އެއްވެސް ފަރާތަކުން ކެމްޕޭނަކަށް ހުރަސްއަޅައި، އަނިޔާވެރިކަން އިސްކުރުމަކީ ބަލައިގަނެވޭނެ ކަމެއް ނޫން: އިމްރާން
އިމްރާން މިމޭރުމުން ވިދާޅުވެފައިވަނީ، ގުރައިދޫގައި އެމްޑީޕީއާއި ޕީޕީއެމް ސަޕޯޓަރުން މެދުގައި ހަމަނުޖެހުން ހިނގުމުން
ކ. ގުރައިދޫގައި އެމްޑީޕީއާއި ޕީޕީއެމް ސަޕޯޓަރުންގެ މެދުގައި ހިނގި ހަމަނުޖެހުން
އެއްވެސް ފަރާތަކުން ތަހުޒީބު މުޖުތަމައުތަކުގައި ގެންގުޅޭ ހަމަތަކުން އެއްކިބާވެ, ކެމްޕޭނަކަށް ހުރަސްއަޅައި، އަނިޔާވެރިކަން އިސްކުރުމަކީ ބަލައިގަނެވޭނެ ކަމެއް ނޫންކަމަށް ހޯމް މިނިސްޓަރ އައްޝައިޚް އިމްރާން އަބްދުﷲ ވިދާޅުވެއްޖެއެވެ.
އިމްރާން މިމޭރުމުން ވިދާޅުވެފައި މިވަނީ އިދިކޮޅު ޕީޕީއެމް ޕީއެންސީ ކެންޑިޑޭޓް ޑރ. މުހައްމަދު މުއިއްޒު، ކެމްޕެއިން ދަތުރުފުޅެއްގައި ކ. ގުރައިދޫއަށް ވަޑައިގަތުމަށް ހަމަޖެހިފައިވަނިކޮށް އެރަށުގައި އެމްޑީޕީއާއި ޕީޕީއެމް މެމްބަރުންގެ މެދުގައި ވަރުގަދަ ހަމަނުޖެހުމެއް ހިންގާފައި ވަނިކޮށެވެ.
މި ހަމަނުޖެހުމާ ގުޅިގެން އިމްރާން ކުރެއްވި ޓްވީޓެއްގައި ވިދާޅުވީ، ކެމްޕޭނު ކުރުމުގައިވެސް އަދި ކެންޑިޑޭޓަކަށް ތާއީދުކުރާކަން ހާމަކުރުމުގައިވެސް އެއްވެސް ފަރާތަކުން ތަހުޒީބު މުޖުތަމައުތަކުގައި ގެންގުޅޭ ހަމަތަކުން އެއްކިބާވެ، ކެމްޕޭނަކަށް ހުރަސްއަޅައި، އަނިޔާވެރިކަން އިސްކުރުމަކީ ބަލައިގަނެވޭނެ ކަމެއް ނޫންކަމަށެވެ. އަދި މިފަދަ ކަންކަމުން ދުރުވެ ތިބުމަށް ގޮވާލައްވާފައި ވެއެވެ.
ގުރައިދޫގައި ހަމަނުޖެހުން ހިނގާފައިވަނީ، މުއިއްޒު ވަޑައިގަންނަވާތީ އެކަމާ ދެކޮޅަށް އަޑުއުފުލުމަށް އެމްޑީޕީއަށް ސަޕޯޓްކުރާ ބަޔަކު ނުކުތުމުންނެވެ. އެ މުޒާހަރާގެ ބައިވެރިންނާއި މުއިއްޒުއަށް މަރުހަބާ ދަންނަވަން ނުކުމެ ތިބި މީހުންނާ ދެމެދު ބަހުގެ ހަމަލާތައް ރައްދުކޮށް، އެންމެ ފަހުން ބޮޑު ހަމަނުޖެހުމަކަށް ބަދަލުވިއެވެ. ހަމަނުޖެހުމުގެ ވީޑިއޯތައް ސޯޝަލް މީޑިޔާގައި އާންމުވެފައިވާއިރު، ބަހުގެ ހަމަލާތަކަށްފަހު ވަކި ހިސާބަކުން އެއް ބަޔަކު ގަޔަށް އަތްލައި މާރާމާރީ ހިންގަން ފެށިއެވެ. އެ ތަޅާފޮޅުމުގައި، އެމްޑީޕީއާއި ޕީޕީއެމްގެ ދެ ސަޕޯޓަރެއްގެ ބޯ ފަޅާލިއެވެ.
މި ހަމަނުޖެހުމާ ގުޅޭގޮތުން ފުލުހުން ބުނެފައިވަނީ، ހަމަނުޖެހުން ކޮންޓްރޯލްކޮށް، ފުލުހުންގެ ބެލުމުގެ ދަށަށް އުމުރުން 22 އަހަރުގެ ޒުވާނަކު ގެންގޮސްފައި ވާކަމަށެވެ.
