ސިޔާސީ އޮއިވަރާއި ވައި ބަދަލުވުމުގެ ތެރެއިން، ރައްޔިތުން ގުނބޯ ހެއްދުމުގެ މާޒީއެއް
ހިތް ބަދަލުވާންވެސް ހައްދެއް އޮންނަން ޖެހޭނެކަމަށް މީހުން ބުނޭ
ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލާ ހަރަކާތްތަކާއި އިންޑިއާ އައުޓް ހަރަކާތްތައް މިއަދު "ޑިމޮކްރަޓްސް" ޕާޓީގެ މެމްބަރުން ނަންގަވަނީ ވަރަށް ފިނިކޮށް
ވަޔާއި އޮއި ބަދަލުވުމަކީ އިލާހީ ގާނޫނެވެ. މޫސުން ބަދަލުވުމަކީވެސް އިލާހީ ގާނޫނެވެ.
ބައެއް ފަހަރު ހުޅަނގު މޫސުމުގައިވެސް އިރުމަތިން ވައިޖެހޭ މަންޒަރު ފެނެއެވެ. ބައެއް ފަހަރު އިރުވައި މޫސުމުގައި ހުޅަނގަށްވެސް ވައި ބަދަލުވެއެވެ.
ބައެއް ފަހަރު ވައި އެނބުރޭ ފަހަރުވެސް އާދެއެވެ. އެއް ދުވަހެއްގައި އެކި ކޮޅުކޮޅުން ވައިޖެހޭ ދުވަސްވެސް އާދެއެވެ.
ރާއްޖޭގެ ސިޔާސީ މަސްރަހުވެސް މި ދެންނެވި އުސޫލާ ވަކި ތަފާތެއް ނޫނެވެ. އެއީ ސިޔާސީ ފިތުރަތު ކަމުގައިވެސް ވެދާނެއެވެ.
ރިޔާސީ އިންތިޚާބަށް ބޯމަތިވެފައިވާ މި ދުވަސްކޮޅަކީ، ވަކިން ޚާއްސަކޮށް އަވަސް އަވަހަށް ވައި ބަދަލުވަމުންދާ ދުވަސްކޮޅެކެވެ. އިއްޔެ ހުޅަނގުން ޖެހުނު ވައި މިއަދު ޖެހެނީ އިރުމަތިންނެވެ.
އެކިއެކި ބޭބޭފުޅުންގެ ވާހަކަތައްވެސް ހުރީ އިއްޔެއާ ދިމާ އިދިކޮޅަށެވެ. އިއްޔެ ކަމުނުދިޔަ ކިތަންމެ ކަމެއް މިއަދު ކަމުދެއެވެ. އިއްޔެ ކަމުނުދިޔަ މީހުން މިއަދު ކަމުދެއެވެ.
ފަހަރުގައި މިއީ ދުނިޔެ ހިނގާ ގޮތޭ ކިޔާފައި ނިންމާލެވިދާނެއެވެ.
އެހެންނަމަވެސް، ދުލަކީ ކޮންމެވެސް ވަރެއްގެ އަގެއް އޮންނަ އެއްޗެކެވެ. ހިތް ބަދަލުވާންވެސް ހައްދެއް އޮންނަންޖެހޭނެކަމަށް މީހުން ބުނެއެވެ.
ދޮހޮއްކޮބޭގެ ލަވައިގައި އޮންނަހެން، އަދާވަތްތެރިވިޔަސް ވާންވާނީ ހިތަށް ކުޅަދާނަ މިންވަރަކުންނެވެ. ލޯބިވިޔަސް ވާންވާނީ ހިތަށް ކުޅަދާނަ މިންވަރަކުންނެވެ.
މިއީ ހައްތަހާވެސް ފެންނަ މަންޒަރުތަކެވެ.
ނަމަވެސް ވިސްނާލުމުން ދޭހަވާ ކަމަކީ؛ މީހަކު ގޯސްވުން ނުވަތަ ރަނގަޅުވުމުގެ ފަހަތުގައިވެސް ކޮންމެވެސް ކަހަލަ ސަބަބުތަކެއް އޮންނާނެކަމެވެ. ދައްކާ ވާހަކައިގެ ކޮންމެވެސް މިންވަރެއްގެ ބުރަދަނެއް ހުންނާނެކަމެވެ. ހަގީގަތެއް އޮންނަންވާނެކަމެވެ.
އެއީ ސިޔާސީ ބޭފުޅުންކަމުގައިވިޔަސް، ނުވަތަ އެނޫން ބައެއް ކަމުގައިވިޔަސް، އެކަން އޮންނާނީ އެހެންނެވެ.
ފާއިތުވި އަހަރުތަކުގެ ނޫސްތަކުގެ ސުރުޚީތަކަށް އަޅުގަނޑު ބަލައިލީމެވެ. ހައިރާންވެ އަންތަރީސްވާ ވަރުވެއެވެ. ހިތަށް އަރައެވެ. މީ ހަމަ މިކަން އޮންނަންވީ ގޮތް ބާވައެވެ؟
އެ ދުވަހު ސުރުޚީތަކުގައި ހުރި ވާހަކަތަކާ ދިމާ އިދިކޮޅަށް ސިޔާސީ ފަރާތްތަކުން މިއަދު ވާހަކަތައް ދައްކަވަމުން އެ ގެންދަވަނީ މޫނުފުޅަށް ރުލެއްވެސް އަރުވާނުލައްވައެވެ.
މިހާ ހިސާބަށް ކަންކަން ދިއުމުން، މިއީ ސިޔާސީ ހަގީގަތޭ ބުނެ ހަމަ ނިންމާލަންވީތޯއެވެ؟ މިހާ ހިސާބުން ދެން އުފެދޭ ސުވާލަކީ، ސިޔާސީ ބޭފުޅުން އަސްލު ކުރައްވަނީ ކޮން ކަމެއްތޯއެވެ؟
ބައެއް މީހުން ބުނާގޮތުގައި އެބޭފުޅުންގެ މުޅި ހަޔާތް ހޭދަކުރައްވަނީ އާންމު ރައްޔިތުންގެ ބޯ ކެއުމުގައެވެ. ބޮލަށް "ޗިޕު" ޖެހުމުގައެވެ.
ވަރަށް ގިނަ މީހުން ބުނާތީ އިވެއެވެ. ދިވެހިންނަކީ ހޭލުންތެރި ބަޔެކެވެ. ތައުލީމީ ބައެކެވެ. ދިވެހިން ގުނބޯލެއް ނުހެއްދޭނެއެވެ. ދައްކާހާ ވާހަކައަކަށް ދިވެހިން ނުހެއްލޭނެއެވެ.
ދެރައީ މި ހަގީގަތް ސިޔާސީ ބޭފުޅުންނަށް އޮޅިވަޑައިގެންފައި އޮތުމުންނެވެ.
