މިހާތަނަށް ރީ-ރެޖިސްޓްރޭޝަނަށް އިލެކްޝަންސް ކޮމިޝަނަށް 9 ހާހަށްވުރެން ގިނަ ފޯމް ހުށަހަޅާފައިވާ ކަމަށް އެ ކޮމިޝަންގެ ނައިބުރައީސް އިސްމާއިލް ހަބީބު ވިދާޅުވެއްޖެއެވެ.

ހަބީބު ހޮނިހިރު ދުވަހު ކުރެއްވި ޓުވީޓެއްގައި ވިދާޅުވީ ރިޔާސީ އިންތިހާބު 2023 ގެ ދެވަނަ ބުރުގެ ރީ-ރަޖިސްޓްރޭޝަންގެ ދެވަނަ ދުވަސް ހުކުރުދުވަހު 9 ހާހަށް ވުރެ ގިނަ ފޯމު އިލެކްޝަންސް ކޮމިޝަނަށް ލިބުނުއިރު އޮންލައިންކޮށް 7 ހާހަށްވުރެ ގިނަ ފޯމު ހުށަހަޅާފައިވާ ކަމަށެވެ.

ރިޔާސީ އިންތިޚާބު 2023ގެ ދެވަނަބުރަށް ރީ-ރެޖިސްޓަރ ކުރުމަށް ގިނަ އަދަދެއްގެ ފޯމު ހުށަހަޅަމުންދާއިރު، އެ ފޯމުތަކުގެ ސައްހަކަން ކަށަވަރު ކުރުމުގެ ގޮތުން އީސީން ގުޅަމުންދާނެ ކަމަށް ވެސް ވަނީ ބުނެފައެވެ.

އީސީން ބުނީ އިލެކްޝަންސް ކޮމިޝަނުގެ ފޯނު ނަންބަރަކުން، ފޯމު ހުށަހަޅާ ފަރާތްތަކަށް ގުޅާނެކަމަށެވެ.

އަދި ސައްހަނޫން ފޯމެއް ހުށަހަޅައިފިނަމަ، އެ ފޯމެއް ހުށަހެޅި ފަރާތަކާމެދު ފިޔަވަޅު އަޅަން އިލެކްޝަންސް ކޮމިޝަނުން ނިންމާފައި ވާކަމަށްވެސް އީސީން ބުނެއެވެ. އިލެކްޝަންސް ކޮމިޝަނުން އެދެނީ، އެއްވެސް މީހެއްގެ ވޯޓުލުމުގެ ހައްގަށް އެއްވެސް ފަރާތަކުން ހުރަސްނޭޅުމަށް ކަމަށްވެސް އެކޮމިޝަނުން ބުނެއެވެ.

އީސީން މިގޮތަށް ބުނެފައިމިވަނީ ސެޕްޓެމްބަރ މަހުގެ 30 ވަނަ ދުވަހު އޮންނަ ރިޔާސީ އިންތިޚާބުގެ ދެވަނަ ބުރަށް ރީ-ރެޖިސްޓަރ ކުރުމުގެ ފުރުސަތު ހުޅުވާލާފައިވަނިކޮށެވެ. އެފުރުސަތު ހުޅުވާލާފައިވަނީ އާދިއްތަ ދުވަހުގެ ހަވީރު 4:00ގެ ނިޔަލަށެވެ.

އީސީން ވަނީ މި އިންތިޚާބުގައި ވޯޓުލާން ރީ-ރެޖިސްޓަރ ކުރަން ބޭނުންވާ ފަރާތްތަކަށް ފަސޭހަކަމާއެކު ރަޖިސްޓްރީ ކުރެވޭ ގޮތަށް ޕޯޓަލެއް ހަދާފައެވެ. މި ޕޯޓަލުގެ އިތުރުން މާލެ ފިޔަވައި މީހުން ދިރިއުޅޭ އެހެން ހުރިހާ ރަށަކުން އެރަށެއްގެ ކައުންސިލް އިދާރާއިންނާއި، އައްޑޫ ސިޓީ އަދި ފުވައްމުލައް ސިޓީގެ އަވަށްތަކުގެ އޮފީސްތަކުންނާއި، ކުޅުދުއްފުށި ސިޓީގެ ކައުންސިލް އިދާރާއަށްވެސް ފޯމު ހުށަހެޅޭނެއެވެ. މާލޭގައިނަމަ ފޯމު ހުށަހަޅަން ޖެހޭނީ ދަރުބާރުގޭގައި ގާއިމުކޮށްފައިވާ، އިންތިޚާބާބެހޭ މަރުކަޒަށެވެ.

ރީ-ރެޖިސްޓަރވުމަށް އެދޭ ފޯމު، އީސީގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެއެވެ. ޕޯޓަލް މެދުވެރިކޮށް އޮންލައިންކޮށް ފޯމު ހުށަހަޅާއިރު، ރަޖިސްޓަރީވުމަށް އެދޭ މީހާގެ ވޯޓުލުމަށް ބޭނުންކުރެވޭ ކާކުކަން އަންގައިދޭ، ރަސްމީ ލިޔުމެއްގެ ކޮޕީއެއް ހުށަހެޅުމަށާއި ޕޯޓަލްގެ ފޯމުގައިވާ ހުރިހާ މައުލޫމާތެއް ފުރިހަމަ ކުރުމަށް އީސީން ހަދާންކޮށްދެއެވެ.

ރިޔާސީ އިންތިޚާބުގެ ފުރަތަމަ ބުރުގައި ވޯޓުލުމުގެ ހައްގު 282,395 މީހުންނަށް ލިބުނުއިރު، ދެވަނަ ބުރުގައި އަލަށް ވޯޓުލެވޭ 408 މީހުންނާއެކު ޖުމްލަ 282,803 މީހުންނަށް ވޯޓުލެވޭނެއެވެ.