ޖޫން މަހު 3.5 މިލިިއަނަށްވުރެ ގިނަ ރުފިޔާގެ ތަކެތި ހޯދައި، ވެރިފަރާތްތަކާ ހަވާލުކޮށްފި
25 ޖުލައި 2023 | އަންގާރަ 11:30މާފަންނު ޕޮލިސް ރެސްޕޯންސް އެންޑް ޕެޓްރޯލްއިން 926،160 ރުފިޔާގެ އަގުހުރި ތަކެތި ހޯދާފައިވޭ
ޝަހީދު ހުސައިން އާދަމް ބިލްޑިންގ
މާފަންނު ޕޮލިސް ސްޓޭޝަނާއި ގަލޮޅު ޕޮލިސް ސްޓޭޝަނަށް ފާއިތުވި ޖޫން މަހު ހުށަހަޅާފައިވާ އެކި މައްސަލަތަކުގައި ހިމެނޭ 3.5 މިލިއަނަށްވުރެ ގިނަ ރުފިޔާގެ އަގުހުރި ތަކެތި ހޯދައި, އޭގެ ވެރިފަރާތްތަކާ ހަވާލުކޮށްފިއެވެ.
އެގޮތުން، މާފަންނު ޕޮލިސް ރެސްޕޯންސް އެންޑް ޕެޓްރޯލްއިން 926،160 ރުފިޔާގެ އަގުހުރި ތަކެތި ހޯދާފައިވެއެވެ. އޭގެތެރޭގައި 720،000 ރުފިޔާގެ އަގުކުރެވިފައިވާ މޮޓޯ ސައިކަލު ވަނީ ހޯދާފައެވެ. އަދި 163،429 ރުފިޔާގެ އިލެކްޓްރޯނިކް ސާމާނާއި، ނަގުދު ފައިސާއިން 20،651 ރުފިޔާ، އަދި އެހެނިހެން ތަކެތީގެ ގޮތުގައި 22،080 ރުފިޔާގެ ތަކެތި ވަނީ ހޯދާފައެވެ.
މާފަންނު ޕޮލިސް އިންވެސްޓިގޭޝަނުން 173،655.77 ރުފިޔާގެ އަގުހުރި ތަކެތި ހޯދާފައިވެއެވެ. އޭގެތެރެއިން މޮޓޯ ސައިކަލުގެ ޖުމްލަ އަގަކީ 30،000 ރުފިޔާއެވެ. އަދި މަކަރާއި ހީލަތުގެ މައްސަލަތަކާއި އެކްސިޑެންޓްތަކުން، ގެއްލުމުގެ ބަދަލުގެގޮތުގައި 103،893.77 ރުފިޔާ ހޯދައިދީފައިވެއެވެ. އިލެކްޓްރޯނިކްސް ސާމާނާއި މޯބައިލް ފޯނު ގެއްލިގެން ހުށަހަޅާފައިވާ މައްސަލަތަކުގައި 20،300 ރުފިޔާގެ ތަކެތި ހޯދާފައިވާއިރު، އެހެނިހެން ތަކެތީގެ ގޮތުގައި 19،462 ރުފިޔާގެ ތަކެތި ހޯދާފައިވެއެވެ.
މި މުއްދަތުގައި ގަލޮޅު ޕޮލިސް ރެސްޕޯންސް އެންޑް ޕެޓްރޯލްއިން 251،700 ރުފިޔާގެ އަގުހުރި ތަކެތި ހޯދާފައިވެއެވެ. އޭގެތެރޭގައި 225،000 ރުފިޔާގެ މޮޓޯ ސައިކަލާއި 12،600 ރުފިޔާގެ އިލެކްޓްރޯނިކް ސާމާނު ހޯދާފައިވެއެވެ. އަދި ނަގުދު ފައިސާއިން 1،500 ރުފިޔާ، އަދި އެހެނިހެން ތަކެތީގެ ގޮތުގައި 12،600 ރުފިޔާގެ މުދާ ވަނީ ހޯދާފައެވެ.
ގަލޮޅު ޕޮލިސް އިންވެސްޓިގޭޝަނުން 2،191،586 ރުފިޔާގެ އަގުހުރި ތަކެތި ހޯދާފައިވާއިރު، އޭގެތެރޭގައި ހިމެނެނީ 1،198،200 ރުފިޔާގެ އަގުހުރި ސައިކަލާއި، މަކަރާއި ހީލަތުގެ މައްސަލަތަކާއި އެކްސިޑެންޓްތަކުން ގެއްލުމުގެ ބަދަލުގެގޮތުގައި ހޯދައިދީފައިވާ 619،258.03 ރުފިޔާއެވެ. އިލެކްޓްރޯނިކްސް ސާމާނާއި މޯބައިލް ފޯނު ގެއްލިގެން ހުށަހަޅާފައިވާ މައްސަލަތަކުގައި 308،950 ރުފިޔާގެ ތަކެތި ހޯދާފައިވެއެވެ. އަދި އެހެނިހެން ތަކެތީގެ ގޮތުގައި 65،177.88 ރުފިޔާގެ ތަކެތި ހޯދާފައިވެއެވެ.
