ދެ ދުވަހުގެ ތެރޭގައި ރީ ރަޖިސްޓްރީ ކުރަން 25،000 އަށްވުރެ ގިނަ ފޯމު ހުށަހަޅައިފި
އޮންލައިންކޮށް 18،349 ފޯމު ހުށަހެޅި
2023 ރިޔާސީ އިންތިޚާބުގެ ފުރަތަމަ ބުރުގެ ވޯޓުލުމުގެ ތެރެއިން
މި މަހު ބާއްވާ ރިޔާސީ އިންތިޚާބުގެ ދެވަނަ ބުރުގައި ވޯޓުލުމަށް ރީ ރަޖިސްޓްރީވުމަށް ހުޅުވާލި ފުރުސަތުގައި ދެ ދުވަހުގެ ތެރޭގައި 25،000 އަށްވުރެ ގިނަ ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.
އީސީގެ ނާއިބު ރައީސް އިސްމާއީލް ހަބީބު އާދީއްތަ ދުވަހުގެ ހެނދުނު ކުރެއްވި ޓްވީޓެއްގައި ވިދާޅުވީ ދެވަނަ ބުރުގައި ރީ ރަޖިސްޓްރީވުމަށް ހުޅުވާލި ފުރުސަތުގައި ދެ ދުވަހުގެ ތެރޭގައި ޖުމްލަ 25،493 މީހުން ފޯމު ހުށަހަޅާފައިވާ ކަމަށެވެ. އެގޮތުން، ހުކުރު ދުވަހު 9،206 ފޯމު ހުށަހަޅާފައިވާއިރު ހޮނިހިރު ދުވަހު 16،287 ފޯމު ހުށަހެޅި ކަމަށް އޭނާ ވިދާޅުވިއެވެ.
ހަބީބު ވިދާޅުވި ގޮތުގައި މިހާތަނަށް ރީ ރަޖިސްޓްރީވުމަށް އީސީއަށް ހުށަހެޅި ފޯމުތަކުގެ ތެރެއިން 18،349 ފޯމު ހުށަހަޅާފައިވަނީ އޮންލައިންކޮށް ކަމަށެވެ. އެގޮތުން ހުކުރު ދުވަހު 7،267 ފޯމު އޮންލައިންކޮށް ހުށަހަޅާފައިވާއިރު ހޮނިހިރު ދުވަހު 11،082 ފޯމު ހުށަހެޅި ކަމަށް ވިދާޅުވިއެވެ.
މީގެ އިތުރުން ފޯމު ހުށަހެޅި ފަރާތްތަކުގެ ތެރެއިން 10،271 މީހުން ރީ ރަޖިސްޓްރީ ކުރެވިފައިވާއިރު އެކި ސަބަބުތަކާހުރެ 1546 ފޯމު ރިޖެކްޓް ކޮށްފައިވާ ކަމަށް ވެސް ހަބީބު ވަނީ ވިދާޅުވެފައެވެ. ފޯމުތައް އީސީން ރިޖެކްޓް ކުރަނީ ހުށަހަޅަންޖެހޭ ހުރިހާ މައުލޫމާތު ފުރިހަމަނުވުމުންނެވެ.
އޮންލައިންކޮށް ހުށަހަޅާފައިވާ ފޯމުތަކުން، ޕެންޑިންގ ކަމަށް ދައްކަނީ އެ ފޯމުތަކުގެ ވެރިފިކޭޝަން މަރުހަލާ މުޅިން ނުނިމޭތީކަން ފާހަގަކުރައްވައި ހަބީބު ވިދާޅުވީ ފޯމުތަކުގެ ސައްހަކަން ކަށަވަރުވިހާ އަވަހަކަށް، ރީ-ރަޖިސްޓަރީ ކުރެވުނުކަމުގެ މެސެޖް ލިބިގެންދާނެ ކަމަށެވެ.
