އެމްއެންޑީއެފާއި އިންޑިއާގެ ނޭވީ ގުޅިގެން ހިންގި "އެކްސަސައިޒް އެކަތަ" ނިންމާލައިފި
މިއީ 4 ޖޫން 2023އިން ފެށިގެން ޖުލައި 2 ވަނަ ދުވަހުގެ ނިޔަލަށް ކުރިއަށްގެންދިޔަ އެކްސަސައިޒެއް
އެކްސަޒައިޒް އެކަތަ ނިންމާލުމުގެ ރަސްމިއްޔާތު
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ ކޯސްޓްގާޑާއި އިންޑިއާ ނޭވީ ގުޅިގެން، އެމްއެންޑީއެފް ސެންޓްރަލް އޭރިއާ ކޮމާންޑުގައި ހިންގި "އެކްސަސައިޒް އެކަތަ 2023" ކާމިޔާބުކަމާއެކު ނިންމާލައިފިއެވެ.
މި އެކްސަސައިޒް ނިންމުމުގެ ގޮތުން އާދީއްތަ ދުވަހު އެމްއެންޑީއެފް ސެންޓްރަލް އޭރިއާ ކޮމާންޑް ހެޑްކުއާޓަރޒް، ލ.ކައްދޫގައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ކޯސްޓްގާޑްގެ ކޮމަޑާންޓް، ބްރިގޭޑިއަރ ޖެނެރަލް އިބްރާހީމް ޙިލްމީއެވެ. މި އެކްސަސައިޒްގައި ބައިވެރިވި އިންޑިއާ އަސްކަރިއްޔާގެ ޓްރެއިނިންގ ޓީމަށް ސެޓްފިކެޓް ހަވާލުކޮށްދެއްވީ ވެސް ކޯސްޓްގާޑް ކޮމަޑާންޓް، ބްރިގޭޑިއަރ ޖެނެރަލް އިބްރާހީމް ޙިލްމީއެވެ.
މި ތަމްރީނުގައި ބައިވެރިވި އެމްއެންޑީއެފް ކޯސްޓްގާޑުގެ ސިފައިންނަށް ސެޓްފިކެޓް ހަވާލުކޮށްދެއްވީ އިންޑިއާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ޑެޕިއުޓީ ކޮމިޝަނަރ، ޝްރީ މަޔަންކް ސިންގްއެވެ.
މިއީ 4 ޖޫން 2023އިން ފެށިގެން ޖުލައި 2 ވަނަ ދުވަހުގެ ނިޔަލަށް ކުރިއަށްގެންދިޔަ އެކްސަސައިޒެކެވެ.
އެމްއެންޑީއެފް ކޯސްޓްގާޑްގެ ސިފައިންނާއެކު އިންޑިއަން ނޭވީގެ މެރިން ކޮމާންޑޯސް ބައިވެރިވި މި އެކްސަސައިޒްގައި ފަޔަރިންގ، އެކްސްޕްލޯސިވް ޑިމޮލިޝަން، ޑައިވިންގ، ރީބްރީދަރ ޑައިވިންގެ އިތުރުން ކޮމްޕެޓެޓިވް ސެލްފް ޑިފެންސް ޓެކްނިކް ފަދަ ބައިތައް ވަނީ އުނގެނި ފަރިތަކޮށްފައެވެ.
މި ހަރަކާތް ނިންމުމުގެ ރަސްމިއްޔާތުގައި، އެމްއެންޑީއެފް ސެންޓްރަލް އޭރިއާ ކޮމާންޑްގެ ޑެޕިއުޓީ ކޮމާންޑަރ، ލެފްޓިނެންޓް ކާނަލް މުޙައްމަދު ފަސީހްއާއި، އިންޑިއާ އަސްކަރިއްޔާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ޑިފެންސް އެޑްވައިޒަރ، ކެޕްޓަން މަހޭޝް ސީ މޯޑްގިލްއާއި، ސެންޓްރަލް އޭރިއާ ކޮމާންޑްގެ ބައެއް އޮފިސަރުންނާއި ކޯސްޓްގާޑުގެ އޮފިސަރުން ބައިވެރިވެ ވަޑައިގެންނެވިއެވެ.
