްވެފައިވާ މާޕޯލް ކޮންވެންޝަންގެ 6ވަނަ އެނެކްސްގައި ހިމެނޭ ކަންތައްތަކަށް ބަލާލައިގެން އެ އުޅަނދުފަހަރުގެ ވެރިންނަށް މައުލޫމާތު ފޯރުކޮށްދިނުމާއި، ތެޔޮ އުފުލާ އުޅަނދުފަހަރަށް ލާޒިމްވެފައިވާ ކަންކަން ބުނެދިނުން ހިމެނެއެވެ.

މެރިޓައިމް ހަފްތާ ނިންމުގެ ގޮތުން މާލޭ ނޯތު ހާބަރު އަދި ހުޅުމާލެ ހާބަރު ސަރަހައްދުގައި 14 އޮކްޓޫބަރު ވަނަ ދުވަހު ސާފު ކުރުމުގެ ޕްރޮގްރާމެއް ކުރިޔަށް ގެންދެވޭނެއެވެ. މި ޕްރޮގްރާމަކީ ކޯސްޓްގާޑާއި، އާބަންކޯއާއި، އަމާނާތަކަފުލްއާއި، މޯލްޑިވްސް ބޯޓިންގ އެސޯސިއޭޝަންއާއި، މޯލްޑިވްސް ޕޯޓްސް ލިމިޓެޑް އަދި މިނިސްޓްރީ އޮފް ޓްރާންސްޕޯޓްގެ ކަމާބެހޭ ބޭފުޅުން ގުޅިގެން ކުރިޔަށް ގެންދިއުމަށް ރާވާފައިވާ ޕްރޮގުރާމެކެވެ.

ބައިނަލްއަޤްވާމީ ކަނޑު ދަތުރުފަތުރުގެ ދުވަހުގެ މުނާސަބަތާއި ގުޅިގެން މިނިސްޓްރީ އޮފް ޓްރާންސްޕޯޓުއިން ވަނީ މި ސިނާއަތުގައި މަސައްކަތް ކުރައްވާ ފަރާތްތަކުގެ އަގު ވަޒަންކުރާކަން ހާމަކޮށް، މި ސިނާއަތުގައި މަސައްކަތް ކުރައްވާ ފަރާތްތަކުގެ އަގު ވަޒަންކުރުމަށްޓަކައި ކޮންމެ އަހަރަކުވެސް އެ ކުންފުންޏެއްގެ ނުވަތަ އެ މުވައްސަސާއެއްގެ ޓްރާންސްޕޯޓް ޑިޕާޓްމަންޓްތަކުން މެރިޓައިމް ހަފްތާގައި ޚާއްސަ ހަރަކާތްތަކެއް ހިންގަވައި ދެއްވައި މި ސިނާތުގައި ހިމެނޭ މަސައްކަތްތެރިން އެ ކުރައްވާ ބުރަ އަދި މިންނެތް މަސައްކަތް ބަލައިގަނެ ހިއްވަރު ދެއްވުމަށް އެ ކުންފުނިތަކާއި، މުއައްސަސާތަކުން ކަންކަންރާވައި ކުރިޔަށްގެންދިއުމަށް އެދިލައްވާކަން ހާމަކުރައްވާފައެވެ.