ރައީސްގެ ވައުދާއި އެއްގޮތަށް، ޝަންގްރިލާގެ ހިއްސާ ދޫކޮށްލުމުގެ އެއްބަސްވުމުގައި ސަރުކާރުން ސޮއިކޮށްފި
އެ ރިސޯޓުގައި ދިވެހި ސަރުކާރުގެ 30 ޕަސަންޓު އޮވޭ
އައްޑޫ ސިޓީގެ ޝަންގްރިލާ ރިސޯޓުގައި އޮތް ސަރުކާރުގެ ހިއްސާ ދޫކޮށްލުމުގެ އެއްބަސްވުމުގައި ސަރުކާރުން ސޮއިކޮށްފި
އައްޑޫ ސިޓީގެ ޝަންގްރިލާ ރިސޯޓުގައި އޮތް ސަރުކާރުގެ ހިއްސާ ދޫކޮށްލުމުގެ އެއްބަސްވުމުގައި ސަރުކާރުން ސޮއިކޮށްފިއެވެ.
ހޯމަ ދުވަހު އެ އެއްބަސްވުމުގައި ސޮއިކޮށްފައި ވާއިރު ރައީސް ވަނީ އެތަނުގެ ހިއްސާ ދޫކޮށްލުމަށް ގެންނަން ޖެހޭ ޤާނޫނީ ބަދަލު ގެނެސްފައިވާ ކަމަށް މީގެ ކުރިން ވިދާޅުވެފައެވެ. އަދި ޝަންގްރިއްލާ ހިންގުމަށް ދިމާވެފައިވާ ހުރަސްތައް ނައްތަލާވެއްލުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް ރައީސް ވަނީ ވިދާޅުވެފައެވެ. އެގޮތުން އެ ރިސޯޓުގައި އޮތް ސަރުކާރު ހިއްސާ ދޫކޮށްލައި، މިދިޔަ މާޗް މަހުގެ 18 ވަނަ ދުވަހު ހިއްސާ ބަދަލުކުރިކަމުގެ ލިޔުން ހަވާލުކޮށްފައި ވާނެކަމަށާއި އެއާއެކު ޝަންގްރިއްލާ އަލުން ހިންގަން ފެށޭނެކަމަށް ރައީސް ވިދާޅުވިއެވެ.
ޝަންގްރިލާގެ 30 ޕަސެންޓް ހިއްސާ ސަރުކާރުގައި އޮތް އިރު ބާކީ ހިއްސާ އޮތީ އައްޑޫ އިންވެސްޓްމެންޓް ޕްރައިވެޓް ލިމިޓެޑުގައެވެ. އެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ޓޫރިޒަމް މިނިސްޓްރީގެ ޕާމަނަންޓް ސެކްރެޓަރީ ފާތިމަތު ނިލްފާއެވެ. އަދި އައްޑޫ އިންވެސްޓްމެންޓް ޕްރައިވެޓް ލިމިޓެޑްގެ ފަރާތުން އެ އެއްބަސްވުމުގައި ސޮއިކުރެއްވީ އެ ކުންފުނީގެ ޖެނެރަލް އެފެއާޒް ޑިރެކްޓަރު ސައުދު އަބްދުﷲއެވެ.
އެކަމާއި ގުޅޭގޮތުން ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ، ޝަންގްރިއްލާ އަލުން އޮޕަރޭޝަނަށް ގެނައުމަށްޓަކައި އޮތް އެންމެ ބޮޑު ހުރަސް މިހާރު ނައްތާލެވިފައިވާ ކަމަށެވެ. އަދި މިކަމުގެ ސަބަބުން ޝަންގްރިލާ އިން ކުރަންޖެހޭ ކަންކަމަށް ވަރަށް ބޮޑަށް ފަސޭހަވެގެންދާނެ ކަމަށާ ޝަންގްރިއްލާ ހިންގުމަށް ބޭނުންވާ އިދާރީ އެއްބާރުލުން ފުރިހަމައަށް ދޭނެ ކަމަށް ވެސް ވިދާޅުވިއެވެ.
އެކަމާއި ގުޅޭގޮތުން ވާހަކަދައްކަވަމުން ޝަންގްރިލާގެ ރާއްޖޭގެ ޖެނެރަލް މެނޭޖަރު ބްރައިސް ލުނޯ ވިދާޅުވީ މިއީ އާ ފެށުމެއް ކަމަށެވެ. އަދި ޝަންރިއްލާ ހުޅުވަން ޕާޓްނަރުން ހޯދުމުގެ މަސައްކަތް ވެސް ކުރަމުންދާ ކަމަށް އޭނާ ވިދާޅުވިއެވެ.
