މަޝްހޫރު ލަވަކިއުންތެރިޔާ ބްރިޓްނީ ސްޕިއާސް އާއި ފިރިމީހާ ސޭމް އަސްގަރީ ކައިވެނި ކުރިތާ 14 މަސް ފަހުން ވަރިވާން އުޅޭ ކަމަށް އެމެރިކާގެ މީޑިއާ ރިޕޯޓްތައް ބުނަން ފަށައިފިއެވެ.

މި ދެމީހުން ފުރަތަމަ ބައްދަލުވެފައިވަނީ 2016 ވަނަ އަހަރު ބްރިޓްނީ އުފެއްދި މިއުޒިކް ވީޑިއޯއެއްގެ ސެޓްގެ ތެރެއިން ކަމަށް ވެއެވެ. އެއަށް ފަހު ސެޕްޓެމްބަރު 2021ގައި އަސްގަރީ، ބްރިޓްނީ އަށް ކައިވެނި ހުށަހެޅިއެވެ. އަދި އެ ދެމީހުން ކައިވެނި ކޮށްފައިވަނީ މަދު ރަހުމަތްތެރިން ކޮޅަކާއެކު ކެލިފޯނިޔާގައި ހުންނަ ބްރިޓްނީގެ އަމިއްލަ ގޭގައި ބޭއްވި ކުޑަ ހަފްލާއެއްގައި ޖޫން 2022ގަ އެވެ.

އުމުރުން 41 އަހަރުގެ ބްރިޓްނީގެ ބައްޕަ ކުރިމަތިކުރުވި ގާނޫނީ ބޮޑެތި މައްސަލަތަކަކާ ގުޅިގެން ބްރިޓްނީ އަށް ނަފްސާނީ ގޮތުން އަސްގަރީ ވަރަށް ބޮޑަށް ހިތްވަރުދީ އެހީތެރިވެދިންކަމަށް ވެއެވެ.

މިހާރު އެމެރިކާގެ ޓެބްލޮއިޑްތަކުގައިވަނީ މި ދެމީހުންގެ ވަރީގެ ޚަބަރުތަކެވެ. ނޫސްތައް ބުނާ ގޮތުން ފުރަތަމަ ވަރިވާން ހުށަހެޅީ އަސްގަރީ އެވެ.

މި ދެމީހުން ވެސް އަދި މިކަމާބެހޭގޮތުން ސީދާ އެއްޗެއް ބުނެފައިނުވިނަމަވެސް، އުމުރުން 29 އަހަރުގެ އިރާނަށް އުފަން އެމެރިކާގެ މޮޑެލް އަދި ފިޓްނަސް ޓްރެއިނަރ ސޭމް އަސްގަރީ އަދި ބްރިޓްނީ ވެސް އެމީހުންގެ "ވެޑިންގ-ރިންގ" ނެތި ވަރަށް ފަހުން ފެނިފައިވެއެވެ.

ސޯޝަލް މީޑިއާގައި ވަރަށް ހަރަކާތްތެރި ބްރިޓްނީ ވެސް އެންމެ ފަހުން ކުރި ޕޯސްޓްގައި ވެސް ވަރީގެ ވާހަކަ ބުނެފައެއް ނުވެއެވެ. އެ ޕޯސްޓްގައި އޭނާ ދައްކާފައިވަނީ އަހެއް ގަންނަ ވާހަކައެވެ.

ބްރިޓްނީ ސްޕިއާސް ކުރިން ދެ ކައިވެންޏެއްކޮށް އެއް ކައިވެންޏަށް ދެ ކުދިން ލިބިފައިވެއެވެ. އޭނާ މިހާރު ތައްޔާރުވަމުން ދަނީ އޭނާގެ ހަޔާތުގެ ވާހަކަ، ފޮތެއްގެ ސިފައިގައި އަންނަ އޮކްޓޯބަރު މަހު ނެރުމަށެވެ.