ދުބާއީގެ މި ކެފޭގައި ބޯފެން ނޫން އެއްޗެއް ނެތް!

ފަތުރުވެރިންނާއި މެހެމާނުންގެ މެދުގައި ފަނޑުވުމެއް ނެތި އެތަނެއްގެ ނަން ވިދާ ބަބުޅަމުންދާ ދުބާއީގައި ފިނި ބުއިންތައް ވިއްކަމުން ދިޔަ ކެފޭ ތެރެއަށް ވަދެގެން ދިޔައިރު، އެފަދަ އެހެން ތަންތަނާ މާ ބޮޑު ތަފާތު ކަމެއް ފެންނާކަށް ނެތެވެ. ކަމަށް ޚާއްޞަކޮށްފައި ވާ ދަޅުބުރިބުރި ޒާތުގެ ޝޭކަރތައް އެކި ގޮތްގޮތަށް ހެލުވުމަށް ފަހު، އެކި ޒާތްޒާތުގެ މޭވާތަކާއެކު ތަށިތައްޓަށް އަޅާ، ކަސްޓަމަރުންނަށް ޚިދުމަތް ދިނުމުގައި މުވައްޒަފުން އަވަދިނެތި އުޅެމުން ދިޔައެވެ. ތަނާ މެދު ދެކެމުން ދިޔަ ގޮތް ބަދަލު ކޮށްލަނީ، މެނޫ އަތު ޖެހޭ ހިސާބުންނެވެ. ކެފޭއިން ލިބޭ ހަމަ އެކަނި އެއްޗަކީ ބޯފެނެވެ. ހުރިހާ ބުއިންތައްވެސް ބިނާ ވަނީ ބޯފެނުގެ މައްޗަށެވެ.

'އަކުއާ ބަރ ބައި ލުކޭލް'ގެ ދޮރުތައް، ކަސްޓަމަރުންނަށްޓަކައި ހުޅުވާލީ ޖޫން 5 ވަނަ ދުވަހުއެވެ. ކެފޭއިން ލިބެން ހުރި ފެނުގެ ރަހަތަކާއި ބާވަތްތަކުގެ ޢަދަދު 30 އަށް އަރައެވެ. މި ފެން ތައްޔާރު ކުރަނީ އެކަމަށް ޚާއްޞަ ފިލްޓަރު ނިޒާމެއް ބޭނުން ކޮށްގެންނެނެ. ފެނުގެ ތެރެއަށް އެކި ކަހަލަ މިނަރަލްތައްވެސް އަޅައެވެ.

'އަކުއާ ބަރ ބައި ލުކޭލް'އިން ލިބެން ހުރި ފެނުގެ ބާވަތްތަކަށް ބަލާއިރު "ސަރކިޓްސް"އަކީ ފާހަގަކޮށްލެވޭ އެއް ބާވަތެވެ. މެގްނީޒިއަމް، ކެލްސިއަމް އަދި ސަލްފޭޓް މާއްދާތަކުން މުއްސަނދިކޮށްފައި ވާ މި ފެނަކީ، ކަސްރަތު ކުރުމުގައި ބުރަކޮށް އުޅުމަށްފަހު ކަރު ހިއްކުން ފިލުވާލުމަށް ބޯން އެންމެ ރަނގަޅު ފެން ކަމަށް ބުނެވެއެވެ.

ދުބާއީގެ ރަށްވެއްސެއް ކަމަށް ވާ ޖަމާލް ޝާރް ފާހަގަ ކުރި ގޮތުގައި، 'އަކުއާ ބަރ ބައި ލުކޭލް'ގެ މަޤްޞަދާ މެދު އޭނާ އުފާ ކުރެއެވެ. އެއީ އެއް ފަހަރު ބޭނުން ކުރުމަށް ފަހު އެއްލާލާ ޕްލާސްޓިކް ފުޅިފުޅީގައި ފެން ބަންދުކޮށްގެން ގެންގުޅުމުގެ ބަދަލުގައި، ފިލްޓަރު ފެނާއި، އެއް ފަހަރަށް ވުރެ ގިނަ ފަހަރު ބޭނުން ކުރެވޭ ފުޅިފުޅީގައި ފެން ބުއިމުގެ އާދަ، މީހުންގެ މެދުގައި އަށަގެންނެވޭނެތީ ކަމަށްވެސް އޭނާ ފާހަގަ ކުރިއެވެ.

އެކި ދިރާސާތަކުން ދައްކާ ގޮތުގައި އެކުވެރި ޢަރަބި ޢިމާރާތް (ޔޫއޭއީ)ގެ ރަށްވެހިންގެ ތެރެއިން ކޮންމެ މީހަކީ، އެވަރޭޖު ގޮތެއްގައި އަހަރެއްގެ މައްޗަށް، 450 އަށް ވުރެ ގިނަ ޕްލާސްޓިކް ފުޅި ބޭނުން ކުރާ މީހެކެވެ.

މޫސުމީ ނޭދެވޭ ބަދަލުތަކާ ބެހޭ އދގެ (ކޮޕް-28) ސަމިޓް ކުރިއަށް ގެންދަން ތާވަލުކޮށްފައި ވަނީވެސް ޔޫއޭއީގައެވެ. ޔޫއޭއީއިން އަމާޒު ހިފާފައިވަނީ، އެ ޤައުމުން ބޭރު ކުރާ ޖައްވު ހޫނު ކުރާ ވިހަ ގޭސްތަކުގެ މިންވަރު، 2050 ވަނަ އަހަރު އަންނައިރު 00 ރޭޓަށް ދަށް ކުރުމަށެވެ. އެ އަމާޒަށް ވާސިލު ވުމަށްޓަކައި، އެއް ފަހަރު ބޭނުން ކުރުމަށް ފަހު އެއްލާލާ ޕްލާސްޓިކް ބޭނުން ކުރުން، 2024 ވަނަ އަހަރުން ފަށައިގެން ޔޫއޭއީގައި މަނާވެގެން ދާނެއެވެ.

'އަކުއާ ބަރ ބައި ލުކޭލް' އިން ތަފާތު އަގުތަކުގައި ބޯފެން ލިބެން ހުރެއެވެ. އަމިއްލައަށް ގެންދާ ފެންފުޅި ފުރާލުމަށް ޚަރުދު ކުރަން ޖެހެނީ އެންމެ ޑޮލަރެއްގެ މިންވަރެވެ. ނުވަތަ ކެފޭއިން ލިބޭ ތަފާތު ކޮކްޓޭލްތަކުގެ ފެން ބޭނުން ނަމަ، ބައެއް އުފެއްދުންތަކުގެ އަގު 9 ޑޮލަރަށްވެސް އަރައެވެ.

'އަކުއާ ބަރ ބައި ލުކޭލް' އަމާޒު ހިފާފައި ވަނީ ވިޔަފާރި އިތުރަށް ފުޅާކޮށް، ފުޅިފުޅީގައި ބަންދު ކޮށްފައި ހުންނަ ފެން ބޭނުން ކުރުމުގެ އާދަ މުޅިން ހުއްޓުވާލުމަށެވެ.