އިންތިޚާބަށްފަހު އެމްޑީޕީގެ މެމްބަރުންނަށާއި މުދަލަށް ގެއްލުންދިނުން އެ ޕާޓީން ކުށްވެރިކޮށްފި
2 އޮކްޓޯބަރު 2023 | ހޯމަ 13:16ކާމިޔާބީ ފާހަގަކުރުމުގެތެރޭގައި މިފަދަ އަމަލުތައް ހިންގުމަކީ ޑިމޮކްރެޓިކް އުސޫލަތަކާ ބީރައްޓެހި ވަރަށް ނާތަހުޒީބު ދަށުދަރަޖައިގެ އަމަލުތަކެއް
ފޭދޫ ދާއިރާގެ މެންބަރު، މުހައްމަދު ނިހާދަށް ހަމަލާދިނުމާ ގުޅިގެން ހޮސްޕިޓަލުގައި އެޑްމިޓްކޮށްފައި
ރިޔާސީ އިންތިޚާބުގެ ދެވަނަ ބުރުގައި، އެމްޑީޕީގެ މަރަދޫ ދާއިރާގެ މެމްބަރާއި އިބްރާހީމް ޝަރީފާއި ފޭދޫ ދާއިރާގެ މެމްބަރު މުހައްމަދު ނިހާދަށް ބަޔަކު ބޮޑެތި އަނިޔާތަކެއް ދީ، އަދި އިންތިޚާބަށްފަހު ދ. ކުޑަހުވަދޫއާއި ގއ. ކޮލަމާފުށީގައި ހުންނަ އެމްޑީޕީގެ އޮފީސްތަކަށާއި ބައެއް ރަށްރަށުގައި ހުރި ކެމްޕެއިން ޕޯސްޓަރު ބިލްބޯޑު ފަދަ ތަކެއްޗަށް ގެއްލުން ދެމުންދާތީ، އެކަން ދިވެހިރައްޔިތުންގެ ޑިމޮކްރެޓިކް (އެމްޑީޕީ)ގެ ފަރާތުން ކުށްވެރިކޮށްފިއެވެ.
އިންތިޚާބަށްފަހު އިދިކޮޅު ޕީޕީއެމް ޕީއެންސީއަށް ތާއީދުކުރާ ފަރާތްތަކުން ކާމިޔާބީ ފާހަގަކުރުމުގެތެރޭގައި މިފަދަ އަމަލުތައް ހިންގުމަކީ ޑިމޮކްރެޓިކް އުސޫލަތަކާ ބީރައްޓެހި، ވަރަށް ނާތަހުޒީބު އަމަލުތަކެއްކަމަށް އެމްޑީޕީން މިކަމާ ގުޅިގެން ނެރުނު ބަޔާނުގައި ބުނެފައިވެއެވެ.
އެމްޑީޕީން ވަނީ، އެޕާޓީގެ މަޖިލިސް މެމްބަރުންނަށާއި ޕާޓީގެ އެކިއެކި އޮފީސްތަކަށް ގެއްލުން ދިން ފަރާތްތައް ހޯދައި، އެކަންކަން ތަކުރާރުވިޔަނުދިނުމަށް ފުލުހުންނަށް އިލްތިމާސްކޮށްފައެވެ.
ކެމްޕެއިން ތެރޭގައިވެސް އަދި އިންތިޚާބަށްފަހުވެސް، ޒިންމާދާރު ސިޔާސީ ޕާޓީއަކުން އަމަލުކުރަންވާނީ ސުލްހަވެރިކަމާއި ޑިމޮކްރެޓިކް ހަމަތަކުގެ ތެރެއިން އިންތިޚާބުން ނުކުންނަ ނަތީޖާއަށް އިހްތިރާމްކުރުމާއެކު، އެ ޕާޓީން ހިންގާ ހަރަކާތްތައް ހިންގުމަށް ކަމަށްވެސް އެމްޑީޕީގެ ބަޔާނުގައި ބުނެފައިވެއެވެ.
