ދުނިޔެ ތެރޭގައި ކޮންމެ ފަދަ ހިނގާ ދިޔަ ކަމުގައި ވީ ނަމަވެސް، މެދު ކެނޑުމެއް ނެތި އިވެމުންދާ އެއް އަޑަކަށް ވެފައި އޮންނަނީ ދުނިޔެ ހޫނު ވަމުން ދާ ވާހަކައެވެ. ދުނިޔޭގެ އެކި ސަރަޙައްދުތަކަށް އާދަޔާ ޚިލާފަށް ހޫނު ގަދަ ވަމުން ދާ ވާހަކައެވެ. ދުނިޔޭގެ ހުޅަނގު ބިތަށް، ކުރިއަށް އޮތީ ހޫނު މޫސުމުގެ ދުވަސްވަރު ކަމަށް ވާ އިރު، އާދަޔާ ޚިލާފަށް ހޫނު ގަދަ ވާނެ ކަމަށް ވަނީ ލަފާ ކޮށްފައެވެ.

ކަން މިހެން އޮތް އިރު، އެރިޒޯނާ ސްޓޭޓް ޔުނިވަރސިޓީގެ ރިސަރޗަރުންގެ ޓީމަކުން ވަނީ، އާދަޔާ ޚިލާފު، އިންތިހާ، ގަދަ ހޫނުގެ ސަބަބުން އިންސާނުންގެ ހަށިގަނޑަށް ކުރާ އަސަރުތައް ދެނެގަތުމުގެ ދިރާސާތައް ފަށާފައެވެ. މި މަސައްކަތުގައި ދިރާސާ ޓީމަށް އެންމެ ބޮޑު އެހީތެރިކަމެއް، ޢަމަލީ ގޮތުން ފޯރުކޮށްދެމުން ދަނީ ބުދެކެވެ. އެންޑީގެ ނަން ދީފައިވާ މި ބުދަކީ، "ނޭވާ" ލުމުގެ އިތުރުން، ހިނގާބިނގާވެ، ދާވެސް ހިއްލާ ބުދެކެވެ. ނުވަތަ މެނިކިންއެކެވެ.

ދިރާސާގެ ބޭނުމަށްޓަކާ އެންޑީ ބަހައްޓާފައި ހުންނަ ޗޭމްބަރަކީ، އެތަނުގެ ފިނިހޫނު މިނާއި، ވައިގެ ތެތްކަން ނުވަތަ ހިއުމިޑިޓީ އެކުލެވޭ މިންވަރު ކޮންޓްރޯލް، ދިރާސާ ޓީމަށް ލިބޭ ގޮތަށް ފަރުމާ ކޮށްފައި ވާ ތަނެކެވެ. އެގޮތުން، ދުނިޔޭގެ ކޮންމެ ހިސާބެއްގެ މޫސުމީ ވެށި އޮންނަ ގޮތަށް، އެ ޗޭމްބަރުގެ ހާލަތު ބަދަލު ކުރެވޭނެ ޓެކްނޮލޮޖީ ވަނީ ޤާއިމުކޮށްފައެވެ.

އެންޑީގެ ހަށިގަނޑު ފަރުމާ ކޮށްފައި ވަނީ، އެ ސަރަޙައްދެއްގެ ފިނިހޫނު މިން ކޮންޓްރޯލް ކުރެވޭ ސެންސަރުތައް ހިމެނޭ 35 ތަނެއް ހިމެނޭ ގޮތަށެވެ. ހޫނު ގަދަވާން ފެށުމާއެކު ހިއްލަން ފަށާ ދޭތައް ބޭރު ކުރާނެ ލޯވަޅުތައްވެސް އެންޑީގެ ހަށިގަނޑުގައި ހުރެއެވެ. ދިރާސާ ޓީމުން ދަނީ، އެކި މޫސުންތަކުގައި އިންސާނާގެ ހަށިގަނޑަށް ކުރިމަތިލާން ޖެހޭ ހާލަތުތައް، އެންޑީ ބޭނުން ކޮށްގެން ތަޖުރިބާ ކުރަމުންނެވެ.

އެމެރިކާގެ ސެންޓަރޒް ފޮރ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން މައުލޫމާތު ދޭ ގޮތުގައި، ހޫނުގެ ސަބަބުން އެ ޤައުމުގައި އަހަރެއްގެ މައްޗަށް އެވަރޭޖުކޮށް، 702 މަރުގެ ކޭސް ރެކޯޑް ކުރެއެވެ. ހޫނު ގަދަވުމުގެ ސަބަބުން އެކި ކަހަލަ ޞިއްޙީ މައްސަލަތައް ކުރިމަތިވެގެން، އެމެރިކާގައި އަހަރެއްގެ މައްޗަށް، އެވަރޭޖު ގޮތެއްގައި 9235 މީހަކަށް، ހޮސްޕިޓަލުގައި އެޑްމިޓްކޮށްގެން ފަރުވާ ދޭކަމަށްވެސް ސީޑީސީއިން ބުނެއެވެ.

އާދަޔާ ޚިލާފަށް ހޫނު ގަދަވެގެން ހީޓް ސްޓްރޯކްއެއް ޖެހޭ ވަޤުތު، އިންސާނާގެ ހަށިގަނޑަށް ވާ ގޮތް އަދި މާ ބޮޑަކަށް ސާފެއް ނުވެއެވެ. އެންޑީގެ އެހީގައި، މިކަމަށް އަލި މަގެއް ފެނިދާނެ ކަމުގެ ޢުއްމީދު ވަނީ އާވެފައެވެ.

އެންޑީގެ އިޖާދީ ޚިޔާލަކީ މުޅިން އާ ޚިޔާލެއް ނޫނެވެ. ފިނި ހޫނުމިނާ ގުޅޭ އެކި ކަންކަމަށް ބޭނުން ކުރާ ޑަމީ ނުވަތަ މެނިކިންތައް، ދުނިޔޭގެ އެކި ކަންކޮޅުތަކުގައި ބޭނުން ކުރެއެވެ. ވަކިން ޚާއްސަކޮށް، އެކި މޫސުންތަކަށް ޚާއްސަކޮށްފައި ހުންނަ އަންނައުނު ފަރުމާކޮށް، އުފައްދާ ކުންފުނިތަކުން މިފަދަ ޑަމީތަކުގެ ބޭނުން ހިފައެވެ. މިފަދަ ބޭނުންތަކަށް، އެންޑީ ފަދަ 10 ޑަމީ، ދުނިޔޭގެ އެކި ކަންކޮޅުތަކުގައި ދަނީ ބޭނުން ކުރަމުންނެވެ. ނަމަވެސް އެރިޒޯނާ ސްޓޭޓް ޔުނިވަރސިޓީގެ އެންޑީ އަކީ، ބެދިފައި ވާ މާޙާއުލަކުން ބޭރުގައިވެސް ބޭނުން ކުރެވޭ ގޮތަށް ފަރުމާ ކޮށްފައި ވާ ފުރަތަމަ ޑަމީއެވެ.