ޔާމީނާއި ރިލުވާންގެ މައްސަލަ: އިސޫވެސް ޓެގު އެޅުވުމަށްފަހު ދޫކޮށްލައިފި
މި މައްސަލައިގައި ހިމެނޭ މުއާޒުގެ ބަންދު މުރާޖައާ ފަހުން ކޮށްފައެއް ނުވޭ
އިސްމާއިލް އަބްދުލްރަހީމް (އިސޫ)
ޔާމީން ރަޝީދު މަރާލި މައްސަލައާއި އަހުމަދު ރިޟުވާން އަބްދުﷲ ރަހީނުކޮށް މަރާލިކަމަށް ތުހުމަތުކުރެވޭ މައްސަލައިގައި ދައުވާ އުފުލާފައިވާ އިސްމާއިލް އަބްދުލްރަހީމް (އިސޫ) ޝަރުތުތަކާއެކު ބަންދުން ދޫކޮށްލައިފިއެވެ.
މި މައްސަލައިގައި ދައުވާ އުފުލާފައިވަނީ އަހުމަދު އިސްމާއިލް (އަހަނދު)އާއި، އިސްމާއިލް އަބްދުލްރަހީމް (އިސޫ) ގެ އިތުރުން، އަހުމަދުމުއާޒް (ގަޓުމުއާ)އެވެ. އެ 3 މީހުން ހައްޔަރުކޮށްފައިވަނީ 26 ޖޫން 2022 ގައެވެ.
އެ 3 މީހުން ޝަރީއަތް ނިމެންދެން ބަންދުކޮށްފައި ވަނިކޮށް އަހަނދު ދޫކޮށްލާފައިވަނީ 21 ޖޫންގައި ކްރިމިނަލް ކޯޓުގައި ކުރިއަށްދިޔަ އަޑުއެހުމުގައެވެ. އެ ނިންމުން އިސްތިއުނާފު ނުކުރުމަށް ޕީޖީ އޮފީހުން ވަނީ ނިންމާފައެވެ.
ޕީޖީ އޮފީހުގެ އޮފިޝަލަކު ރާއްޖެއެމްވީއަށް ވިދާޅުވީ، އޭނާ ދޫކޮށްލީ ޓެގް އަޅުވައި، ޕާސްޕޯޓު ހިފެހެއްޓުމަށްފަހު، ޒަރޫރީ ބޭނުމަކަށް ނޫން ގޮތަކަށް ގެއިން ނުނިކުމެވޭ ގޮތަށް ޝަރުތުކޮށްފައި ކަމަށެވެ.
އޭގެ އިތުރުން، ހެކިންނަށްވެސް ޖިސްމާނީ ރައްކާތެރިކަން ދޭން ވަކި އަމުރެއް ނެރުއްވާފައިވާކަން ފާހަގަ ކުރައްވައި އޭނާ ވިދާޅުވީ، ދަށު ކޯޓުގެ ނިންމުން އިސްތިއުނާފު ނުކުރަން ނިންމެވީ އެ ސަބަބުތަކާހުރެ ކަމަށެވެ.
މިހާރު މިވަނީ މި މައްސަލައިގައި ދައުވާ އުފުލާފައިވާ އިސޫވެސް ބަންދުން ދޫކޮށްލާފައެވެ. އެގޮތުން އޭނާވެސް ދޫކޮށްލާފައިވަނީ ބަންދު މުރާޖައާ ކުރުމަށްފަހު، އޭނާ އިތުރަށް ބަންދުގައި ބަހައްޓަން ނުފެންނާތީއެވެ.
ކްރިމިނަލް ކޯޓުން މައުލޫމާތު ދޭ ގޮތުގައި އޭނާ ބަންދުން ދޫކޮށްލީ ޓެގް އަޅުވައި، މޮނިޓަރ ކުރުން ޝަރުތުކޮށް އަދި ގެއިން ބޭރަށް ނުކުތުމުގައިވެސް ހުދޫދުތަކެއް ކަނޑައަޅާފައެވެ.
މި މައްސަލައިގައި ހިމެނޭ މުއާޒުގެ ބަންދު މުރާޖައާ އަދި ކުރިއަކަށް ނުގެންދެއެވެ.
