އިންތިޚާބާއި ގުޅޭގޮތުން ދުނިޔޭގެ އެކި ޖަމިއްޔާތަކުން އީސީއާ ބައްދަލުކޮށް މަޝްވަރާކޮށްފައިވޭ: ހަބީބު
އ.ދ، ޔޫރަޕިއަން ޔޫނިއަން، ކޮމަންވެލްތު، ޔޫ.އެސް އެއިޑް އިން ރާއްޖެއަށް ކަނޑައަޅުއްވާފައިވާ ސަފީރުން ބައްދަކުރައްވާފައިވޭ
އިންތިޚާބާއި ގުޅޭގޮތުން މައުލޫމާތު ދިނުމަށް ބޭއްވެވި ބައްދަލުވުމެއްގައި އީސީގެ ރައީސް ފުއާދު ތައުފީގާއި ނާއިބު ރައީސް އިސްމާއީލް ހަބީބު ބައިވެރިވެވަޑައިގަންނަވަނީ
ރިޔާސީ އިންތިޚާބާއި ގުޅޭގޮތުން ދުނިޔޭގެ އެކި ޖަމިއްޔާތަކުން އިލެކްޝަންސް ކޮމިޝަނާ ބައްދަލުކޮށް މަޝްވަރާކޮށްފައިވާ ކަމަށް އެކޮމިޝަނުގެ ނާއިބު ރައީސް އިސްމާއީލް ހަބީބު ވިދާޅުވެއްޖެއެވެ.
ހަބީބު ވިދާޅުވީ ރިޔާސީ އިންތިޚާބު 2023 އޮބްޒާވް ކުރުމަށް އާންމުކޮށް ހުޅުވާލި ފުރުސަތާ ގުޅިގެން ދުނިޔޭގެ އެކި ޖަމިއްޔާ ޖަމާއަތްތައް ވޭތުވެދިޔަ ދެމަސްދުވަހުގެ ތެރޭގައި އިލެކްޝަންސް ކޮމިޝަނާ ބައްދަލުކޮށްފައިވާ ކަމަށެވެ.
ހަބީބު ވިދާޅުވީ އ.ދ، ޔޫރަޕިއަން ޔޫނިއަން، ކޮމަންވެލްތު، ޔޫ.އެސް އެއިޑް، އައިއެފްއީއެސް އާއި އޮސްޓްރޭލިޔާ، ކެނެޑާ، ޖަޕާން، އިނގިރޭސިވިލާތް އަދި އިންޑިޔާ އިން ރާއްޖެއަށް ކަނޑައަޅުއްވާފައިވާ ސަފީރުން ކޮމިޝަނާ ބައްދަލުކުރައްވައި، އިންތިޚާބު އޮބްޒާވްކުރުމާއި ބެހޭގޮތުންނާއި، އިންތިޚާބަށް ވަމުންދާ ތައްޔާރީތަކާއި ބެހޭގޮތުން މައުލޫމާތު ހޯއްދަވާފައިވާ ކަމަށެވެ. އަދި ދެފުށް ފެންނަ، އިންސާފުވެރި އިންތިޚާބެއް ބޭއްވުމުގެ މައްޗަށް މަޝްވަރާކޮށްފައިވާ ކަމަށް ހަބީބު ވިދާޅުވިއެވެ. މީގެއިތުރުން ބައެއް ގައުމުތަކުންނާއި ޖަމާއަތްތަކުން އިންތިޚާބުގެ މަސައްކަތްތަކުގައި ފަންނީ އެހީތެރިކަން ފޯރުކޮށްދިނުމާ ގުޅޭގޮތުން މަޝްވަރާކޮށްފައިވާ ކަމަށް ވެސް ހަބީބު ވިދާޅުވިއެވެ.
ހަބީބު ވިދާޅުވީ މިދިޔަ ހަފްތާގައި ކޮލަމްބިޔާގައި ބޭއްވި ދުނިޔޭގެ އިލެކްޝަންސް ޖަމްއިއްޔާ އޭވެބްގެ އެގްޒެކްޓިވް ބޯޑު މީޓިންގައި ބައިވެރިވެވަޑައިގެންނެވި އެކި ގައުމުތަކުގެ ކޮމިޝަނަރުން، އެ ބައްދަލުވުމުގެ ހަވާސާގައި ރާއްޖޭގެ ކޮމިޝަންގެ މެންބަރު ޑރ. މުހައްމަދު ޒާހިރު ވެސް ބައްދަލުކުރައްވައި، ރިޔާސީ އިންތިޚާބު އޮބްޒާވް ކުރެއްވުމާއި ގުޅުން ބަދަހި ކުރުމުގެ މަޝްވަރާ ކުރައްވާފައިވާ ކަމަށެވެ.
މީގެ އިތުރުން ޔޫ.އެން.ޑީ.ޕީއިންނާއި، އީޔޫގެ ޑެލިގޭޝަނުންނާއި ކޮމަންވެލްތުގެ ޕްރީ އެސެސްމެންޓް މިޝަންގެ ބޭފުޅުންގެ ފަރާތްޕުޅުން ވެސް އިންތިޚާބު އިންތިޒާމުތައް ރޭވެމުންދާ ގޮތާއި، މަސައްކަތްތައް ކުރިއަށްދާގޮތް ވަރަށްގާތުން ބައްލަވަމުން ގެންދަވާކަން ހަބީބު ފާހަގަކުރެއްވިއެވެ.
އެގޮތުން، ކޮމަންވެލްތުގެ ޓީމުން 'އުންމީދުއޮތް' ބައެއް ކެންޑިޑޭޓުންނަށް ރިޔާސީ އިންތިޚާބުގައި ވާދަކުރުމުގެ ފުރުސަތާ ބެހޭ ގޮތުން ވެސް މައުލޫމާތު ހޯއްދަވާފައިވާ ކަމަށް ހަބީބު ވިދާޅުވިއެވެ.
ހަބީބު ވިދާޅުވީ ބޭރުގެ ވީހާވެސް ގިނަ ފަރާތްތަކުން އިންތިޚާބު އޮބްޒާވް ކުރުމަކީ އިންސާފުވެރިކަމާއެކީގައި އިންތިޚާބުގެ މަސައްކަތްތައް ކުރިޔަށް ގެންދިއުމަށް ލިބޭ ހިތްވަރެއް ކަމަށެވެ. މިނިވަންކަމާއި އިންސާފުވެރިކަމާއެކު ދެފުށް ފެންނަގޮތަށް، ރިޔާސީ އިންތިޚާބުގެ މަސައްކަތްތައް ކުރިޔަށް ގެންދިއުމުގެ މައްޗަށް ނޫން ގޮތަކަށް، ބޭރުގެ އަދި އެތެރޭގެ އެއްވެސް ފަރާތަކުން ވެސް، އެއްވެސް މަޝްވަރާއެއް ކޮމިޝަނާކޮށްފައިނުވާ ކަމަށް ހަބީބު ވިދާޅުވިއެވެ.
