އިންތިޚާބީ މާހައުލުގެ އަމާންކަން ގެއްލި، ހަމަނުޖެހުމަށް މަގުފަހިވާ ޒާތުގެ ކަންކަން ސިޔާސީ ޕާޓީތަކުންނާއި ކެންޑިޑޭޓުންނަށް ތާއީދުކުރާ ފަރާތްތަކުން ނުކުރުމަށް އިލެކްޝަންސް ކޮމިޝަނުން އިލްތިމާސްކޮށްފިއެވެ.
އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު ވިދާޅުވީ ގާނޫނުއަސާސީ އިން ލިބިދީފައިވާ ކެންޕޭން ކުރުމުގެ ހައްގަކީ ކޮންމެ ކެންޑިޑޭޓަކަށް ވެސް ކަށަވަރު ކޮށްދީފައިވާ އަސާސީ ހައްގެއް ކަމަށެވެ. އެއްވެސް ކެންޑިޑޭޓެއްގެ ކެންޕޭން ކުރުމުގެ ހައްގަށް ހުރަސްއަޅައި ފުރައްސާރަ ކުރުމަކީ، އިންތިޚާބީ ކުށެއް ކަމަށް ހަބީބު ވިދާޅުވިއެވެ.
ހަބީބު ވިދާޅުވީ ރިޔާސީ އިންތިހާބުގެ ދެވަނަބުރު ބޭއްވުމަށް މަދު ދުވަސްކޮޅަކަށް ވެފައިވާ ކަމަށެވެ. އަދި އިންތިޚާބީ މާހައުލުގެ އަމާންކަން ގެއްލި ހަމަނުޖެހުމަށް މަގުފަހިވާ ޒާތުގެ ކަންކަން ސިޔާސީ ޕާޓީތަކުންނާއި ކެންޑިޑޭޓުންނަށް ތާއީދުކުރާ ފަރާތްތަކުން ނުކުރުމަށް ހަބީބު ވަނީ އިލްތިމާސްކުރައްވާފައެވެ.
އިންތިޚާބުގެ ދެވަނަ ބުރު މިމަހުގެ 30 ވަނަ ދުވަހު ބާއްވަން ނިންމާފައިވާއިރު، މާލޭގެ އިތުރުން އަތޮޅުތެރޭގައި ހަމަނުޖެހުމަށް މަގުފަހިވާ ޒާތުގެ ކަންކަން ދަނީ ހިނގަމުންނެވެ. ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އަނބިކަނބަލުން ފަޒްނާ އަހުމަދު، އާދިއްތަ ދުވަހު ހިޔާ ޓަވަރުތަކުގައި "ދޮރުން ދޮރަށް" ހަރަކާތް ހިންގަވަމުން ދަނިކޮށް، ދެ ފިރިހެނަކު އެކަމަނާއަށް ފުރައްސާރަކޮށް ހަޑިހުތުރު އެއްޗެހި ކިޔައި މަސައްކަތަށް ހުރަސްއެޅުމަށް މަސައްކަތްކޮށްފައިވެއެވެ.
މިމައްސަލައާ ގުޅިގެން މީހަކު ފުލުހުންގެ ބެލުމުގެ ދަށަށް ގެންގޮސްފައިވެއެވެ. އަދި އާދިއްތަ ދުވަހު އެމީހާ ވަނީ ދޫކޮށްލާފައެވެ.
