އާރުޑީސީއާ ގުޅޭ މައްސަލަ ތަހުގީގު ނުކުރުމަކަށް ރައީސް ނާންގަވާ، ފަތުރަނީ ދޮގު ޚަބަރެއް: ފުލުހުން
12 ޖުލައި 2023 | ބުދަ 10:25މި މައްސަލައިގެ ތަހުގީގަށް ނުފޫޒު ފޯރުވުމުގެ ގޮތުން، ނުވަތަ ތަހުގީގު ހުއްޓުވުމަށް، އަދި ތަހުގީގުގައި ވަކި ގޮތަކަށް އަމަލުކުރުމަށް އެއްވެސް ފަރާތަކުން އަންގާފައެއްނުވޭ
އާރުޑީސީގެ މުވައްޒަފުން
ރޯޑް ޑިވެލޮޕްމަންޓް ކޯޕަރޭޝަން ލިމިޓެޑް (އާރުޑީސީ)އާ ގުޅޭގޮތުން ފުލުހުން ތަހުގީގު ކުރަމުންގެންދާ މައްސަލަ ތަހުގީގު ކުރުމަށްޓަކައި ކުރަންޖެހޭ މަސައްކަތްތައް ދިވެހި ފުލުހުންގެ ޚިދުމަތުން ކުރަމުންދާ ކަމަށް އެ މުއައްސަސާއިން ބުނެފިއެވެ.
ފުލުހުން ބުނީ މި މައްސަލަ ތަހުގީގު ނުކުރުމަށް ރައީސުލް ޖުމްހޫރިއްޔާ އެންގެވިކަމަށް ބުނެ ދިޔަރެސް ނޫހުގައި ލިޔެފައިވާ ޚަބަރަކީ އެއްވެސް އަސާސެއް ނެތް ދޮގު ޚަބަރެއް ކަމަށެވެ. އަދި މި މައްސަލައިގެ ތަހުގީގަށް ނުފޫޒު ފޯރުވުމުގެ ގޮތުން، ނުވަތަ ތަހުގީގު ހުއްޓުވުމަށް، ތަހުގީގުގައި ވަކި ގޮތަކަށް އަމަލުކުރުމަށް، އެއްވެސް ފަރާތަކުން އެ ޚިދުމަތަށް އަންގާފައި ނުވާކަމަށެވެ.
މި މައްސަލައިގެ ތަހުގީގާގުޅޭ އެއްވެސް މަޢުލޫމާތެއް، ތަހުގީގުގައި ބައިވެރިވާ އެއްވެސް ފަރާތަކުން ދިޔަރެސްއާ ހިއްސާކޮށްފައި ނުވާނެކަމަށާއި، މައުލޫމާތުގެ ސައްހަކަން ބެލުމަށް މަސައްކަތް ނުކޮށް، ދިވެހި ފުލުހުންގެ ޚިދުމަތުން ހިންގާ ތަހުގީގުތަކާމެދު ރައްޔިތުންގެ އިތުބާރު ގެއްލޭގޮތަށް، ހަގީގަތާ ޚިލާފު މައުލޫމާތު ފެތުރުމަކީ ކަންބޮޑުވާ ކަމެއް ކަމަށް ފުލުހުން ބުނެއެވެ. އަދި ދޮގު މައުލޫމާތު ނުފެތުރުމަށް ވަނީ އިލްތިމާސްކޮށްފައެވެ.
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ން ބޭންކު އޮފް މޯލްޑިވްސް (ބީއެމްއެލް)ގައި ހުޅުވާފައިވާ ކުންފުނީގެ މައި އެކައުންޓުން 13 މިލިއަނަށްވުރެ ގިނަ ރުފިޔާ، ކުންފުނީގެ މެނޭޖިންގ ޑިރެކްޓަރ މޫސާ އަލީ މަނިކާއި ކުންފުނީގެ ޗީފް ފައިނޭންޝަލް އޮފިސަރު (ސީއެފްއޯ) ޔާސިރު ހަސަންގެ އަމިއްލަ ބޭނުމަކަށް ނަގާފައިވާކަމަށް ބައެއް މީޑިއާތަކުން ރިޕޯޓްކުރިއެވެ. އެހެންނަމަވެސް އާރްޑީސީން ވަނީ އެކަން ދޮގުކޮށްފައެވެ.
