ޑެންގީހުން ޖެހޭ މީހުންގެ އަދަދު މިއަހަރު ރިކޯޑް މިންވަރަކަށް އިތުރުވެދާނެކަމުގެ އިންޒާރު ޑަބްލިޔުއެޗްއޯއިން ދީފި

ޑެންގީ ހުން ޖެހޭ މީހުންގެ އަދަދު މިއަހަރު ރިކޯޑް މިންވަރަކަށް މައްޗަށް ހިނގައިދާނެކަމުގެ އިންޒާރު، ދުނިޔޭގެ ސިއްހަތާބެހޭ ޖަމިއްޔާ، ޑަބްލިޔުއެޗްއޯއިން ދީފިއެވެ.

ޑަބްލިޔުއެޗްއޯއިން ބުނީ މިއަހަރު ޑެންގީ ހުން ޖެހޭ މިންވަރު މައްޗަށް ދާ އެއްސަބަބަކީ ދުނިޔޭގެ ހޫނު މިން މައްޗަށް ދިޔުމާއެކު, މަދިރިއަށް ފަސޭހަކަމާއެކު އެއް ތަނުން އަނެއް ތަނަށް ދެވުން ކަމުގައެވެ.

ޑެންގީ ހުން ޖެހޭ މިންވަރު 2000 ވަނަ އަހަރުން ފެށިގެން އަންނަނީ މުޅި ދުނިޔޭގައި އިތުރުވަމުންނެވެ. ޑަބްލިޔުއެޗްއިން ބުނާގޮތުގައި 2000 ވަނަ އަހަރާ އަޅާބަލާއިރު 2022 ވަނަ އަހަރު ޑެންގީ ހުން ޖެހޭ މީހުންގެ އަދަދު ވަނީ އަށްގުނަ އިތުރުވެފައެވެ. 2022 ވަނަ އަހަރު ޑެންގީހުން ޖެހުނު މީހުންގެ އަދަދު ވަނީ 4.2 މިލިއަނަށް އަރާފައެވެ.

ރިކޯޑް މިންވަރަކަށް ޑެންގީ ހުން ޖެހިގެން އެންމެ ފުރަތަމަ ރިޕޯޓްކޮށްފައިވަނީ ސޫދާނުގެ ވެރިރަށް ޚަރްތޫމް އިންނެވެ. އެއީ މިއަހަރުގެ މާޗް މަހުއެވެ. ޔޫރަޕުގެ ގައުމުތަކުގެ ތެރެއިން ޕެރޫއިން ވަނީ ރިކޯޑް މިންވަރަކަށް ޑެންގީ ހުން ޖެހިގެން ރިޕޯޓްކޮށްފައެވެ. އެގައުމުގެ ގިނަ ސަރަހައްދުތަކެއްގައި ވަނީ ސްޓޭޓް އޮފް އިމަރޖެންސީ އިއުލާންކޮށްފައެވެ.

ޖެނުއަރީ މަހު ޑަބްލިޔުއެޗްއޯއިން ވަނީ ޑެންގީ ހުމަކީ އެންމެ ބާރަށް ފެތުރޭ ބައްޔެއް ކަމަށާއި ޕެންޑަމިކަކަށް އެބަލި ބަދަލުވެދާނެކަމުގެ އިންޒާރު ދީފައެވެ.

ޑަބްލިޔުއެޗްއޯގެ ކޮންޓްރޯލް އޮފް ނެގްލެކްޓެޑް ޓްރޮޕިކަލް ޑިޒީސް ޑިޕާޓްމަންޓުގެ ސްޕެޝަލިސްޓް ޑރ. ރާމަން ވެލަޔުދާން ހުކުރު ދުވަހު ނޫސްވެރިންނާ ވާހަކަފުޅުދައްކަވަމުން ވިދާޅުވީ، މިހާރު ދުނިޔޭގެ އާބާދީގެ ދެބައިކުޅަ އެއްބައި ވަނީ މިބައްޔަށް ހުށަހެޅުމާ ގާތުގައި ކަމަށެވެ.

މިހާތަނަށް އެންމެ ގިނައިން ޑެންގީ ހުން ޖެހިގެން ރިޕޯޓްކޮށްފައިވަނީ 2019 ވަނަ އަހަރުއެވެ. އެއަހަރު 129 ގައުމަކުން 5.2 މިލިއަން ކޭސް ރިޕޯޓްކޮށްފައިވެއެވެ.

މިހާރުވެސް އެމެރިކާއިން 3 މިލިއަނާ ކައިރިކުރާ މިންވަރަކަށް ކޭސް ރިޕޯޓްކޮށްފައިވާއިރު، ބޮލީވިއާ، ޕެރަގުއޭ އަދި ޕެރޫގެ ހާލަތާމެދު ކަންބޮޑުވެވަޑައިގަންނަވާ ކަމަށް ރާމަން ވިދާޅުވިއެވެ.

އާޖެންޓީނާގައި ވަނީ މިއިން ދުވަހަކު ނުވާ މިންވަރަށް ޑެންގީ ހުން އިތުރުވެ، ހާލަތު ގޯސްވެފައި ކަމަށް ރާމަން ވިދާޅުވިއެވެ.

ހޫނު ގަދަވުމުގެ ސަބަބުން މަދިރި އުފެދޭ މިންވަރު އިތުރުވާއިރު، ޑެންގީ ހުން ފަތުރާ މަދިރީގެ ހަށިގަނޑުގައި ވައިރަސް އުފައްދާ މިންވަރުވެސް މަތިކޮށްދެއެވެ. ޑރ. ރާމަން ވިދާޅުވީ އެއް ތަނުން އަނެއްތަނަށް މުދާ އުފުލާ މިންވަރު އިތުރުވެ މީހުން އެއްތަނުން އަނެއްތަނަށް ދަތުރުކުރާ މިންވަރު އިތުރުވުމުގެ ސަބަބުން ބަލި ޖެހޭ މިންވަރު އިތުރުވާކަމަށެވެ.

ހީޓްވޭވްގެ ސަބަބުން ޑެންގީ ހުން ފެތުރޭ މިންވަރު އިތުރުވެދާނެތޯ ދެންނެވުނު ސުވާލަކަށް ޖަވާބު ދެއްވަމުން ރާމަން ވިދާޅުވީ، އެކަމާމެދު އެއްޗެއް ވިދާޅުވަން އަދި މާ އަވަސްކަމަށެވެ. 45 ޑިގްރީ ސެލްސިއަސްއަށްވުރެ ހޫނުމިން މަތިނަމަ މަދިރި ވިހެއުމަށްވުރެ ބޮޑަށް މަރުވާނީކަމަށާއި، ނަމަވެސް މަދިރިއަކީ ވަރަށް ވިސްނުންތޫނު ސޫތްޕެއްކަމަށާއި، އެކަމުގެ ސަބަބުން ފެން އަޅާފައި ހުންނަ އެއްޗިއްސަށް މަދިރި ބިސް އަޅާކަމަށެވެ. އާންމުގޮތެއްގައި އެފަދަ އެއްޗެހީގައި އެވަރަށް ހޫނު މިން މައްޗަށް ނުދާނެކަމަށް ރާމަން ވިދާޅުވިއެވެ.