ރިޔާސީ އިންތިޚާބުގެ ދެވަނަ ބުރުގައި ރީ ރަޖިސްޓްރީވުމުގެ ފުރުސަތު އީސީން ހުޅުވާލާފައިވަނީ ތިން ދުވަހުގެ މުއްދަތަކަށެވެ. އެގޮތުން ހުކުރު ދުވަހުގެ މެންދުރު 3:00 އިން ފެށިގެން މިއަދު ހަވީރު 4:00 އާ ހަމައާ މި ފުރުސަތު ވަނީ ހުޅުވާލާފައެވެ. ސުންގަޑީގެ ކުރިން ފޯމު ހުށަނާޅައިފިނަމަ ދެން އެފުރުސަތު ލިބުމަކީ ނާދިރު ކަމެއް ކަމަށް ވެސް ހަބީބު ވިދާޅުވިއެވެ. އެހެންވެ، ކޮންމެ މީހަކުވެސް އެ މީހަކު ވޯޓުލާން ރަޖިސްޓްރީވެފައިވާތަން ޗެކް ކުރުމަށް އޭނާ އިލްތިމާސްކުރެއްވިއެވެ.
ދެވަނަ ބުރުގައި ރީ ރަޖިސްޓްރީ ކުރަން ޖެހޭނީ ފުރަތަމަ ބުރުގައި ވޯޓުލީތަން ނޫން އެހެން ތަނެއްގައި ވޯޓުލާ ފަރާތްތަކެވެ.
އީސީން ވަނީ މި އިންތިޚާބުގައި ވޯޓުލާން ރީ ރަޖިސްޓްރީ ކުރަން ބޭނުންވާ ފަރާތްތަކަށް ފަސޭހަކަމާއެކު ރަޖިސްޓްރީ ކުރެވޭ ގޮތަށް ޕޯޓަލެއް ހަދައިފައެވެ. މި ޕޯޓަލުގެ އިތުރުން މާލެ ފިޔަވައި މީހުން ދިރިއުޅޭ އެހެން ހުރިހާ ރަށަކުން އެރަށެއްގެ ކައުންސިލް އިދާރާއިންނާއި އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުންނާއި ކުޅުދުއްފުށި ސިޓީގެ ކައުންސިލް އިދާރާއަށް ވެސް ފޯމު ހުށަހެޅޭނެއެވެ. މާލޭގައިނަމަ ފޯމު ހުށަހަޅަން ޖެހޭނީ ދަރުބާރު ގޭގައި ގާއިމުކޮށްފައިވާ އިންތިޚާބާ ބެހޭ މަރުކަޒަށެވެ.
ރީ ރަޖިސްޓަރީވުމަށް އެދޭ ފޯމު އީސީގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެއެވެ. ޕޯޓަލް މެދުވެރިކޮށް އޮންލައިންކޮށް ފޯމު ހުށަހަޅާއިރު، ރަޖިސްޓަރީވުމަށް އެދޭ މީހާގެ ވޯޓުލުމަށް ބޭނުންކުރެވޭ ކާކުކަން އަންގައިދޭ، ރަސްމީ ލިޔުމެއްގެ ކޮޕީއެއް ހުށަހެޅުމަށާއި ޕޯޓަލްގެ ފޯމުގައިވާ ހުރިހާ މައުލޫމާތެއް ފުރިހަމަ ކުރުމަށް އީސީން ހަދާންކޮށްދެއެވެ.
މި މަހުގެ ނުވަ ވަނަ ދުވަހު ބޭއްވި ރިޔާސީ އިންތިޚާބުގެ ފުރަތަމަ ބުރުގައި ވޯޓުލުމުގެ ޙައްޤު 282,395 މީހުންނަށް ލިބުނުއިރު ދެވަނަ ބުރުގައި އަލަށް ވޯޓުލެވޭ 408 މީހުންނާއެކު ޖުމްލަ 282,803 މީހުންނަށް ވޯޓުލުމުގެ ޙައްގު ލިބިގެންވެއެވެ.
