ތަކުލީފާއި، ވޭނާއި، އަޅުވެތިކުރުމުގެ ތެރެއިން ޢުއްމީދާއި ނަޞްރު!

ދިރިއުޅުމުގެ މައިދާނުގައި ހިތްދަތި ކަމާއި ވޭނާ ކުރިމަތިލާން ޖެހުނެއް ކަމަކު، އެފަދަ ކޮންމެ ކަމަކުންވެސް އުފާވެރިކަމާއި އުޖާލާކަން ހޯދުމަކީ ގަދަ ހިތްވަރާއި ސާބިތުކަމުގެ ވެރި ހިތަކަށް ނޫނީ ކުރަން މާ ފަސޭހަ ކަމެއް ނޫނެވެ. ކިތަންމެ ބޮޑު ތަކުލީފެއް އުފުލަން ޖެހި، އިންތިހާ ބިރުވެރިކަމުގެ ތެރޭގައި ދުވާލާއި ރޭތައް ހޭދަ ކުރަން ޖެހުނެއް ކަމަކު، ޣައްޒާގެ ރަށްވެހިންގެ ކިބައިން ފެނިގެން ދަނީ މި ސާބިތުކަމޭ ދެންނެވުމަކުން ދޮގަކަށް ނުވާނެއެވެ.

މިދިޔަ މެއި މަހު، ޣައްޒާއާއި ޔަހޫދީ އިޒްރޭލާއި ދެމެދު ބަދަލު ކުރި ހަމަލާތަކުގައި ސުންނާފަތިވި އިމާރާތްތަކަށް އާ ދިރުމެއް ގެނެސްދީ، ވެއްޓަށް އުޖާލާކަން ގެނެސްދިނުމުގެ ޢަޒުމުގައި އަތުކުރި އޮޅާލި ބަޔަކީ، ޣައްޒާގެ ގްރެފިޓީ އަރޓިސްޓުންނެވެ. ނުވަތަ ފާރު ފަދަ ތަންތަނުގައި އާދަޔާ ޚިލާފު ކުރެހުންތައް އެޅުމުގެ ފަންނުވެރި ކުރެހުންތެރިންނެވެ.

ހަމަލާތަކުގައި ހަލާކު ކޮށްލާފައި ވާ ޢިމާރާތެއްގެ ފާރުގައި ކުރަހާފައި ވާ އެއް ކުރެހެމުން ފެނިގެން ދަނީ، އަންހެނަކު، އޭނާގެ ފިރިހެން ދަރިފުޅު ގޮވައިގެން ހުންނަ މަންޒަރެވެ. އަނެއް ފާރެއްގައި ކުރަހާފައި ވާ ކުރެހުމުން ފެނިގެން ދަނީ، ކަރުނަ ހިލިފައިވާ ފިރިހެން ކުއްޖެކެވެ. 3 ވަނަ ފާރަކުން ފެނިގެން ދަނީ ލޯގަނޑަކަށް ބަލަހައްޓައިގެން، ބޯއޮމާން ކުރަން އިން އަންހެން ކުއްޖެކެވެ.

ދީރު އަލް-ބަލާ އަވަށް އަދިވެސް ވަށާލާފައި ވާ ވަނީ ގާކުނޑިތަކުންނެވެ. މޭޒުތައް މަތިން ފެންނަން ހުރީ އިޒްރޭލުން އުކުލި މިސައިލްތަކުގެ ބައިތަކެވެ.

ކުރެހުމުގެ މަސައްކަތުގައި އުޅުނު ޙުސައިން އަބޫ ޞާދިޤުގެ ޢަޒުމަކީ ފިސާރި ވަރުގަދަ ޢަޒުމެއްކަން، އޭނާއާ ވާހަކަދައްކާލުމުން ސާބިތުވެއެވެ.

ހުރިހާ ކޮޅަކުން ފިއްތާލެވިފައިވާ ޣައްޒާގެ އާބާދީ، 2.3 މިލިއަނަށް އަރައެވެ. އިޒްރޭލުގެ އިތުރުން މިޞްރުންވެސް ފިއްތުންތައް ކުރިމަތި ކުރަމުން ދާ ޣައްޒާގެ ކޮންޓްރޯލް އޮންނަނީ ހަމާސް ޖަމާޢަތުގެ އަތް މަތީގައި ކަމަށް ވާ އިރު، ފަލަސްޠީނުގެ މައި ސަރުކާރުންވެސް އެ ޖަމާޢަތް ބަލައެއް ނުގަނެއެވެ. އިންތިހާ ފިއްތުންތައް ކުރިމަތި ކުރެއެވެ. އިޒްރޭލުން ދެކޭ ގޮތުގައި ހަމާސް ޖަމާޢަތަކީ ހަތިޔާރު އެޅި ހަނގުރާމަވެރި ޖަމާޢަތެކެވެ.

އިޒްރޭލުގެ ހަމަލާތައް ޣައްޒާއަށް އަމާޒު ކުރަނީ ހަނގުރާމަ ވެރިން ބަލި ކުރުމަށްޓަކާ، ހަނގުރާމަވެރިންނަށް އަމާޒު ކޮށް ކަމަށް ބުނި ނަމަވެސް، އެ ހަމަލާތަކުގައި މަރުވެދާ ޢާންމުންގެ ޢަދަދު މަދެއް ނޫނެވެ. އަންހެނުންނާއި ކުޑަ ކުދިންވެސް އޭގެ ތެރޭގައި ހިމެނެއެވެ. ހަމަލާ ދެނީ ހަނގުރާމަވެރިންގެ ކިއްލާތަކަށް ކަމަށް ބުނެ، އިޒްރޭލުން ދިފާޢަށް ކުޅުނު ކަމުގައި ވީ ނަމަވެސް، ޙަޤީޤަތުގައި ފެންނަ މަންޒަރު ތަފާތެވެ. ހަމަލާ ބަދަލު ކުރުންތަކުގައި މަރުވާ އަންހެނުންނާއި ކުޑަކުދިންގެ ޢަދަދު ވަކި މަދެއް ނޫނެވެ.

އެމެރިކާގެ ފުރިހަމަ ދިފާޢުގެ ނިވަލުގައި އޮވެ އިޒްރޭލުން ދެމުންދާ ހަމަލާތަކަށް، އެބައި މީހުން ޖަވާބު ދާރީ ކުރެވިފައެއް ނެތެވެ. އެމެރިކާގެ ވެރިކަމާ، ސިޔާސީ ފިކުރުގެ ކޮންމެ ކޮޅަކުން ބަލާލި ކަމުގައި ވީ ނަމަވެސް އެކަން އޮތީ އެހެންނެވެ.