ފާތިރު މަރާލި މައްސަލައިގައި ދައުވާ އުފުލާފައިވާ އިރުފާން ރުޝްދީގެ ފަރާތުން މައްސަލަ އަވަސްކޮށްދޭން އެދިއްޖެ
މި މައްސަލަ އަވަސް މިނެއްގައި ކުރިއަށް ގެންދިއުމަށް ދައުލަތާއި ދިފާއުންވެސް އެދިފައިވޭ
ފާތިރު މުހައްމަދު މަރާލި މައްސަލައިގައި ދައުވާ އުފުލާފައިވާ އިރުފާން ރުޝްދީ
ތޫނު އެއްޗަކުން ހަމަލާދީ މ. ސަރުމާގެ، ފާތިރު މުހައްމަދު މަރާލި މައްސަލައިގައި ދައުވާ އުފުލާފައިވާ އިރުފާން ރުޝްދީގެ މައްޗަށް ކުރާ ދައުވާގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ފާތިރުގެ މަރާ ގުޅިގެން އިރުފާން ހޯދުމަށް ފުލުހުން އެންމެ ފުރަތަމަ އިއުލާނުކުރީ 2016 ވަނަ އަހަރުގެ ޖޫން މަހުގެ ތެރޭގަ އެވެ.
އޭނާ ފެނުނީ 2019 ވަނަ އަހަރުގެ އޮކްޓޯބަރު މަހުގެ 25 ވަނަ ދުވަހުގެ ރޭ ދަންވަރު 1:00 ހާއިރު ގދ ތިނަދޫ އާއި 15 މޭލު ބޭރުން އޮޔާ ދަނިކޮށް އެމްއެންޑީއެފުން އެހީތެރިވި ލޯންޗެއްގައި ހުއްޓައެވެ.
އޭރު މަރުގެ ކޮމިޝަނުންވެސް އޮތީ އޭނާ ހޯދުމަށް އާންމުންގެ އެހީތެރިކަމަށް އެދިފައެވެ.
މި މައްސަލައިގައި އޭނާގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.
މި މައްސަލަ ކުރިން ބައްލަވަމުން ގެންދެވީ ކްރިމިނަލް ކޯޓުގެ އޭރުގެ އިސްގާޒީ އަހުމަދު ޝަކީލެވެ. ނަމަވެސް ޝަކީލު ހައިކޯޓުގެ ފަނޑިޔާރުކަމަށް އައްޔަނު ކުރައްވާފައިވާތީ މިހާރު މި މައްސަލަ ބައްލަވަނީ ގާޒީ އިބްރާހިމް ޛިހުނީއެވެ.
ގާޒީ ވަނީ މި މައްސަލަ ގޮސްފައިވާ ހިސާބު ދެފަރާތުން ސާފު ކުރައްވާފައެވެ.
މި މައްސަލައިގައި އިބްތިދާއީ މަރުޙަލާގެ ޝަރީއަތުގެ ކުރީގެ ހުށައެޅުންތައް ހުށައަޅައި، ދެން އޮތީ އެ ހުށައެޅުންތަކަށް ގޮތް ނިންމުމެވެ.
ވުމާއެކު، ގާޒީ ވަނީ އެހިސާބުން މައްސަލައިގެ އަޑުއެހުންތައް ކުރިއަށް ގެންދިއުމަށް ނިންމަވާފައެވެ. އަދި ވީހާވެސް އަވަހަށް މައްސަލައިގެ އަޑުއެހުންތައް ކުރިއަށް ގެންދިއުމަށް މަސައްކަތް ކުރައްވާނެކަމަށް ގާޒީ ވިދާޅުވިއެވެ.
މި މައްސަލަ އަވަސް މިނެއްގައި ކުރިއަށް ގެންދިއުމަށް ދައުލަތާއި ދިފާއުންވެސް އެދިފައިވެއެވެ.
މި އަޑުއެހުމުގައި ދައުވާލިބޭ އިރުފާން ބުނީ، އޭނާ މި މައްސަލައިގެ ކޮންޓިނިއަސް ހިއަރިންގ ގެ ތާވަލެއް ބޭނުންވާ ކަމަށެވެ. މި މައްސަލަ ލަސްވެފައިވާކަމުގެ ކަންބޮޑުވުން އޭނާ ވަނީ ޝަރީއަތަށް ހިއްސާކޮށްފައެވެ.
ގާޒީ ވިދާޅުވީ، ސެޕްޓެމްބަރު މަސް ތެރޭގައި މި މައްސަލައިގެ އަޑުއެހުމެއް ކުރިއަށް ގެންދަވާނެ ކަމަށެވެ. އަދި ވީހާވެސް އަވަހަށް މައްސަލަ ކުރިއަށް ގެންދަވާނެ ކަމުގެ ޔަޤީންކަން ދެއްވާކަމަށް ގާޒީ ވިދާޅުވިއެވެ.
އުމުރުން 14 އަހަރުގެ ފާތިރު މަރާލާފައިވަނީ 2016 ވަނަ އަހަރުގެ ޖޫން މަހުގެ ތިން ވަނަ ދުވަހުގެ ރޭ 9:20 ހާއިރު އެވެ. ފުލުހުން މައުލޫމާތު ދީފައިވާ ގޮތުގައި ފާތިރު މަރާލާފައިވަނީ ގްރޫޕަކުން ތޫނު އެއްޗެހި ބޭނުންކޮށްގެން ދިން ހަމަލާއެއްގަ އެވެ.
