ބެންޒެމާ އަލް އިއްތިހާދަށް ބަދަލުވުމުގެ ފަހު މަރުހަލާގައި
ރިޕޯޓުތަކުން ދައްކާ ގޮތުން އަލް އިއްތިހާދާއެކު 2025 ވަނަ އަހަރުގެ ނިޔަލަށް އެއްބަސްވުމުގައި ސޮއިކުރުމަށް ވަނީ ހަމަޖެހިފަ
ކަރީމް ބެންޒެމާ
ރެއާލް މެޑްރިޑް ދޫކޮށްލުމަށް ނިންމާފައިވާ އެ ޓީމުގެ ކެޕްޓަން ކަރީމް ބެންޒެމާ މިހާރު އުޅެނީ ސައުދީ ޕްރޯ ލީގުގެ އަލް އިއްތިހާދާ ގުޅުމުގެ އެންމެ ފަހުގެ މަރުހަލާގައި ކަމަށް މީޑިއާ ރިޕޯޓުތަކުން ބުނެފިއެވެ.
ބޭރުގެ ރިޕޯޓުތަކުން ދައްކާ ގޮތުން ސައުދީ ޕްރޯ ލީގުގެ ޗެމްޕިއަން، އަލް އިއްތިހާދާއެކު 2025 ވަނަ އަހަރުގެ ނިޔަލަށް އެއްބަސްވުމުގައި ސޮއިކުރުމަށް ވަނީ ހަމަޖެހިފައެވެ. ފީފާ އިން ހޮވާ އެންމެ މޮޅު ކުޅުންތެރިޔާގެ އެވޯޑު ހޯދާފައިވާ ބެންޒެމާއަށް ހުށަހެޅި އަގަކީ 200 މިލިއަން ޔޫރޯއެވެ.
ބެންޒެމާ އާއެކު ގިނަ ދުވަސްތަކެއް އެއްކޮށް ކުޅުނު ރޮނާލްޑޯވެސް ވަނީ ސައުދީ ލީގަށް ތައުރީފުކޮށް، އެ ލީގަށް ވީހާވެސް ގިނަ ކުޅުންތެރިން ގުޅުމަށް ބާރު އަޅާފައެވެ.
އާދިއްތަ ދުވަހުގެ ރޭގައި، ރެއާލް މެޑްރިޑް ޖާޒީގައި ބެންޒެމާ ކުޅުނު ފަހު މެޗުގައިވެސް އޭނާ ވަނީ ލަނޑެއް ޖަހާފައެވެ. ރިޕޯޓުތަކުން ބުނާ ގޮތުން ބެންޒެމާ ނޫސްވެރިންނާ ބައްދަލުކުރުމަށް ހަމަޖެހިފައިވަނީ އަންގާރަ ދުވަހުއެވެ.
ބެންޒެމާ ރެއާލް މެޑްރިޑް ދޫކޮށްލަން ނިންމުމުން ސަޕޯޓަރުންގެ އިތުރުން އެ ޓީމުގެ ގިނަ ކުޅުންތެރިންވެސް ވަނީ ސޯޝަލް މީޑިއާގައި ހިތްދަތި ޝުއޫރުތައް ފާޅުކޮށްފައެވެ. އޭގެތެރޭގައި އެޑުއާޑޯ ކަމަވިންގާ، ޑޭވިޑް އަލާބާ، އެޑާ މިލިޓާއޯ، ޑެނީ ކަރްވަހާލް، ލޫކަސް ވަޒްކެޒްގެ އިތުރުން ވިނީޝިއަސް ޖޫނިއާ ފަދަ ކުޅުންތެރިން ހިމެނެއެވެ.
ބެންޒެމާ އާއެކު އެ ޓީމުގެ ހަޒާޑް، މަރިއާނޯ ޑިއާޒް އަދި އަސެންސިއޯވެސް ވަނީ ޓީމު ދޫކޮށްލަން ނިންމާފައެވެ. ރެއާލްގެ އެންމެ ފަހުން ކުޅުނު މެޗަށްފަހު އެ ޓީމުގެ ކުޅުންތެރިން ވަނީ ޓީމު ދޫކޮށްލާ ހަތަރު ކުޅުންތެރިންނަށް އޮތް ލޯބި ދައްކާލާފައެވެ.
