ޝަންގްރިއްލާ ހިންގަން ހުރި ހުރިހާ ހުރަހެއް ނައްތާލުމަށް އަޅުގަނޑު މިހުރީ ތައްޔާރަށް - ރައީސް

އައްޑޫ ސިޓީގެ ޝަންގްރިއްލާ ރިސޯޓް ހިންގަން ހުރި ހުރިހައި ހުރަހެއް ނައްތަވައިލެއްވުމަށް އެމަނިކުފާނު އެ ހުންނެވީ ތައްޔާރަށް ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

އައްޑޫ ސިޓީގެ ބިން ހިއްކުމުގެ މަޝްރޫއު ރަސްމީކޮށް ފައްޓަވައިދެއްވައި ވާހަކަފުޅުދައްކަވަމުން ރައީސް ވިދާޅުވީ، އައްޑޫ ސިޓީގެ ޝަންގްރިއްލާ ހިންގަން ހުރި ހުރިހައި ހުރަހެއް ނައްތަވައިލެއްވުމަށް އެމަނިކުފާނު ހުންނެވީ ތައްޔާރަށް ކަމަށާއި، އެ ރިސޯޓުގައި އޮތް ސަރުކާރު ހިއްސާ ދޫކޮށްލައި، މިދިޔަ މާޗް މަހުގެ 18 ވަނަ ދުވަހު ހިއްސާ ބަދަލުކުރިކަމުގެ ލިޔުން ހަވާލުކޮށްފައި ވާނެކަމަށެވެ. އަދި އެއާއެކު ޝަންގްރިއްލާ އަލުން ހިންގަން ފެށޭނެކަމަށެވެ.

ރައީސް ވިދާޅުވީ ހަންކެޑެ މަޝްރޫއަކީ އިންޓަގްރޭޓެޑް ރިސޯޓް، ހޮޓާ، ގެސްޓް ހައުސް, އަދި ވޯޓަރ ވިލާ ހިމެނޭހެން، ވަށައިޖެހޭ މަސައްކަތެއް ކަމަށެވެ. މިހާރު އެ މަސައްކަތް ވަނީ ފެށުމުގެ މަރުހަލާގައި ކަމަށާއި، މުޅި މަޝްރޫއު ކުރިއަށް އޮތް 2 އަހަރު ތެރޭގައި ނިންމާލެވޭނެ ކަމަށެވެ.

ރައީސް ވިދާޅުވީ ރާއްޖެއަށް ޑިމޮކްރަސީގެ ހެޔޮ ބަދަލު ހޯދުމަށް އައްޑޫގެ ރައްޔިތުން ނުކުމެވަޑައިގަތީ އައްޑޫ ސިޓީއަށް އައިސްފައިވާ ޕްރޮޖެކްޓް ހޯދުމުގެ ބޭނުމުގައި ކަމަަށެވެ. އެކަން މިއަދު އެދަނީ ހާސިލްވަމުން ކަމަށާއި، މިހާރު ހިންގަމުންދާ، މަގު ހެދުމާއި ބިން ހިއްކުމުގެ މަސައްކަތް ޑިޒައިން ވެގެން ކުރިއަށް ދަނީ ހަންކެޑެ ނިމޭއިރު އެތަނުގައި ހިމެނޭ ފުރިހަމަ ޕްލޭނާ އެއްގޮތަށްކަމަށެވެ.

ރައީސް ވިދާޅުވީ ހަންކެޑެ މަޝްރޫއުގެ ތެރެއިން އައްޑޫ ސިޓީގެ އެހެނިހެން ރަށްތަކާއެކު 2682 އެނދު އިތުރުވެގެންދާނެ ކަމަށެވެ. އަދި މިހާރު ޕްރޮޖެކްޓް ކުރެވިފައިވާ ތަފާތު މަޝްރޫއުތައް ނިމޭއިރު ޖުމްލަ 7000 ޓުއަރިސްޓް އެނދު އައްޑޫ ސިޓީގައި ހުންނާނެކަމަށް އެމަނިކުފާނު ވިދާޅުވިއެވެ.