ސްޕޭނުގެ ގައުމީ އަންހެން ފުޓްބޯޅަ ކުޅުންތެރިން އިތުރު ޑިމާންޑްތަކަކާއެކު އިހުތިޖާޖު ދިގުދަންމާލަން ނިންމައިފިއެވެ.

ސްޕޭން ކުޅުންތެރިން މީގެ ކުރިން ޑިމާންޑްކުރަމުން ދިޔައީ ފުޓްބޯޅަ ފެޑަރޭޝަނުގެ ރައީސް ލުއިސް ރުބިއަލެސް އިސްތިއުފާދިނުމަށެވެ. އެއީ ވޯލްޑްކަޕް ނިންމުމުގެ ރަސްމިއްޔާތުގައި، އަންހެން ކުޅުންތެރިއެއް ކަމަށްވާ ހާމޯސޯގެ ތުންފަތަށް ބޮސްދިން މައްސަލާގައެވެ. މައްސަލަގަނޑަކަށްފަހު އޭނާ އިސްތިއުފާދިންއިރު ކޯޗު ޖޯޖް ވިލްދާވެސް ވަނީ މަގާމުން ވަކިކޮށްފައެވެ. އެއީ މުބާރާޓުގެ ކުރިންވެސް ބައެއް ކުޅުންތެރންނަށް ޖިންސ ފުރައްސާރަކުރި ކަމުގެ ތުހުމަތު ކޯޗުގެ ބޮލުގައި އެޅިފައި އޮތުމުންނެވެ.

ކުޅުންތެރިން މިހާރު ޑިމާންޑްކުރަނީ ފަސް ކަމަކަށެވެ. އެއީ:

1. ސްޕޭނުގެ ފުޓްބޯޅަ ފެޑަރޭޝަނުގެ އޮނިގަނޑު އަލުން އެކުލަވާލުން

2. ރުބިއަލެސް އިސްތިއުފާދިނުމުން، ވަގުތީގޮތުން ހަވާލުވެހުރި ރައީސް އިސްތިއުފާދިނުން

3. އަންހެނުންގެ ފުޓްބޯޅައަށް ވަކި އިދާރާއެއް ހަމަޖެއްސުން. ވަކި ޖެނެރަލް ސެކްރެޓަރީއަކާއި ޕްރެޒިޑެންޝަލް ކެބިނެޓެއް ހަމަޖެއްސުން

4. އައު މީޑިއާ ޑިޕާޓްމަންޓެއް އުފެއްދުން

5. ކުޅުންތެރންގެ ކަރާމާތް ހިފެހެއްޓުމަށް އައު ވިސްނުންތަކެއް ހުށަހެޅުން

ސްޕޭނުގެ ފުޓްބޯޅަ ފެޑަރޭޝަނުން ބުނީ ކަންކަން ސުލްހަވެރިކަމާއެކު ހަމަޖެއްސުމަށް ވަރަށް ބޮޑަށް މަސައްކަތްކުރަމުން ދާކަމަށެވެ. ކުޅުންތެރިން ތިބީ މިކަންކަން ހަމަނުޖައްސަނީސް އަލުން ގައުމީ ޓީމަށް ނުދާން ނިންމައިގެންނެވެ ވޯލްޑްކަޕް ކާމިޔާބުކުރި ސްކޮޑުގެ 23 ކުޅުންތެރިންގެ ތެރެއިން 21 ކުޅުންތެރިން ވަނީ އިހުތިޖާޖު ބަޔާނުގައި ސޮއިކޮށްފައެވެ.

ރުބިއަލެސްގެ މައްސަލަ ސްޕޭނުގެ ކޯޓުންނާއ ފީފާއިން ދަނީ ބަލަމުންނެވެ. އިއްޔެ އޮތް ކޯޓު އަޑުއެހުމުގައި ރުބިއަލެސްއަށް ވަނީ ހާމޯސޯއާ 500 މީޓަރަށް ގާތްނުވުމަށް އަމުރުކޮށްފައެވެ. ނަހަމަގޮތެއްގައި ހާމޯސޯއަށް ބޮސްދިންކަމަށް ސާބިތުވެއްޖެނަމަ އޭނާއަށް ޖޫރިމަނާއެއް، ނުވަތަ 1 އަހަރާ 4 އަހަރާ ދެމެދުގެ ޖަލު ހުކުމެއް އަންނާނެއެވެ. މީގެ އިތުރުން މި މައްސަލާގައި ފީފާއިން ވަނީ އޭނާ ވަގުތީގޮތުން 90 ދުވަހަށް ސަސްޕެންޑްކޮށްފައެވެ.