ވައިގެ މަގުން 23 މިލިއަން މޭލު ދަތުރުކޮށްފައިވާ މީހެއް!!

ނިއުޖަރޒީއަށް ނިސްބަތްވާ ޓޮމް ސްޓޫކަރ 1990 ވަނަ އަހަރު ނިންމި ނިންމުމެއް ވެގެން ގޮސްފައިވަނީ އޭނާގެ ހަޔާތުގައިވެސް ނިންމުނު އެންމެ ރަނގަޅު އެއް ނިންމުމަށެވެ. އެހާ ކުރިން ކުރި ކަމެއްގެ ސަބަބުން އޭނާގެ ހަޔާތުގައި މިހާތަނަށްވެސް ވަރަށް ގިނަ ފައިދާތަކެއް ލިބިގެން ގޮސްފައިވެއެވެ. އަދި ދަނީ ލިބެމުންނެވެ.

އޭނާ ކުރީ އެވަރުގެ ކޮންކަމެއް ހެއްޔެވެ؟ ސްޓޮކް ގަތީ ހެއްޔެވެ؟ ނޫނެކެވެ. ނަމަވެސް އެއާ ގާތްކުރާ ކަމެކެވެ. އޭނާ ކުރިކަމަކީ ޔުނައިޓަޑް އެއަރލައިންސްގެ ލައިފްޓައިމް ފާހެއް ގަތުމެވެ. އެފާހުގެ އޭރުގެ އަގަކީ 290ހާސް ޔޫއެސް ޑޮލަރެވެ.

އެ ތާރީޚުން ފެށިގެން ފާއިތުމިވީ 33 އަހަރުތެރޭ ސްޓޫކަރ ވަނީ 100 ގައުމަކަށް ޒިޔާރަތްކޮށް 23 މިލިއަން މޭލު ދަތުރުކޮށްފައެވެ. ވޮޝިންގޓަން ޕޯސްޓާ ހަވާލާދީ ވިއޯން ޗެނެލުން ބުނެފައިވާގޮތުގައި، އޭނާއަކީ މުޅި ތާރީޚުގައިވެސް ވައިގެމަގުން އެންމެ ގިނަ މޭލު ކަޑައްތުކުރި އިންސާނާއެވެ.

އެޕޯލޯ އެގާރާގައި ހަނދަށް ދަތުރުކުރި އެސްޓްރޮނޯޓުންވެސް ކަނޑައްތުކުރީ 953ހާސް މޭލެވެ.

ޔުނައިޓަޑުން މިހާރު މިފަދަ ލައިފްޓައިމް ފާސް ނުވިއްކަން ނިންމާފައި ވުމާއެކު ސްޓޫކަރގެ ރިކޯޑް އެގޮތުގައި އޮތުން ވަރަށް ގާތެވެ.

ވޮޝިންގޓަންޕޯސްޓްގައި ބުނެފައިވާގޮތުގައި، 2019 ވަނަ އަހަރު އެކަނިވެސް ސްޓޫކަރ ވަނީ ހަނދަށް ކުރާ ހަ ދަތުރާ އެއްވަރުގެ ރާސްތާއެއް ކަނޑައްތުކޮށްފައެވެ. ކާރު ޑީލަރޝިޕް ކޮންސަލްޓަންޓެއްގެ ގޮތުގައި މަސައްކަތްކުރާ، އުމުރުން 69 އަހަރުގެ ސްޓޫކަރ 2019ގައި އެކަނި ވަނީ 373 ފްލައިޓުގައި ދަތުރުކޮށްފައެވެ. މިދަތުރު ތަކުގެ ތެރެއިން އޭނާ ވަނީ 1.4 މިލިއަން މޭލު ކަނޑައްތުކޮށްފައެވެ. އޭނާ ދަތުރުކުރި ފްލައިޓްތަކަށް ޓިކެޓް ގަތްނަމަ އޭނާ އަތުން 2.44 މިލިއަން ޑޮލަރު ޚަރަދުވީސް ކަމަށް ވެއެވެ.

އެއްފަހަރަކު އޭނާ 12 ދުވަސްވަންދެން އެނދެއްގައި ބުރަކަށިޖައްސާނުލައި ހޭދަވިކަމަށްވެއެވެ. ނިއުޔޯރކުން ސޭންފްރޭންސިސްކޯ، ބެންކޮކް އަދި ޑުބާއީގައި ޖައްސަމުން އުދުހުނުއިރު، ވައިގެތެރޭގައި ފިޔަވާ ދެން އޭނަ ހުރަސްކުރީ އެއަރޕޯޓް ލައުންޖްތަކެވެ.

އެފަދަ ލައިފްޓައިމް ފާހެއް އޮވެގެން ދަތުރުކުރުމުން ސްޓޫކަރއަށް ލިބުނު އެންމެ ބޮޑުފައިދާއަކީ "ފްލަޔަރ މައިލްސް" ނުވަތަ މަތިންދާބޯޓުގައި ދަތުރު ކުރުމުން ލިބޭ ޕޮއިންޓް އިތުރުވުމެވެ. މިގޮތުން 2009 ވަނަ އަހަރު އޭނާއަށް ވަނީ 5 މިލިއަން މޭލު ދަތުރުކުރުމުން ލިބޭ ޕޮއިންޓް ހާސިލްކުރެވިފައެވެ. އަދި 2019 ވަނަ އަހަރާ ހަމަޔަށް އައިއިރު އޭނާއަށް ވަނީ 10 މިލިއަން މޭލު ހަމަވެފައެވެ.

ޔުނައިޓަޑް އެއަރލައިންސްގެ "މައިލްސް" ހަމަވުމުން ލިބޭ އިނާޔަތްތަކުގެ ތެރޭގައި؛ ދުނިޔޭގެ އެކި ތަންތަނުގެ ހޮޓެލް ސުއީޓް ތަކުގައި ހުރުމާ، ކްރޫޒް ދަތުރުތަކާއި، ގޯމޭ ސުފުރާތަކުން ކާލުމުގެ ފުރުސަތު ހިމެނެއެވެ. އަދި "މައިލްސް" ހަމަވުމުން ލިބޭ ޕޮއިންޓް ފައިސާއަށް ބަދަލުކޮށްގެން އޭނާ އެތައް ކަމެއް ކޮށްފައިވެއެވެ. މިގޮތުން އާއިލާ މީހެއްގެ ގެ އަލުން އާބާތުރަ ފިލުވައިދިނުމާއި އަދި 50 ހާސް ޑޮލަރުގެ ވޯލްމާޓް ގިފްޓް ކާޑުވެސް އެއްދުވަސް މަތިން ގަތް ކަމަށް ވެއެވެ.

އޭނާ ބުނެފައިވާގޮތުގައި އެހާ އަވަސް އަވަހަށް ދަތުރުކުރުމަކުން އޭނާގެ ފުށުން ތިމާވެއްޓަށްވެސް ގެއްލުމެއް ލިބޭނެކަމަކަށް ނުދެކެއެވެ. އެހެނީ އޭނާ ބޯޓުގަ އިންނަމަވެސް ނުވަތަ ނެތްނަމަވެސް ބޯޓު ދަތުރު ކުރާނެތީއެވެ. އޭނާ ބުނީ އެއާ ޚިލާފަށް ޕްރައިވެޓް ޖެޓްތަކުގައި އުޅޭ މީހުން ކޮމަރޝަލްކޮށް ދަތުރުކުރާނަމަ ތިމާވެއްޓަށް ފައިދާކުރާނެ ކަމަށެވެ.