ދަރު އުނދުނަކުންވެސް ބޭކަރީއެއް ހިންގިދާނެ. ސާމީއަކީ ލާމަސީލު މިސާލެއް!

ވަކި ފެންވަރެއްގެ ނޫނީ ވަކި ބްރޭންޑެއްގެ އެއްޗެއް ނުލިބިގެން މަސައްކަތެއް ނުކޮށް ހުންނަ ހުރުމަކީ އެކަމަކައިގެން ކުރިއަށް ދިއުމަށް މާ ބޮޑު ޝަޢުޤުވެރިކަމެއް ނެތިގެން ދައްކާ ބަހަނާއެކޭ ބުނަން ޖެހެނީ ފަލަސްޠީނަށް އުފަން ސާމީ ޢޫދީ ފަދަ މީހުންގެ ހިތްވަރާއި ސާބިތުކަން ފެންނަ ހިސާބުންނެވެ. ހުރިހާ ކޮޅަކުން ފިއްތާލާފައި ވާ ޣައްޒާގެ ދެކުނުގައި އޮންނަ ރަފަހުގެ ރަށްވެހިންނަށް ޕާން ފިހެދިނުމުގެ މަސައްކަތުގައި ސާމީ އަވަދިނެތި އުޅެނީ، ޒަމާނީ ފެންވަރުގެ އާލާތްތަކުން ފުރިހަމަ ކޮށްފައި ވާ ބޭކަރީއެއްގެ ނޫނެވެ. އޭނާ އެ މަސައްކަތް ކުރަނީ ޢާއިލާގެ އެތައް ޖީލެއްގެ އަތްތައް މަތިން ވާރުތަވަމުން އައި ދަރު-އަވަނެއް ބޭނުން ކޮށްގެންނެވެ.

ސާމީގެ ގިނަ ކަސްޓަމަރުންނަކީ ޣައްޒާއަށް ކުރިމަތިލާން ޖެހިފައި ވާ ދާއިމީ ކަރަންޓު ނުލިބުމުގެ ތަކުލީފުތައް އުފުލަން ޖެހިފައި ވާ މީހުންނެވެ. އަދި އަމިއްލަ ގޭގައި ގޭސް އުނދުން ބަހައްޓައިގެން ކެއްކޭނެ ހާ އަތްމަތި ތަނަވަސް ބައެއްވެސް ނޫނެވެ.

އެހެން ކަމުން، ގޭގައި ފުށްގަނޑު މޮޑުމަށް ފަހު، ސާމީގެ ބޭކަރީއަށް އެ ފުށްގަނޑު ފިހަން ފޮނުވައެވެ. ދަރު އަވަނުގައި، އެމީހަކު ބޭނުން އެއްޗެއް ފިހާށެވެ. އާންމު ބޭކަރީއަކުން ލިބެން ހުންނަ އެއް ރަހައެއްގެ ބަދަލުގައި، އެމީހެއްގެ އަމިއްލަ އަތުން ތައްޔާރު ކުރި އެއްޗެއްގައި ލާ ހާއްސަ ރަހައިގެ އުފާވެސް ލިބޭ ގޮތަށެވެ.

ސާމީގެ ކަސްޓަމަރުން ބުނާ ގޮތުގައި ބޯޓުދެއްޔާއި ދަރަކީ، ކަރަންޓު ނުވަތަ ގޭހަށް ވުރެ ފަސޭހައިން ލިބެން ހުރި ބާވަތްތަކެކެވެ. އަދި އެކި ކަހަލަ ކާބޯތަކެތި ފިހަން ބޭނުން ކުރާ ޒަމާނީ އާލާތްތަކަށް ވުރެ، ދަރު އަވަންތަކުގައި ފިހުމަކީ މާ ފަސޭހަ ކަމެއް ކަންވެސް އެމީހުން ފާހަގަ ކުރެއެވެ.

މިޞްރާއި ޔަހޫދީ އިޒްރޭލާއި ދެމެދު، ހަނި ދިގަށް ދެމި، ފިތިފައި އޮތް ޣައްޒާގެ އާބަދީ، 2.3 މިލިއަނަށް ވުރެ މައްޗަށް އަރައެވެ. އަހަރުގެ ހޫނު މޫސުމުގެ ދުވަސްވަރު، ޣައްޒާއަށް ދުވާލެއްގެ މައްޗަށް 500 މެގަވޮޓްގެ ކަރަންޓް ބޭނުންވެއެވެ. ނަމަވެސް ޣައްޒާއަށް ކަރަންޓު ލިބެން އޮންނަނީ އިޒްރޭލު މަގުން އެކަންޏެވެ. އެއީވެސް ދުވާލެއްގެ މައްޗަށް އެންމެ 120 މެގަވޮޓްއެވެ. ޣައްޒާގައި ހުންނަ ހަމަ އެކަނި އިންޖީނު ގެއިން ދުވާލެއްގެ މައްޗަށް ސަޕްލައި ކުރެވެނީ 60 މެގަވޮޓްގެ ކަރަންޓެވެ.

ކަރަންޓުގެ ހަކަތަ ކެނޑިގެންދާ ވަޤުތުތަކުގައި އެ ލިބޭ ގެއްލުން ފޫބެއްދުމަށް ޣައްޒާގެ ބައެއް ގޭބިސީތަކާއި ވިޔަފާރިތަކުން ބަރޯސާ ވަނީ އަމިއްލަ ޖަނަރޭޓަރުތަކާއި އިރުގެ އަވިން ހަކަތަ އުފައްދާ ސޯލަރ ޕެނަލްތަކަށެވެ. މިހާރުވެސް އިންތިހާ ދަތި ހާލުގައި އުޅޭ ޣައްޒާގެ ރަށްވެހިންނަށް މާލީ ގޮތުން އިތުރު ތަކުލީފެއް އުފުލަން މަޖުބޫރުވެއެވެ.