އަންހެނުންގެ ވޯލްޑްކަޕް ފުޓްބޯޅަ މުބާރާތުގައި އިނގިރޭސި ގައުމީ ޓީމުގެ ކީޕަރުގެ ޖާޒީ އާއްމުކޮށް ނުވިއްކާތީ، ކީޕަރުންގެ ފާޑުކިއުން ނައިކީ ކުންފުންޏަށް އަމާޒުވެއްޖެއެވެ.
ކުޅިވަރު ސާމާނު ވިއްކާ މަޝްހޫރު ނައިކީ ކުންފުންޏަކީ އިނގިރޭސި ގައުމީ ޓީމުގެ ޖާޒީ އުފައްދާ ފަރާތެވެ. ނަމަވެސް އެ ކުންފުނިން ވަނީ ގައުމީ އަންހެން ޓީމުގެ ކީޕަރު ޖާޒީ އާއްމުކޮށް ވިއްކަން ނުބަހައްޓާ ގޮތަށް ނިންމާފައެވެ. މިކަމާ އިނގިރޭސި ކީޕަރުންނާއި ނޫސްވެރިން ވަނީ ނައިކީއާމެދު ވަރަށް ބޮޑަށް ނުރުހުން ފާޅުކޮށްފައެވެ.
އިނގިރޭސި ގައުމީ ކީޕަރު މޭރީ އާޕްސް ބުނީ އެހެން ކުޅުންތެރިންގެ ޖާޒީ ވިއްކާފައި ކީޕަރު ޖާޒީ ނުވިއްކުމަކީ ބަލައިގަނެވޭނެ ކަމެއް ނޫންކަމަށެވެ.
އެހެން ކުޅުންތެރިން ފަދައިން ކީޕަރުންގެ ވެސް ސަޕޯޓަރުން ތިބޭނެ. އެމީހުންގެ ޖާޒީ ގަންނަން ބޭނުންވާ މީހުން ތިބޭނެ. އެކަމަކު އެ ފުރުސަތު ނެތުމަކީ ގަބޫލުކުރެވޭނެ ކަމެއްނޫން. މީ އަހަރެން ފައިޓްކުރަންޖެހޭ ކަމެއް.އާޕްސް ބުންޏެވެ.
އުމުރުން 30 އަހަރުގެ އިނގިރޭސި ކީޕަރު އާޕްސްއަކީ ހުސްވި އަހަރު ފީފާއިން ހޮވި ދުނިޔޭގެ އެންމެ މޮޅު ކީޕަރެވެ. އަދި ކުލަބު ލެވެލްގައި ވެސް އޭނާގެ ވިދުން ގަދައެވެ. މިހެންވެ އޭނާއަށް ސަޕޯޓްކުރާ ފަރާތްތައް ވެސް ގިނައެވެ.
އާޕްސް ބުނީ ގައުމީ ޓީމުގެ އެހެން ކުޅުންތެރިން އެމީހުންގެ އާއިލާއާއި ރަހުމަތްތެރިންނަށް ދިނުމަށް ގިނަ އަދަދަކަށް ޖާޒީއަށް އޯޑަރުކޮށްފައި ވާކަމަށެވެ.
އެކަމަކު އެ ފުރުސަތު ކީޕަރުންނަކަށް ނެތް. ކީޕަރުންގެ އާއިލާއާ ރައްޓެހިން ވެސް ބޭނުންވާނެ ކީޕަރުގެ ޖާޒީގަ ދަނޑަށް ދިއުމަށާ، ކޮފީ ބޯން ދިއުމަށް. އެ ފުރުސަތުން އަހަރުމެން ކީޕަރުން އެކަހެރިކޮށްލުމަކީ ނައިކީން ހެދި ބޮޑު ގޯހެއް. މީ ކުޑަކުދިންނަށް ވެސް ދެވޭ ނުރަނގަޅު މެސެޖެއް. ފަރުދީ ހައިސިއްޔަތަކުން މިކަމާމެދު ވިސްނާލުމުން ވަރަށް ދެރަވޭ. އަހަރެން އެދެން އިނގިރޭސި އެފްއޭއާ ނައިކީ ކުންފުނި ވާހަކަ ދައްކައިގެން މިކަން ހައްލުކުރަން.އާޕްސް ބުންޏެވެ.
އާޕްސްގެ ޚިޔާލަށް އިނގިރޭސި ނޫސްވެރިން ވެސް ވަނީ ތާއީދުކޮށް، ނައިކީ ކުންފުންޏަށް ފާޑުކިޔާފައެވެ.
މި މައްސަލާގައި ނައިކީ ކުންފުނިން ބުނެފައިވަނީ އަންހެން ޓީމުގެ ކީޕަރުގެ ޖާޒީ ވިއްކަން ބާޒާރަށް ނުނެރެނީ އެއީ އެކުންފުނީގެ ވިޔަފާރި ޕޮލިސީއަކަށް ނުވާތީކަމަށެވެ.
