ރައީސް ސާލިހު ދެއްކެވީ ޑިމޮކްރަސީގެ ރީތި މިސާލެއް: ހަބީބު
މިއީ މިނިވަންކަމާއި އިންސާފުވެރިކަމާއެކު، ބިރުދެއްކުމެއް ނެތި، އަމާންކަމާއެކު ބޭއްވުނު އިންތިޚާބެއް
އިލެކްޝަންސް ކޮމިޝަންގެ ނައިބުރައީސް، އިސްމާއީލް ހަބީބު
މިފަހަރުގެ ރިޔާސީ އިންތިޚާބުގައި އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ދެއްކެވީ ޑިމޮކްރަސީގެ ރީތި މިސާލެއްކަމަށް، އިލެކްޝަންސް ކޮމިޝަންގެ ނައިބުރައީސް އިސްމާއީލް ހަބީބު ވިދާޅުވެއްޖެއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ހަބީބު ވަނީ ރިޔާސީ އިންތިޚާބު ކާމިޔާބު ނުކުރެއްވުނުނަމަވެސް، އިންތިޚާބުގެ ނަތީޖާ ގަބޫލުކުރައްވައި، އެކަން އިއުލާން ކޮށްދެއްވިކަމަށްޓަކައި ރައީސަށް ޝުކުރު ދަންނަވާފައެވެ. އަދި މިއީ މިނިވަންކަމާއި އިންސާފުވެރިކަމާއެކު، ބިރުދެއްކުމެއް ނެތި، އަމާންކަމާއެކު ބޭއްވުނު އިންތިޚާބެއް ކަމަށްވެސް ވިދާޅުވިއެވެ.
ހަބީބު ވިދާޅުވީ، މީގެކުރިން ބޭއްވުނު ބައެއް އިންތިޚާބުތަކުގައި އެ އިންތިޚާބެއް ކާމިޔާބު ނުވުމުން ބައެއް ކަހަލަ ތުހުމަތުތައް އީސީއަށް ކޮށްފައިވާ ކަމަށެވެ. އެހެންނަމަވެސް މިފަހަރު އެފަދަ އެއްވެސް ކަމެއް ފެނިފައި ނުވާކަމަށެވެ.
ހަބީބު ވިދާޅުވީ ރިޔާސީ އިންތިޚާބުގެ ފުރަތަމަ ބުރެކޭ އެއްފަދައިން، ދެވަނަ ބުރުގައި ބާތިލް ވޯޓް ގިނަކަމަށާއި، ބާތިލް ވޯޓް ގިނަވެފައިވާ ބައެއް ގޮތްތަކަށް ބަލާއިރު، ވޯޓް ކަރުދާހުގައި ބާތިލްވާ ސަބަބުތައް ގިނަކަމަށެވެ. އެގޮތުން ކުރެހުމާއި ލިޔުން ފަދަ ކަންތައްތައް ކޮށްފައި ވާކަމަށާއި، ފަވާފައި ހުރި ބައެއް ވޯޓްތައްވެސް ބާތިލްވެފައި ވާކަމަށް ވިދާޅުވިއެވެ.
އިލެކްޝަންސް ކޮމިޝަންގެ ފަރާތުން އެކަންތައްތައް ދިރާސާ ކުރަންޖެހޭ ކަމަށާއި، ދިރާސާ ކުރައްވާނެ ކަމަށް ވެސް ހަބީބު ވިދާޅުވިއެވެ. އަދި ވޯޓް ކަރުދާސްތައް ނައްތާލުމުގެ ކުރިން ދިރާސާއަށް ބާތިލް ވޯޓުގެ ކޮންމެވެސް މިންވަރެއް ބޭނުންކުރާނެ ކަމަށްވެސް ވިދާޅުވިއެވެ.
ހަބީބު ވިދާޅުވީ މިފަހަރުގެ ރިޔާސީ އިންތިޚާބަކީ ވަރަށް ގިނަ ބައެއްގެ ތެދުވެރި، އިޚްލާސްތެރި ބުރަ މަސައްކަތުން ނިންމާލެވުނު މަސައްކަތެއް ކަމަށާއި، މިއީ މިހާތަނަށް އީސީން ބޭއްވި އެންމެ ފުރިހަމަ އިންތިޚާބު ކަމަށެވެ.
