ބަންޑާރަ ނާއިބުގެ އިތުބާރު ނެތްކަމުގެ މައްސަލަ ހުށަނޭޅި 1 ގަޑިއިރު!
ހޯމަ ދުވަހަށް ބަންޑާރަ ނައިބުގެ އިތުބާރު ނެތްކަމުގެ މައްސަލަ ތާވަލްކޮށްފައިވޭ
ބަންޑާރަ ނާއިބު އަލްއުސްތާޛް އިބްރާހީމް ރިފްއަތު
ބަންޑާރަ ނާއިބު އަލްއުސްތާޛް އިބްރާހީމް ރިފްޢަތުގެ އިތުބާރު ނެތްކަމުގެ މައްސަލަ ހުށަނާޅާ، އެ މައްސަލަ ހުށަޅުއްވަން ލިބިވަޑައިގަތް ފުރުސަތުގައި އެހެން ވާހަކަތައް ދައްކަވާތީ މަޖިލީހުގެ މެންބަރުން ކަންބޮޑުވުން ފާޅުކުރައްވައިފިއެވެ.
ރައްޔިތުންގެ މަޖިލީހުގެ ޖަލްސާ ފެށިގެން ގަޑިއެއްހާއިރު ހޭދަވިއިރު ވެސް މައްސަލަ ހުށަހެޅިފައެއް ނުވެއެވެ. ހޯމަ ދުވަހު ބަންޑާރަ ނާއިބުގެ އިތުބާރު ނެތްކަމުގެ މައްސަލަ ތާވަލްކުރި ނަމަވެސް އެ މައްސަލަ ހުށަނޭޅި ދެ ފަހަރެއްގެ މަތިން މަޖިލީސް މެދުކަނޑާލިއެވެ. އެންމެ ފުރަތަމަ ރިފްޢަތުގެ އިތުބާރު ނެތްކަމުގެ މައްސަލަ އެޖެންޑާ ކުރީ ނިމިދިޔަ ހަފްތާ އަށެވެ. ނަމަވެސް އެ މައްސަލަ ކުރިއަށް ގެންދެވިފައެއް ނުވެއެވެ.
ހޯމަ ދުވަހު ރައްޔިތުންގެ މަޖިލީހުގެ ޖަލްސާ ފެށުމުން ނައިފަރު ދާއިރާގެ މެންބަރު އަހުމަދު ޝިޔާމުގެ އިތުރުން އިދިކޮޅު ބައެއް މެންބަރުން އަޑުގަދަކުރައްވާތީ ރިޔާސަތުން ނިންމެވީ ސިޔާސީ ޕާޓީތަކާއި މަޝްވަރާކުރެއްވުމަށް މަޖިލީސް މެދުކަނޑާލެއްވުމަށެވެ. އޭގެ ފަހުން ދެވަނަ ފަހަރު މަޖިލިސް މެދުކަނޑާލީ ސިޔާސީ ޕާޓީތަކާއެކު މަޝްވަރާ ކުރެއްވުމަށް ކަމަށް ވިދާޅުވުމަށް ފަހުގައެވެ.
ތިން ވަނަ ފަހަރު މަޖިލީސް ފަށައިގެން މައްސަލަ ހުށަހަޅަން މަޑުއްވަރީ ދާއިރާގެ މެންބަރު އާދަމް ޝަރީފަށް ފުރުސަތު ދިނުމުން ވިދާޅުވީ ބަންޑާރަ ނައިބު މަޖިލީހުގެ ގަވާއިދާއި ޚިލާފުވެވަޑައިގަންނަވާފައިވާ ކަމަށެވެ. އަދި އެ މައްސަލަ ހުށަހެޅުމުގެ ބަދަލުގައި ބަންޑާރަ ނާއިބު ފުރަތަމަ މަޖިލީހަށް ހާޒިރުވެވަޑައިނުގަތް ސަބަބާއި މެދު ވާހަކަދެއްކެވިއެވެ. އޭނާ ވިދާޅުވީ ރިފްޢަތު ކުރިން މަޖިލީހަށް ހާޒިރުވެވަޑައިނުގެންނެވި ސަބަބު ސާފުވާން ޖެހޭ ކަމަށެވެ. އަދި ރައީސުލްޖުމްހޫރިއްޔާ އާއި ސަރުކާރަށް ވަރަށް ބޮޑަށް ފާޑު ވިދާޅުވިއެވެ.