އާރުޑީސީން ނެރުނު ނޫސްބަޔާނެއްގައި ބުނެފައިވަނީ ކުންފުނީގެ އެކައުންޓުން 13 މިލިއަން ރުފިޔާ ކުންފުނީގެ ސީއެފްއޯގެ އަމިއްލަ އެކައުންޓަށް ޖަމާކޮށްފައިވާކަމަށް ބުނެ އެމައްސަލަ ފުލުހުން ބަލަމުންދާކަމަށް ބައެއް މީޑިޔާތަކުން ޚަބަރު ގެނެސްދީފައިވާކަމަށެވެ. ނަމަވެސް އެފަދަ އެއްވެސް މުއާމަލާތެއް، ނުވަތަ އެފަދަ މުއާމަލާތަކާއި ގުޅުންހުރި މުއާމަލާތެއް ކުންފުނީގެ އެކައުންޓުން އެއްވެސް އިރެއްގައި ހިނގާފައި ނުވާނެކަމުގެ ޔަގީންކަން ދޭކަމަށެވެ.
އާރުޑީސީއަކީ ގަވާއިދުން ކޮންމެ އަހަރަކު އޮޑިޓްކުރެވޭ ކުންފުންޏެއްކަމަށާއި، އަދި މިހާރުވެސް އޮޑިޓަރ ޖެނެރަލް އޮފީހުން ޚާއްސަ އޮޑިޓެއް ކުރަމުން ގެންދާކަމަށާއި، ކުންފުނީގެ ފައިނޭންޝަލް ޕޮލިސީއާ ޚިލާފު އެއްވެސް ފައިސާގެ މުއާމަލާތެއް ނުވަތަ އެއްވެސް މައްސަލައެއް ފާހަގަކޮށްފައި ނެތްކަމަށް ނޫސްބަޔާނުގައި ބުނެފައިވެއެވެ. އަދި މިޚަބަރު ބައެއް ނޫސްތަކުން ގެނެސްދީފައިވަނީ ކުންފުނީގެ ބަހެއް ނެތި، މައުލޫމާތުގެ ސައްހަކަން ކަށަވަރުކުރުމަކާނުލައި ކަމަށާއި، އެއީ ނޫސްވެރިކަމުގެ ބެސްޓް ޕްރެކްޓިސްއާ ޚިލާފަށް ގެނެސްދީފައިވާ ޚަބަރެއް ކަމަށްވެސް އާރުޑީސީން ބުނެއެވެ.
އާރުޑީސީއާ ގުޅުންހުރި ފައިސާގެ އެއްވެސް މައްސަލައެއް ތަހުގީގުކުރަމުންދާކަން، ނުވަތަ ތަހުގީގުކުރަން ބޭނުންވާކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ)އާއި ފުލުހުން އާރުޑީސީއަށް އަންގާފައި ނުވާކަމަށްވެސް ބުނެފައިވެއެވެ.
މީގެއިތުރުން އާރުޑީސީން ކުންފުނީގެ ޚަރަދުތަކާއި ފައިސާގެ މުއާމަލާތްތައް ކުރަމުން އަންނަނީ ރާއްޖޭގައި ހެދިފައިހުރި ގާނޫނުތަކާއި ގަވާއިދުތަކާއި ކުންފުނީގައި ހެދިފައިވާ ޕޮލިސީތަކާއި އެއްގޮތަށް ކަމަށް އާރުޑީސީގެ ބަޔާނުގައި ބުނެފައިވެއެވެ. އެހެންކަމުން ފައިސާއަށް ޚިޔާނާތްތެރިވުމާއި ބޮޑެތި އަދަދުތަކުން ވައްކަންކޮށް އެއްވެސް މުވައްޒަފެއްގެ އަމިއްލަ އެކައުންޓަކަށް ނުވަތަ އެކައުންޓުތަކަކަށް ކުންފުނީގެ މައި އެކައުންޓުން ފައިސާ ފޮނުވޭނެ އެއްވެސް މަގެއް ނޯންނާނެކަމުގެ ޔަގީންކަން ދޭކަމަށްވެސް އާރުޑީސީގެ ނޫސްބަޔާނުގައި ބުނެފައިވެއެވެ.
