މަސްތުވާތަކެތީގެ މައްސަލަ ހައްލުކުރަން މި ސަރުކާރުން ގެންގުޅެނީ ކުލުނުވެރި އެޕްރޯޗެއް: ރައީސް އޮފީސް
އަމާޒަކީ މަސްތުވާތަކެއްޗަށް ހުށަހެޅޭ މީހުންނަކީ އަނބުރާ މުޖުތަމައަށް އަންނައިރު ގަދަރުވެރިކަމާއެކު ދިރިއުޅެވޭނެ މަގުފަހިވެފައިވާ ބަޔަކަށް ހެދުން
ޑރ. އައިޝަތު ޝަފީނާ ރާއްޖެޓީވީގެ ފަލަސުރުޚީ ޕްރޮގްރާމުގައި
ރާއްޖޭގައި ޒަމާނުއްސުރެ ހައްލުނުވެ އޮތް އެއް މައްސަލަ ކަމަށްވާ މަސްތުވާތަކެތީގެ މައްސަލަ ހައްލު ކުރުމަށް މި ސަރުކާރުން ގެންގުޅެނީ ކުލުނުވެރި އެޕްރޯޗެއް ކަމަށް ރައީސް އޮފީހުގެ ސީނިއަރ ސޯޝަލް ޕޮލިސީ އެނަލިސްޓް ޑރ. އައިޝަތު ޝަފީނާ ވިދާޅުވެއްޖެއެވެ.
"ރާއްޖެ ޓީވީ" ގެ ފަލަސުރުޚީ ޕްރޮގްރާމުގައި ޑރ. ޝަފީނާ ވިދާޅުވީ މި ސަރުކާރު އައުމަށްފަހު މަސްތުވާތަކެތީގެ މައްސަލަ ހައްލު ކުރުމަށްފަހު ތަފާތު އެޕްރޯޗެއް ބޭނުން ކުރަމުން އަންނަ ކަމަށެވެ. އެގޮތުން، މަސްތުވާތަކެއްޗަށް ހުށަހެޅޭ މީހުން ފަރުވާ ހޯދަން ބޭނުންވާއިރު އެ މީހަކު ހުރި ހިސާބަކުން އެ ފަރުވާ ލިބެން ޖެހޭ ކަމަށާއި އެކަން ކަށަވަރު ކުރުމަށް މަސައްކަތް ކުރާ ކަމަށް އޭނާ ވިދާޅުވިއެވެ. މި ސަރުކާރުން ހަތަރު ރިހެބިލިޓޭޝަން ސެންޓަރެއް ގާއިމުކޮށްފައިވާއިރު އަންހެނުންނަށް ހާއްސަ ރިހެބިލިޓޭޝަން ސެންޓަރަކާއި ސިއްހީ ނިޒާމުގެ ތެރެއިން އެހީތެރިކަން ފޯރުކޮށްދިނުމާއި ޕްރިޒަން ރިހެބިލިޓޭޝަން ޕްރޮގްރާމެއް ހިންގަމުން އަންނަކަން ވެސް އޭނާ ފާހަގަކުރެއްވިއެވެ.
ޑރ. ޝަފީނާ ވިދާޅުވީ މި ސަރުކާރުގެ އަމާޒަކީ މަސްތުވާތަކެއްޗަށް ހުށަހެޅޭ މީހުންނަކީ އަނބުރާ މުޖުތަމައަށް އަންނައިރު ގަދަރުވެރިކަމާއެކު ދިރިއުޅެވޭނެ މަގުފަހިވެފައިވާ ބަޔަކަށް ހެދުން ކަމަށެވެ. މިކަމަށް ގިނަ ކަންކަން ކުރަން ޖެހޭ ކަމަށާއި މަސްތުވާތަކެއްޗަށް ޖުމްލަ ހައްލެއް ހޯދަން ޅައުމުރުގައި ކުށުގެ ވެއްޓަށް ހުށަހެޅިދާނެ ސަބަބުތައް ނައްތާލުން މުހިންމު ކަމަށް ވިދާޅުވިއެވެ. އެގޮތުން، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުގެ މެނިފެސްޓޯގައި މިކަން ހައްލު ކުރުމަށް ކްރައިމް ޕްރިވެންޝަން ކައުންސިލެއް އުފެއްދުމަށް ހުށަހަޅާފައިވާކަން ވެސް ފާހަގަކުރެއްވިއެވެ.
މީގެ އިތުރުން ޕޮލިސީތައް ވަރުގަދަކޮށް، ކުށުގެ ވެއްޓަށް ފާރަވެރިވުމުގައި ޒަމާނީ ޓެކްނޮލޮޖީ ބޭނުންކުރަން ޖެހޭކަމަށް ވެސް ޑރ. ޝަފީނާ ވިދާޅުވިއެވެ.
ޑރ. ޝަފީނާ އިތުރަށް ވިދާޅުވީ މަސްތުވާތަކެއްޗަށް ހުށަހެޅޭ ފަރާތްތަކަށް ކުށަށް ޒިންމާ ނެގުމާއެކު ފަރުވާ ފޯރުކޮށްދޭން ޖެހޭ ކަމަށެވެ. އެގޮތުން، އެފަދަ ފަރާތްތައް ފަރުވާއަށްފަހު އަނބުރާ މުޖުތަމައަށް އަންނައިރު މުޖުތަމައު ވެސް އެ މީހާ ބަލައިގަންނަ ވަރުގެ މީހަކަށް ވާން ޖެހޭ ކަމަށް ވިދާޅުވިއެވެ.
ރިލެޕްސްވުން ނުވަތަ ފަރުވާއަށްފަހު ވެސް މަސްތުވާތަކެއްޗަށް ހުށަހެޅޭ ފަރާތްތައް ތިބިކަން ފާހަގަކުރައްވައި ޑރ. ޝަފީނާ ވިދާޅުވީ އެކަން މަދުކުރެވޭނީ ވަށައިޖެހޭ ރިހެބިލިޓޭޝަން ނިޒާމެއް ގާއިމުކޮށްގެން ކަމަށެވެ. މިކަމަށް ހެލްތު ސެންޓަރުތައް މެދުވެރިކޮށް ދޭ ފަރުވާތައް ފުޅާކުރުމާއި ޕްރައިވެޓް ސެކްޓަރަށް ރިހެބިލިޓޭޝަން ސެންޓަރުތައް ހިންގަން ހުޅުވާލުމާއި ރާއްޖޭގެ ތިން ސަރަހައްދެއްގައި ރިކަވަރީ ވިލެޖު ގާއިމް ކުރުމަށް ހުށަހަޅާފައިވާނެ ކަމަށް އޭނާ ވިދާޅުވިއެވެ. ރިކަވަރީ ވިލެޖު ވެގެންދާނީ ދިގު މުއްދަތަކަށް ފަރުވާ ހޯދާ ފަރާތްތަކަށް ތައުލީމާއި ތަމްރީން ޕްރޮގްރާމުތަކާއެކު ފަރުވާ ފޯރުކޮށްދޭ ތަނަކަށް ކަމުގައި ވެސް ޑރ. ޝަފީނާ ވިދާޅުވިއެވެ.
