އުތުރު ކޮރެއާއިން އދ ގެ ސަލާމަތީ މަޖިލީހުގައި ބަޔާނެއް ދެނީ
14 ޖުލައި 2023 | ހުކުރު 02:56ކައުންސިލު ބައްދަލުވުން ބާއްވަން އެދިފައިވަނީ އެމެރިކާ، އަލްބޭނިއާ، ފްރާންސް، ޖަޕާން، މަލްޓާ އަދި އިނގިރޭސިވިލާތުން
އުތުރު ކޮރެއާ
އުތުރު ކޮރެއާއިން އދ ގެ ސަލާމަތީ މަޖިލީހުގައި ބަޔާނެއް ދިނުމަށް ހަމަޖެހިއްޖެއެވެ.
މިއީ އުތުރު ކޮރެއާއިން ލޯންޗުކުރި އިންޓަރކޮންޓިނެންޓަލް ބެލެސްޓިކް މިސައިލްއާ ގުޅިގެން ދޭ ބަޔާނެކެވެ.
15 މެންބަރު ގައުމު ހިމެނޭ ސަލާމަތީ މަޖިލީހުގެ ޖުލައި މަހު ޗެއަރ ކުރަނީ އިނގިރޭސިވިލާތެވެ. އުތުރު ކޮރެއާގެ މި ބޭނުން ފުއްދައިދިނުމަށް ނިންމާފައިވާކަމަށް އިނގިރޭސިވިލާތުގެ އދ މިޝަންގެ ސްޕޯކްސްޕާސަން ވިދާޅުވިއެވެ.
ކައުންސިލު ބައްދަލުވުން ބާއްވަން އެދިފައިވަނީ އެމެރިކާ، އަލްބޭނިއާ، ފްރާންސް، ޖަޕާން، މަލްޓާ އަދި އިނގިރޭސިވިލާތުންނެވެ. ޑިމޮކްރަޓިކް ޕީޕަލްސް ރިޕަބްލިކް އޮފް ކޮރެއާ ނުވަތަ އުތުރު ކޮރެއާ އަކީ އދ ގެ ގިނަ ދަތިކުރުމުގެ ފިޔަވަޅުތަކެއް އަޅާފައިވާ ގައުމެކެވެ. އެއީ 2006 ވަނަ އަހަރުން ފެށިގެން އެގައުމުން ކުރިޔަށްގެންދާ މިސައިލާއި ނިޔުކުލިއަރ ޕްރޮގްރާމުގެ ސަބަބުންނެވެ.
ބުދަ ދުވަހު އުތުރުކޮރެއާއިން ވަނީ އެންމެ ފަހުގެ ހުވާސުއަންގ-18 އައިސީބީއެމް ޓެސްޓްކޮށްފައެވެ. އެގައުމުން ބުނާގޮތުގައި މިއީ އެގައުމުގެ ނިޔުކްލިއަރ ހަތިޔާރު ލަޝްކަރުގެ އެންމެ މައި ހަތިޔާރެވެ. އެންމެ ފުރަތަމަ މި މިސައިލް ޓެސްޓްކޮށްފައިވަނީ އޭޕްރީލް މަހުއެވެ.
