ކ. މާލެ
|
14 ޖޫން 2023 | ބުދަ 19:01
ބޫޓާން އަދި ނޭޕާލް ބައްދަލުކުރި މެޗުގެ ތެރެއިން
ބޫޓާން އަދި ނޭޕާލް ބައްދަލުކުރި މެޗުގެ ތެރެއިން
ޔޫތު މިނިސްޓްރީ
ފައިވް ނޭޝަންސް ބާސްކެޓްބޯޅަ މުބާރާތް
ފައިވް ނޭޝަންސް ބާސްކެޓްބޯޅަ މުބާރާތް ފަށައިފި، ފުރަތަމަ މެޗުން ބޫޓާން މޮޅު
 
މި މުބާރާތުގެ ފުރަތަމަ ރައުންޑުން ކަޓާނީ ހަމައެކަނި ތާވަލުގެ ފުލުގައި އޮންނަ ޓީމް

ރާއްޖޭގައި ބާއްވާ ފައިވް ނޭޝަންސް ބާސްކެޓްބޯޅަ މުބާރާތް މިއަދު ފަށައިފިއެވެ.

މިއަދުން ފެށިގެން މި މަހުގެ 22 ވަނަ ދުވަހުގެ ނިޔަލަށް ކުރިޔަށް ގެންދާ މި މުބާރާތަކީ ހަމަ އެކަނި ފިރިހެން ބާސްކެޓްބޯޅަ ޓީމުތަކުން ބައިވެރިވާ މުބާރާތެކެވެ. އެގޮތުން މި މުބާރާތުގައި ވާދަކުރާނީ ދިވެހިރާއްޖޭގެ އިތުރުން ނޭޕާލް، ބޫޓާން، ޕާކިސްތާން އަދި ބަންގްލަދޭޝްއެވެ.

މުބާރާތުގެ ފުރަތަމަ މެޗުގައި މިއަދު ހަވީރު ބައްދަލުކުރީ ނޭޕާލް އަދި ބޫޓާން އެވެ. މި މެޗު 61-55 ގެ ނަތީޖާ އަކުން ކާމިޔާބުކުރީ ބޫޓާންއެވެ. މުޅި މެޗުގައިވެސް ދެ ޓީމުގެ ފަރާތުން ފެނުނީ ދާދި ހަމަހަމަ ކުޅުމެކެވެ. މެޗުގެ ފުރަތަމަ ކުއާޓަރު ނިމުނު އިރު ބޫޓާން ވަނީ 21-13 ގެ ސްކޯ އަކާއެކު އަށް ޕޮއިންޓުގެ ލީޑެއް ނަގާފައެވެ.

ދެވަނަ ކުއާޓަރު ފެށިގެން ނޭޕާލް ޓީމުން ކުޅުން ރަނގަޅު ކުރިނަމަވެސް، ބޫޓާން ޓީމުން ދިޔައީ އެ ޓީމުން ނަގާފައިވާ ލީޑު ހިފަހައްޓަމުންނެވެ. މި ކުއާޓަރު ނިމުނީ 36-29 ގެ ނަތީޖާއަކުން ބޫޓާން ކުރިހޯދައިގެނެވެ. ފުރަތަމަ ކުއާޓަރުގައި ބޫޓާން އިން ނެގި އަށް ޕޮއިންޓުގެ ލީޑު ނޭޕާލް އަށް ކުޑަ ކުރެވުނީ ހަތް ޕޮއިންޓަށެވެ.

ބޫޓާން ޓީމުން ހޯދާފައިވާ ހަތް ޕޮއިންޓުގެ ލީޑު ހަ ޕޮއިންޓަށް ކުޑަކޮށް، ނޭޕާލް އިން ތިން ވަނަ ކުއާޓަރުގައި ވަނީ އުއްމީދު އައުކޮށްފައެވެ. ކުއާޓަރަކަށްފަހު ކުއާޓަރެއްގައި ކުޅުން ރަނގަޅުކޮށް ނޭޕާލް ދިޔައީ ފަރަގު ކުޑަކުރަމުންނެވެ. ތިން ވަނަ ކުއާޓަރު ނިމުނީ 48-42 ގެ ނަތީޖާއަކުން ބޫޓާން ކުރިހޯދައިގެނެވެ.

Advertisement

މެޗުގެ ފަހު ކުއާޓަރު ފެށުނު ގޮތަށް ބޫޓާން އިން މަސައްކަތް ކުރީ އަވަސް އެޓޭކުތަކެއްކޮށް، ތިން ޕޮއިންޓު ހޯދުމަށެވެ. ނަމަވެސް ބޭރުން ކުރި ޝޫޓުތަކުގެ ބޭނުން ހިފޭ ގޮތެއް ނުވިއެވެ. ތިން ޕޮއިންޓުގެ ސްކޯ ނުކުރެވުނު ނަމަވެސް ބޫޓާން ޓީމުން ވަނީ ނޭޕާލްއަށް ސްކޯ ކުރުމުގެ ފުރުސަތު ނުދީ، 12 ޕޮއިންޓަށް ފަރަގު އިތުރުކޮށްފައެވެ. އޭގެ ފަހުން ނޭޕާލް އިން ޓައިމް އައުޓް ނަގާ، ކުޅުން ރަނގަޅުކޮށް ހަތް ޕޮއިންޓަށް ފަރަގު ކުޑަ ކުރިއެވެ. ނަމަވެސް ބޫޓާން އިން ވަނީ މެޗުގެ އެންމެ މުހިންމު ވަގުތުގައި ތިން ޕޮއިންޓު ސްކޯކޮށް، ލީޑު ފުޅާކޮށްފައެވެ. މެޗު ނިމެން ކައިރިވެފައި ވަނިކޮށް ނޭޕާލް އިންވެސް ވަނީ ތިން ޕޮއިންޓު ސްކޯ ކޮށްފައެވެ.

ފުރަތަމަ މެޗުން މޮޅުވެވުން ވާނީ ބޫޓާން އަށް ލިބުނު ބޮޑު ހިތްހަމަޖެހުމަކަށެވެ. މި މުބާރާތުގެ ފުރަތަމަ ރައުންޑުން ކަޓާނީ ހަމައެކަނި ތާވަލުގެ ފުލުގައި އޮންނަ ޓީމެވެ. ގަދަ ހަތަރު ޓީމު ސެމީގައި ވާދަ ކުރާނެއެވެ.

މި މުބާރާތުގައި ރާއްޖޭގެ މެޗުތައް ކުޅުމަށް ހަމަޖެހިފައިވަނީ ބުދަ އިން ފެށިގެން ހޮނިހިރު ދުވަހާ ހަމައަށް، ކޮންމެ ރެޔަކު 20:30 ގައެވެ. ރާއްޖެއިން މި މުބާރާތަށް ނިކުންނަނީ ރަނގަޅު ކާމިޔާބެއް ހޯދުމުގެ ގަދަ އަޒުމުގައެވެ.

Advertisement
އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ފާޠިމަތު ޒުހައިރާ
0%
0%
0%
0%
0%
0%
ކޮމެންޓް