މަރުގެ ހުކުމް ތަންފީޒުކުރުން ހުއްޓާލުމަށް އެމްނެސްޓީ އިން ރާއްޖެއަށް ގޮވާލައިފި
20 ޖުލައި 2017 | ބުރާސްފަތި 17:58ރެކޯޑް ދެމެހެއްޓުމަށް ގޮވާލާފައިވޭ
މަރުގެ ހުކުމް އިއްވާފައިވާ ހުސައިން ހުމާމް
ރާއްޖޭގައި މަރުގެ ހުކުމް ތަންފީޒުކުރުން ވަގުތުން ހުއްޓާލަން ޖެހޭ ކަމަށް އެމްނެސްޓީ އިންޓަނޭޝަނަލް އިން ބުނެފިއެވެ.
އެމްނެސްޓީ އިން ނެރެފައިވާ ބަޔާނެއްގައި ބުނެފައިވަނީ ތިން މީހެއްގެ މައްޗަށް މަރުގެ ހުކުމް ތަންފީޒުކުރުމަށް ސަރުކާރުން ނިންމާފައިވާ ކަމަށް މައުލޫމާތު ލިބިފައިވާ ކަމަށެވެ.
ރާއްޖޭގައި މަރުގެ ހުކުމް ތަންފީޒުނުކުރާތާ 60 އަހަރަށްވުރެ ގިނަ ދުވަސްވެފައިވާ ކަަމަށާއި އެ ރެކޯޑް ދަމަހައްޓަން އެ ޖަމާއަތުން ގޮވާލާފައިވެއެވެ.
"މަރުގެ ހުކުމް ތަންފީޒުކުރުމަށް ދިވެހިރާއްޖޭގެ ސަރުކާރުން ނިންމާފައިވާ ނިންމުން ހުއްޓުވަންޖެހޭ. އަދި، މަރުގެ ހުކުމް އެއްވެސް ގޮތަކަށް ތަންފީޒުނުކުރުމަށް ނިންމާ، އެކަމަށް ސަރުކާރުން ރަސްމީ ގަރާރެއް ނެރެންވެސް ގޮވާލަން. މަރުގެ ހުކުމް މި ފަރާތްތަކުގެ މައްޗަށް ތަންފީޒުކޮށްފިނަމަ، ރާއްޖޭގެ ރީތި ނަމަށް އިޔާދަނުކުރެވޭ ވަރުގެ ގެއްލުމެއް ލިބިގެންދާނެ" އެމްނެސްޓީއިން ދެކުނު އޭޝިޔާއަށް ކަނޑައަޅުއްވާފައިވާ ސީނިއަރ އެޑްވައިޒަރ ޑޭވިޑް ގްރިފިތްސް ބަޔާނުގައި ވިދާޅުވެފައިވެއެވެ.
އެމްނެސްޓީ އިން ބުނީ ރާއްޖެއަކީ މަރުގެ ހުކުމް ތަންފީޒުނުކުރުމުގައި ސަރަހައްދުގެ ލީޑަރެއް ކަމަށް ފާހަގަކޮށްފައިވެއެވެ. އަދި، ދުނިޔޭގެ އެތަަށް ގައުމަކުން މަރުގެ ހުކުމް ތަންފީޒުކުރުން ހުއްޓަމުން ގެންދާއިރު، ރާއްޖެއިން ހުކުމް ތަންފީޒުކުރުމަކީ ފަހަތަށް އެޅޭ ފިޔަވަޅެއް ކަމަށްވެސް ފާހަގަކޮށްފައިވެއެވެ.
ސަރުކާރުން މަރުގެ ހުކުމް ތަންފީޒުކުރުމަށް ނިންމާފައިވާ ކަމަށް އަޑު ފެތުރިފައިވާ އިރު، ހުކުމް މިހާތަނަށް ތިން މީހަކަށް އިއްވާފައިވާ ކަމަށް ބަޔާނުގައި ބުނެފައިވެއެވެ. މަރުގެ ހުކުމް އިއްވާފައިވާ ތިން މީހުންނަކީ ހުސައިން ހުމާމް އަހްމަދު، އަހްމަދު މުއްރަތު އަދި މުހައްމަދު ނަބީލް އެވެ. މި ތިން މީހުންނަށް އިއްވާފައިވާ ހުކުމް ސުޕްރީމް ކޯޓުން ވަނީ ތާއީދުކޮށްފައެވެ.
މިހަފްތާ ނިމުމުގެ ކުރިން ރައީސުލް ޖުމްހޫރިއްޔާ ވެވަޑައިގެންފައިވާ ވައުދެއް ފުއްދަވާނޭ ކަމަށް އަޑުތައް ފެތުރިފައިވާ އިރު، މަރުގެ ހުކުމް ތަންފީޒުކުރަން ބޭނުންވާ ސާމާނު ރާއްޖެ ގެނެސްފައިވާ ކަމަށްވެސް އަޑުތައް ވަނީ ފެތުރިފައެވެ.
