ޕީޕީއެމްއިން ވަކިވި ޤާލިބް އެމްޑީޕީއާ ގުޅިއްޖެ
ޤާލިބްއާއެކު ގިނަ ބަޔަކު ސޮއިކޮށްފައިވޭ
ޤާލިބް އެމްޑީޕީއަށް ސޮއިކުރައްވައި ރައީސުލްޖުމްހޫރިއްޔާއާ ފޯމު ހަވާލުކުރެއްވުން
ޕީޕީއެމްގެ ކުރީގެ ކެލާ ދާއިރާގެ މަޖިލިސް މެމްބަރު އަޙްމަދު ޤާލިބް މިއަދު އެމްޑީޕީއާއި ގުޅިވަޑައިގެންފިއެވެ.
ޤާލިބް ޕީޕީއެމްއިން ވަކިވީ މިމަހުގެ 10 ވަނަ ދުވަހުއެވެ.
އެމްޑީޕީން ހޯމަ ދުވަހުކުރި ޓްވީޓެއްގައި ވަނީ ޤާލިބް އެމްޑީޕީއާ ގުޅިވަޑައިގެންފައިވާކަން ހާމަކުރައްވާފައެވެ. އަދި ޤާލިބްއާއެކު ގިނަ އަދަދެއްގެ ބަޔަކު އެ ޕާޓީއަ ގުޅިވަޑައިގެންފައިވާކަމަށް އެމްޑީޕީން ވަނީ ބުނެފައެވެ.
ޤާލިބް އެމްޑީޕީއަށް ސޮއިކުރައްވާފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި، އެޕާޓީގެ ޗެއަރޕަރސަން ފައްޔާޒް އިސްމާއިލްގެ ހާޒިރުގައެވެ.
އެމްޑީޕީއަށް ސޮއިކުރައްވައި ކުރެއްވި ޓްވީޓެއްގައި ޤާލިބް ވިދާޅުވީ އޭނާއާއެކު އޭނާގެ އާއިލާއާއި ރަހުމަތްތެރިންތަކެއް އެމްޑީޕީއަށް ސޮއިކުރައްވާފައިވާކަމަށެވެ. މިއީ ރަނގަޅު ފެށުމެއް ކަމަށް ޤާލިބް ވިދާޅުވިއެވެ.
