މިސްރުން ފުރައިގެން ރާއްޖެއަށް ދަތުރުކުރަނިކޮށް އެފްރިކާގެ ޤައުމެއްކަމަށްވާ އެރިޓްރިއާގައި ހިފެހެއްޓި ފިއުލް ސަޕްލައި މޯލްޑިވްސް، އެފްއެސްއެމްގެ ދެ ބޯޓުގެ މައްސަލަ މިހާރު އޮތީ އެ ޤައުމުގެ ކޯޓިގައި ކަމަށް ފިއުލް ސަޕްލައި މޯލްޑިވްސް (އެފްއެސްއެމް)ގެ މެނޭޖިންގ ޑިރެކްޓަރު މުހައްމަދު ޤަސަމް ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ޤަސަމް ވިދާޅުވީ ބޯޓު ގެނައުމަށްޓަކައި ރާއްޖޭގެ ފޮރިން މިނިސްޓްރީން މަސައްކަތް ކުރަމުންދާ ކަމަށެވެ. އަދި މައްސަލަ މިހާރު ކޯޓުގައި އޮތްއިރު ރާއްޖޭގެ ފަރާތުން މައްސަލައިގައި ވަކާލާތު ކުރަނީ އެރިޓްރިއާގެ ލޯ ފާރމަކުން ކަމަށެވެ. އެ ލޯ ފާރމަށް އެޑްވާންސްކޮށް 4000 ޑޮލަރު ދައްކާފައިވާއިރު މައްސަލަ އެއްކޮށް ބެލުމަށް އެތަނުން ނަގަނީ 8000 ޑޮލަރު ކަމަށެވެ.

ރާއްޖެއިން ފުރަތަމަ ފޮނުވި ޕަވަރ އޮފް އެޓާނީ އެ ޤައުމުގެ އެއްވެސް އިދާރާއަކުން ބަލައިނުގަތުމުން މިހާރު ދެވަނަ ޕަވަރ އޮފް އެޓީނީ ފޮނުވާ، އެ ޤައުމުގެ ކޯޓުން ބަލައިގެންފައިވާކަމަށް ޤަސަމް ވިދާޅުވިއެވެ. އަދި ލޯ ފާރމާ މަސައްކަތް ހަވާލުކޮށްފައިވާއިރު ވަކީލުންގެ މަސައްކަތް ފަށާފައިވާ ކަމަށެވެ. މައްސަލަ ކޯޓުގައި އޮތްނަމަވެސް ކޯޓުން ބޭރުގައި ޑިޕްލޮމެޓިކްކޮށް މައްސަލަ ހައްލު ކުރުމަށް ކުރަންޖެހޭ މަސައްކަތްތައް ސަރުކާރުން ކުރަމުންދާ ކަމަށް ޤަސަމް ވިދާޅުވިއެވެ.

މިސްރުން ރާއްޖެއަށް ދަތުރުކުރި ދެ ބޯޓު އެރިޓްރިއާގައި ބަނދަރުކުރީ މިދިޔަ އޭޕްރީލް މަހުގެ 26 ވަނަ ދުވަހު، މޫސުން ގޯސްވުމުގެ ސަބަބުންނެވެ. އެ ގައުމުގެ ސިފައިން އެ ދެ ބޯޓު ހިފެހެއްޓީ ހުއްދަ ނުހޯދާ އެރިޓްރިއާއަށް އެތެރެވި ކަމަށް ބުނެއެވެ. ނަމަވެސް ބޯޓު ބަނދަރުކުރުމުގެ ކުރިން ހުއްދަ ހޯދަން މަސައްކަތް ކުރިކަމަށް އެފްއެސްއެމްއިން ވަނީ ބުނެފައެވެ.

2019 ވަނަ އަހަރު އެފްއެސްއެމުން ވަނީ ތެޔޮ އުފުލާ 4 ބޯޓު ބަނުމަށް މިސްރުގެ ކުންފުންޏަކަށް ހަވާލުކޮށްފައެވެ. މީގެ 1 އަހަރު ކުރިން ވަނީ މީގެތެރެއިން 2 ބޯޓު ރާއްޖެ ގެނެސްފައެވެ.

އެރިޓްރިއާގައި ހިފެހެއްޓި 2 ބޯޓަކީ ބާކީ އޮތް 2 ބޯޓެވެ. މި 2 ބޯޓަކީ 250 ހާސް ލިޓަރުގެ ކެޕޭސިޓީގެ ބޯޓުތަކެއްކަމަށް އެފްއެސްއެމްއިން މައުލޫމާތުދެއެވެ. އަދި މިއިން ކޮންމެ ބޯޓެއް ބަނުމަށް ގާތްގަނޑަކަށް 11 މިލިއަން ރުފިޔާ ޚަރަދުވެފައިވާކަމަށް މައުލޫމާތު ލިބެއެވެ.