ރައްޔިތުންގެ މަޖިލީހުގެ މެޖޯރިޓީ އާއި އެކު މަޖިލީހުގެ ރައީސްގެ އިތުބާރު ނެތް މައްސަލަ ހުށަހަޅާފައިވާ އިރު އެކަން އެޖެންޑާކޮށް ދުވަސް ކަނޑައަޅަންޖެހޭ ކަމަށް ގުޅިފައިވާ ސިޔާސީ ޕާޓީތަކުން ބުނެފި އެވެ.

މާފަންނު ކުނޫޒްގައި ބޭއްވި ނޫސްވެރިންގެ ބައްދަލަވުމުގައި ވާހަކަދައްކަވަމުން އެމްޑީޕީގެ ލީގަލް ސެކްރެޓަރީ، ހިސާން ހަސަން ވިދާޅުވީ، ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ ހުށަހަޅާފައިވާ އިރު އެ މައްސަލަ އެޖެންޑާ ކުރެވި ތާރީހެއް ކަނޑައެޅުން ލަސްވަމުންދިއުމަކީ ކަންބޮޑުވާ މައްސަލައެއް ކަމަށެވެ. މިފަދަ މައްސަލައެއް ހުށަހަޅާތާ 14 ދުވަހުގެ ތެރޭގައި އެޖެންޑާ ކުރަންޖެހޭ އިރު މިމަހުގެ 24 ވަނަ ދުވަހު އެ މައްސަލަ އެންމެ ލަސްވެގެން މަޖިލީހުގައި އެޖެންޑާ ކުރަންޖެހޭ ކަމަށް އޭނާ ވިދާޅުވި އެވެ.

 ހިސާން ވިދާޅުވީ، މިފަދަ މައްސަލަތަކުގައި ރައްޔިތުންގެ މަޖިލީހުގެ އަމީންއާންމު އަވަސްކޮށް ދުވަސް ކަނޑައަޅަންޖެހޭ ކަމަށާއި ހާއްސަކޮށް މަޖިލީހުގެ ގިނަ މެންބަރުންތަކެއް ހުށަހަޅާފައިވާ މައްސަލައެއްގައި އެކަން ފެންނަންޖެހޭ ކަމަށެވެ.

ހިސާން ވަނީ މިމަހުގެ 24 ވަނަ ދުވަހަކީ ބަންދު ދުވަހަކަށް ހެދުމަށް މަސައްކަތް ކުރާ ކަމުގެ އަޑުތައް ފެތުރިފައިވާ ކަމަށާއި އެފަދަ ގޮތަކަށް ސަރުކާރުން ކަނޑައެޅިނަމަވެސް މަޖިލީހުގެ އިތުބާރު ނެތް ކަމުގެ މައްސަލަ އެދުވަހު ބާއްވަންޖެހޭ ކަމަށް ގަބޫލުކުރާ ކަމަށް ބަޔާންކޮށްފަ އެވެ.

" ރައްޔިތުންގެ މަސްލަހަތާ ގުޅިފައޮތް އަދި ރައްޔިތުންގެ މުޅި މަޖިލީހުގެ ޖުމްލަ އަޣުލަބިއްޔަތަށްވުރެ ގިނަ މެންބަރުންތަކެއް ސޮއިކުރައްވާ، ހުށަހަލާފައިވާ މައްސަލައެއް ތާވަލްކޮށް އެޖެންޑާ ކުރަންއޮންނަ ތާރީހު ކުއްލިއަކަށް ސަރުކާރު ބަންދުކޮށްލާފަ ޖުލައި 26 ބޮޑު ޗުއްޓީއާ އެއްކޮށް ޗުއްޓީއަކަށް ގައުމު ދާން ސަރުކާރުން ނިންމާއިފި ނަމަ މިއީ ވަރަށް ޒިންމާދާރުކަން ކުޑަ ނިންމުމަކަށް ވެގެންދާނެ." ހިސާން ވިދާޅުވި އެވެ

ކެންދޫ ދާއިރާގެ މެންބަރު އަލީ ހުސައިން ވިދާޅުވީ، ރިޝްވަތުގެ ތެރެއިން މަޖިލީސް މެންބަރުންގެ ސޮއި ހޯދި ކަމަށް ޕީޕީއެމް ޕީޖީ މެންބަރުން ހާމަކުރައްވާފައިވާ އިރު އެ ރިޝަވަތުގެ ވާހަކަ އެންމެ ފުރަތަމައިނުން އެފަރާތުން ނުދައްކާ ކަމަށާއި އެވާހަކަދައްކަން ފެށުނީ މަޖިލީހުގެ މެޖޯރިޓީ ގެއްލުނު ހިސާބުން ކަމަށެވެ. އަލީ ހުސައިން ވިދާޅުވީ ރިޝްވަތުގެ މައްސަލަތަކުގެ ވާހަކަ ޕީޕީއެމްގެ ޕީޖީ މެންބަރުން ދައްކަމުންދަނީ ސިޔާސީ މަގްސަދުތަކެއް ހާސިލްކުރުމަށް ކަމަށެވެ.

އަލީ ހުސައިން ވިދާޅުވީ، ކުއްލިޔަކަށް ރިޝްވަތުގެ ވާހަަކަދައްކަނީ މި ސަރުކާރުން ކަންކަން ކުރަމުން ގޮސްފައިވަނީ އުސޫލުން ކަމަށްވާތީ ކަމަށެވެ.

" ދައުލަތުގެ ހުރިހާ ބާރުތަކެއް އެއޮތީ މި ސަރުކާރުގެ އަތް ދަށުގައި. އަޅުގަނޑު މި ދެންނެވީ ޕޮލިސް އަދި އެންޓި ކޮރަޕްޝަން ކޮމިޝަންގެ އިތުރުން އިންޓެލިޖެންސްވެސް އެއޮތީ. ސިޔާސީ މީހުންނަށް މިހުރިހާ ދައުވާތަކެއްކުރާ އިރު ހަގީގަތުގައިވެސް ނުފެނޭ އެކަށީގެންވާ ހެއްކާ ގަރީނާއި އެކު އެއްވެސް މީހެއްގެ ދައުވާއެއްވެސް ކޮށްލެވިފައެއް ނުވޭ." އަލީ ހުސައިން ވިދާޅުވި އެވެ.