ހުޅުމާލޭ ހޮސްޕިޓަލުގައި އިމަޖެންސީ ހާލަތުގައި ފަރުވާދެމުންދިޔަ ގައިދީއަކު ނިޔާވެއްޖެ

ހުޅުމާލޭ ޖަލުގައި ހުކުމް ތަންފީޒުކުރަމުން ދިޔަ ގައިދީއަކު ނިޔާވެއްޖެއެވެ.

މޯލްޑިވްސް ކަރެކްޝަނަލް ސަރވިސްއިން ބުނީ، ނިޔާވެފައިވަނީ ބ. ތުޅާދޫ ބޯދި އުމުރުން 55 އަހަރުގެ އިސްމާއީލް އަބޫބަކުރު ކަމަށެވެ.

އިސްމާއީލް އަބޫބަކުރުގެ މެޔަށް ތަދެއް އަރައިގެން، ހޮނިހިރު ދުވަހުގެ މެންދުރުފަހު ހުޅުމާލޭ ހޮސްޕިޓަލަށް ގެންގޮސް، ފަރުވާ ދޭންފަށާފައިވެއެވެ. އިސްމާޢީލް އަބޫބަކުރުގެ ހާލަތު އިތުރަށް ގޯސްވެ، އިމަޖެންސީއަށް ބަދަލުކޮށް، ފަރުވާ ދެމުންދިޔައެވެ. އަދި ޑޮކްޓަރު ވަނީ ގާތްގަނޑަކަށް 3:25ގައި އޭނާގެ ހިތްހުއްޓިގެން ނިޔާވިކަމަށް މައުލޫމާތު ދީފައިކަމަށް ކަރެކްޝަންސްއިން ބުނެއެވެ.

އިސްމާއީލް އަބޫބަކުރަކީ ޖިންސީ ނިޔަތެއް އޮވެގެން ކުޑަކުއްޖެއްގެ ހަށިގަނޑުގައި އަތްލުމުގެ ކުށުގައި 10 އަހަރު ދުވަހުގެ ހުކުމެއް ތަންފީޒުކުރަމުންދިޔަ ގައިދީއެކެވެ. އަދި މީނާއަކީ އެއްވެސް ބޮޑު ބައްޔަކަށް ފަރުވާ ހޯދަމުން އައި މީހެއް ނޫންކަމަށްވެސް ކަރެކްޝަންސްއިން ބުނެއެވެ.

އިސްމާއީލް އަބޫބަކުރު ނިޔާވުމާ ގުޅިގެން ކަރެކްޝަންސްއިން ވަނީ ވަގުތުން އެކަން އޭނާގެ އާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަންއަށް އަންގާފައެވެ.