އާދަޔާ ޚިލާފު ރެކޯޑްތައް ހެދުމަކީ ޒަމާނުއްސުރެ ގިނަ ބައެއްގެ މެދުގައި މަޤުބޫލު ވެފައި އޮންނަ ކަމެކެވެ. ސަކަރާތާއި މަޖަލުގެ ތެރެއިން ރެކޯޑްތައް ހަދާ މީހުން އުޅޭ އިރު، މުހިންމު ކަންކަމާ މެދު މުޖުތަމަޢުގެ ހޭލުންތެރިކަން އިތުރު ކުރުމުގެ މަޤްޞަދުގައި ރެކޯޑްތައް ހަދައިގެން ދުނިޔޭގެ ސަމާލުކަން ހޯދާ މީހުންވެސް މަދެއް ނޫނެވެ.
ފްލޮރިޑާގެ ޑައިވަރު އަދި ބަޔޮމެޑިކަލް އިންޖިނޭރު، ޑރ ޖޯސެފް ޑިޓޫރީ އަކީވެސް ދާދި ފަހުން މިފަދަ ރެކޯޑެއް ހެދި މީހެކެވެ. ޑރ ޑިޓޫރީގެ ރެކޯޑް ޚާއްޞަ ވަނީ ކަނޑު އަޑިއަށެވެ. ކަނޑު އަޑީގައި 100 ދުވަސް ވަންދެން ދިރިއުޅުމަށް ފަހު، ޑރ ޑިޓޫރީ އެއްގަމަށް އެރީ ޖޫން 9 ވަނަ ދުވަހުއެވެ.
މީ އެއްވެސް ހާލެއްގަ، ރެކޯޑެއް ހަދާކަށް ކުރި ކަމެއް ނޫން. މީ ކަނޑު އަޑީގަ އިންސާނަކަށް ކެތްވާނެ މިންވަރު ބަލަން ކުރި ދިރާސާއެއް. އެކަހެރި ތަނެއްގަ، ބެދިފަ އޮތް ތަނެއްގަ، އާދަޔާ ޚިލާފު ވެއްޓެއްގަ، އިންސާނަކަށް ކިހާ މުއްދަތެއްތޯ ހޭދަ ކޮށްލެވެނީ ބަލަން ކުރި ކަމެއްޑރ ޖޯސެފް ޑިޓޫރީ؛ މެޑިކަލް ރިސާޗަރ
ކަނޑު އަޑީގައި ދިރިއުޅުމުގެ އާ ރެކޯޑަށް ފަހު ޑރ ޑިޓޫރީ އެއްގަމަށް އަރައިގެން އައި އިރު، ސަޕޯރޓް ޓީމުން ވަނީ އޭނާއަށް މަރުޙަބާ ކިޔާ، ތަޢުރީފު ކިޔުމުގެ ގޮތުން ގޮނޑުދޮށަށް ޖަމާވެފައެވެ.
ޞިއްޚީ ދާއިރާއިން ދިރާސާތައް ކުރަމުންދާ ޑރ ޑިޓޫރީ، 100 ދުވަސް، ކަނޑު އަޑީގައި ހޭދަ ކުރީ ފްލޮރިޑާގެ ކީ ލާގޯގެ ޖޫލްސް އަންޑަރސީ ލޮޖްގައެވެ. "ޕްރޮޖެކްޓް ނެޕްޓިއުން 100" ގެ ދަށުން، ޑރ ޑިޓޫރީ މިޝަން ފެށީ މަރޗް 1 ވަނަ ދުވަހުއެވެ. މި މަޝްރޫޢަކީ، ޖޫލްސް އަންޑަރސީ ލޮޖްގެ ބެލެނިވެރި ފަރާތުގެ ގޮތުގައި އޮތް މެރިން ރިސޯސަސް ޑިވެލޮޕްމަންޓް ފައުންޑޭޝަނުން ހިންގާ މަޝްރޫޢެކެވެ.
މި އާދަޔާ ޚިލާފު މަޝްރޫޢުގެ މައިގަނޑު މަޤްޞަދަކީ، ޞިއްޚީ އަދި ކަނޑުގެ ދިރާސާތައް ގުޅާލާ، ޔުނިވަރސިޓީ އޮފް ސައުތު ފްލޮރިޑާގެ ދަރިވަރުންނަށް ޢިލްމީ މަޢުލޫމާތުތަކެއް ފޯރުކޮށްދިނުމެވެ.
މުޅި މިޝަންގެވެސް އެންމެ ބޮޑު ކާމިޔާބީއަކީ، ގާތްގަނޑަކަށް 5000 އެއްހާ ދަރިވަރުންނާ ކުރެވެމުން ދިޔަ މުޢަމަލާތު. އަހަރަމެންގެ ކަނޑުގެ ވެށި ހިމާޔަތްކޮށް، ދިރުންތައް އާލާކުރަން އެކުދިންގެ ހިތުގައި އޮތް ޖޯޝްޑރ ޖޯސެފް ޑިޓޫރީ؛ މެޑިކަލް ރިސާޗަރ
ކަނޑު އަޑީގައި ދިރިއުޅެމުން ދިޔަ ކޮންމެ ދުވަހަކީ ޑރ ޑިޓޫރީ، މުހިންމު ދިރާސާތަކެއް ކުރި ދުވަހެކެވެ. އެގޮތުން އިންތިހާ ޕްރެޝަރު ގަދަ، އެކަހެރި ވެއްޓެއްގައި ގިނަ ދުވަސްތަކެއް ހޭދަ ކުރަން ޖެހެމުން އޭނާގެ ހަށިގަނޑަށް އަންނަ ބަދަލުތައް ވަރަށް ގާތުން ބަލާ، ދިރާސާ ކުރަމުން ދިޔައެވެ. އެއީ ކަނޑުގެ ފުން ސަރަޙައްދުތަކުގައި ދިގު މުއްދަތުގެ މިޝަންތައް ހިންގަން ބޭނުންވާ ފަރާތްތަކަށް މުހިންމު މަޢުލޫމާތުތަކެކެވެ.
ކަނޑު އަޑިގައި ގިނަ ދުވަސްތަކެއް ވަންދެން ދިރިއުޅުމުގެ ރެކޯޑެއް އެންމެފަހުން ހަދާފައި ވަނީ 2014 ވަނަ އަހަރުއެވެ. އެއީ 73 ދުވަހުގެ ރެކޯޑެކެވެ.
