ކުރިޔަށް އޮތް ސީޒަނަށް ތައްޔާރުވުމުގެ ގޮތުން އެމެރިކާގައި މެންޗެސްޓަރ ޔުނައިޓެޑާއި އާސެނަލް ބައްދަލުކުރި މެޗު ޔުނައިޓެޑުން ކާމިޔާބުކޮށްފިއެވެ.

ނިއު ޖާޒީގެ މެޓްލައިފް ސްޓޭޑިއަމްގައި 82،262 ސަޕޯޓަރުންގެ ކުރިމަތީގައި ކުޅުނު މި މެޗު ޔުނައިޓެޑުން ކާމިޔާބުކުރީ 2-0 ގެ ނަތީޖާއަކުންނެވެ.

ޔުނައިޓެޑުގެ ފުރަތަމަ ލަނޑު މެޗުގެ 30 ވަނަ މިނެޓުގައި ކާމިޔާބުކޮށްދިނީ އައު ކެޕްޓަން ބްރޫނޯ ފެނާންޑޭސް އެވެ. ޒުވާން ކުޅުންތެރިޔާ ކޮބީ މެއިނޫ ދިން ޕާހަކުން ފެނާންޑޭސް ލަނޑު ޖެހީ އޭރިއާ ބޭރުންނެވެ. އޭނާ ފޮނުވާލި ބާރު ހަމަލާ ރަމްސްޑޭލްއަށް މަތަކުރެވޭ ގޮތެއް ނުވިއެވެ. މެޗުގެ 37 ވަނަ މިނެޓުގައި ޔުނައިޓެޑުގެ ދެވަނަ ލަނޑު ޖަހައިދިނީ ޖޭޑަން ސަންޗޯ އެވެ.

މި މެޗުގައި ދެ ޓީމުގެ ފަރާތުންވެސް މި ހޫނުމޫސުމުގައި ސޮއިކުރި ގިނަ ކުޅުންތެރިން ފެނުނެވެ. އެގޮތުން، އާސެނަލްގެ ފުރަތަމަ 11 ގައި ޓިމްބަރ، ކައި ހަވާޓްޒް އަދި ޑެކްލަން ރައިސް ހިމެނިފައިވެއެވެ. ޔުައިޓެޑުގެ ފުރަތަމަ 11 ގައި މޭސަން މައުންޓް ހިމަނާފައިވެއެވެ. އަލަށް ސޮއިކުރި ކީޕަރު އޮނާނާ ޓީމާއެކު ދަތުރުކޮށްފައެއް ނުވެއެވެ.

ދެވަނަ ހާފު ފެށިއިރު ޔުނައިޓެޑުން ވަނީ ކީޕަރު ޓޮމް ހީޓަން ފިޔަވާ ހުރިހާ ކުޅުންތެރިން ބަދަލުކޮށްފައެވެ. ނަމަވެސް ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޒުވާން ތަރި، އަމަދް ޑިއާލޯއަށް އަނިޔާވެ 59 ވަނަ މިނެޓުގައި ބަދަލުކުރިއެވެ. އޭނާގެ ބަދަލުގައި ކުޅެން ނިކުތީ ފަކުންޑޯ ޕެލެސްޓްރީއެވެ. އާސެނަލް އިންވެސް ވަނީ ދެވަނަ ހާފުގައި އަށް ބަދަލެއް ގެނެސްފައެވެ.

އޮގަސްޓް މަހު 12 ވަނަ ދުވަހު ޕްރިމިއަރ ލީގު ފެށުމަށް ހަމަޖެހިފައިވާއިރު، ފުރަތަމަ މެޗުގައި އާސެނަލް ނިކުންނާނީ ނޮޓިންހަމް ފޮރެސްޓާ ދެކޮޅަށެވެ. 15 ވަނަ ދުވަހު ޔުނައިޓެޑު ނިކުންނާނީ ވޮލްވްސް އާ ދެކޮޅަށެވެ.