ޕެރިހުގައި ފުލުހުން 17 އަހަރުގެ ކުއްޖެއް ގަޔަށް ބަޑިޖަހައި މަރާލުމުން، މުޒާހަރާ ކުރަނީ

ޕެރިހުގައި ފުލުހުން 17 އަހަރުގެ ކުއްޖެއްގެ ގަޔަށް ބަޑިޖަހައި މަރާލުމުން މުޒާހަރާ ކުރަން ފަށައިފިއެވެ.

ޕެރިހުގައި 17 އަހަރުގެ ކުއްޖަކު މަރާލާފައިވަނީ އޭނާއަށް ޓްރެފިކް ޕޮލިހުން މަޑުކުރަން އެންގުމުން މަޑު ނުކޮށް ދިއުމުން ކަމަށް މީޑިއާތަކުން ވަނީ ރިޕޯޓްކޮށްފައެވެ. މިހާދިސާ ހިނގާފައިވަނީ އަންގާރަ ދުވަހުއެވެ.

މީސްމީޑިއާގައި ދައުރުވަމުންދާ ވީޑިއޯއިން އެ ކުއްޖާ ދުއްވަން އިން ކާރާ ދިމާއަށް ފުލުހުންގެ އޮފިސަރަކު ބަޑި ދިއްކޮށްގެން ހުންނަ މަންޒަރު ފެނެއެވެ. އޭގެ އިރުކޮޅެއް ފަހުން ބަޑި ޖަހާ އަޑު އިވެއެވެ.

އެއަށްފަހު ކާރު ކުއްލިއަކަށް ހުއްޓެއެވެ.

ފުލުހަކު ބަޑި ޖެހުމުގެ ސަބަބުން މަރުވެފައިވަނީ ނަހެލް ނަމަކަށްކިޔާ ކުއްޖެކެވެ. އޭނާ ހޮސްޕިޓަލަށް ގެންދިޔައިރު މޭމައްޗަށް ވަޒަން އެރުމުގެ ސަބަބުން ޒަޚަމްވެފައި ހުރިތަން ފެންނަން ހުރިކަމަށާއި، އޭނާގެ ފުރާނަ ސަލާމަތްކުރުމަށް ހޮސްޕިޓަލުން ވަރަށް މަސައްކަތްކުރި ކަމަށް ރިޕޯޓްތައް ބުނެއެވެ.

އޭނާ މަރާލިކަމަށް ތުހުމަތުކުރާ ފުލުސް އޮފިސަރު މިހާރު ވަނީ ހައްޔަރުކޮށްފައެވެ. އޭނާ ހައްޔަރުކޮށްފައި ވަނީ މީހަކު މަރާލުމުގެ ކުށުގެ ތުހުމަތުގައެވެ.

މިދިޔަ އަހަރު މިފަދަ ގޮތަކަށް 13 މީހުން ވަނީ މަރުވެފައެވެ.

ނަހެލްއަކީ މި އަހަރު ފުލުހުންގެ އަމަލެއްގެ ސަބަބުން ފްރާންސްގައި މަރުވި ދެވަނަ މީހާއެވެ. މީގެ ކުރިން މަރުވި މީހާވެސް މަރުވެފައި ވަނީ ޓްރެފިކް ސްޓޮޕެއްގައި ފުލުހުން އަމަލުކުރި ގޮތުންނެވެ.

ފްރާންސްގެ ފުލުހުން ބުނާގޮތުން ނަހެލް އޭނާގެ ކާރު ދުއްވާފައި އައީ ފުލުހުންނާ ދިމާއަށެވެ. އަދި އޭނާގެ ނިޔަތް ހުރީ ފުލުހުންނަށް ގެއްލުމެއް ދިނުމަށް ކަމަށްވެސް ފުލުހުން ތުހުމަތުކުރެއެވެ.

އެހެންނަމަވެސް ފެންނަން ހުރި ވީޑިއޯތަކުން އެކަމަށް ހެކި ނުދޭކަން ފާހަގަކޮށްލެވެއެވެ،

މީޑިއާތަކުން ރިޕޯޓްކޮށްފައި ވާގޮތުން، މީސްމީޑިއާގައި ދައުރުވާ ވީޑިއޯތަކުގައި، ނަހެލްގެ ބޮލަށް ބަޑިޖަހާނެ ކަމަށް ބުނެ އިންޒާރު ދޭ އަޑު އިވެއެވެ.

އެހެންނަމަވެސް އެހެން ބުނަނީ ކާކުކަން ސާފެއް ނުވެއެވެ.

މިއާއެކު ފުލުހުންނާމެދު ނުރުހުންވެ، ކާރާއި، ޑަސްބިން ފަދަ އެއްޗެހީގައި ރޯކުރުމުގެ އަމަލުތައް އާއްމުން ވަނީ ހިންގާފައެވެ.

ބުދަ ދުވަހުން ފެށިގެން ކުރިއަށްދާ މުޒާހަރާތަކުގައި 24 ފުލުހުންނަށް ވަނީ އަނިޔާވެފައެވެ.

މި މުޒާހަރާތަކުގައި ފުލުހުންނާ މުޒާހަރާގެ ބައިވެރިންނާ ދެމެދު ކޮންމެވެސް ވަރެއްގެ ކުރިމަތިލުންތަކެއް ވެސް ވަނީ ހިނގާފައެވެ. އަދި 150 މީހުން ވަނީ މުޒާހަރާތެރެއިން ހައްޔަރުކޮށްފައެވެ.