މި ވާހަކަތަކަކީ ރިފްޢަތުގެ އިތުބާރު ނެތްކަމުގެ މައްސަލައިގައި ހިމެނޭ ކަންކަމެއް ނޫނެވެ. އެހެންކަމުން އެކަމާއި މެދު މެންބަރުން ކަންބޮޑުވުން ފާޅުކުރެއްވިއެވެ.
މިކަމާއި ގުޅިގެން އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވަނީ މެންބަރުންނަށް ނޯޓިސް ފޮނުވި މައްސަލަ ނޫން އެހެން މައްސަލަ އެއް ހުށަހަޅުއްވާތީ ނިޒާމީ ނުކުތާ އެއް ނަންގަވާފައެވެ. ނަމަވެސް މަޖިލީހުގެ ރައީސް ނަޝީދު އެއީ ނިޒާމީ މައްސަލައެއްގެ ގޮތުގައި ބަލައިގަންނަވާފައެއް ނުވެއެވެ. މަޖިލީހުގެ އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފް ވެސް ވަނީ މަޖިލީހުގެ ޤަވާއިދާއި ޚިލާފަށް ބޭނުންހާ ވާހަކައެއް ދައްކާ ކަަމަށް ފާހަގަކުރައްވާ ނިޒާމީ ނުކުތާ އެއް ނަންގަވާފައެވެ. ނަމަވެސް އެއީ ވެސް ނިޒާމީ ނުކުތާއެއްގެ ގޮތުގައި ރިޔާސަތުން ބަލައިގަންނަވާފައެއް ނުވެއެވެ.
ނައިފަރު ދާއިރާގެ މެންބަރު އަހުމަދު ޝިޔާމް ވަނީ މައްސަލަ އެޖެންޑާ ކުރުމުން ފުރަތަމަ ރިފްޢަތު މަޖިލީހަށް ވަޑައިނުގެންފައި ފަހުން މަޖިލީހަށް ވަޑައިގެން މައްސަލަ ކުރިއަށް ގެންދިއުމަށް މަޖިލީހުން ޖާގަ ނުދޭނެ ކަމަށް ވިދާޅުވެފައެވެ.
މީގެ އިތުރުން ކުޑަހުވަދޫ ދާއިރާގެ މެންބަރު އަހުމަދު އާމިރު ވަނީ ސިޔާސީ ޕާޓީތަކާއި މަޝްވަރާކޮށްގެން ވެސް މައްސަލަ ކުރިއަށް ގެންދެވޭނެ ގޮތެއް ހޯއްދަވައިދެއްވުމަށް އެދިވަޑައިގެންފައެވެ. މަޖިލީހުގައި ނިޒާމް ގެއްލިފައިވާ ކަމަށް އެހެން މެންބަރުން ވެސް ވަނީ ފާހަގަކުރައްވާފައެވެ. ނަމަވެސް އެއިން އެއްވެސް ނިޒާމީ ނުކުތާ އެއް ބަލައިގަނެފައެއް ނުވެއެވެ.
މި މައްސަލަ މިދިޔަ ބުދަ ދުވަހު މަޖިލީހަށް ހުށަހެޅިއެވެ. ނަމަވެސް އެ މައްސަލަ ހޯމަ ދުވަހު އަލުން ހުށަހަޅަން ފުރުސަތުދެއްވަނީ ބަންޑާރަނައިބަށް މައްސަލަ އަޑު ނީވި މައްސަލަ ކުރިއަށް ނުގެންދެވޭނެތީ ކަމަށް މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފައެވެ.
ބަންޑާރަ ނައިބުގެ އިތުބާރު ނެތްކަމަށް ފާސްކުރުމަށް އިދިކޮޅު ފަރާތްތަކުން ރައްޔިތުންގެ މަޖިލީހަށް ހުށަހަޅާފައިވާ މަައްސަލަ ފެއިލްކޮށްލަން އެމްޑީޕީގެ ޕީޖީ ގްރޫޕުން ވަނީ ފާސްކޮށްފައެވެ. ރިފްއަތުގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހަޅާފައިވަނީ މިދިޔަ މެއި މަހުގެ ތެރޭގައި، 13 މެންބަރުންގެ ސޮޔާއެކުގައެވެ. ރިފްއަތުގެ އިތުބާރު ނެތްކަމުގެ މައްސަލާގައި މަޖިލީހަށް ހާޒިރުވެވަޑައިގެން ޖަވާބުދާރީވެވަޑައިގަތުމުގެ ފުރުސަތަކަށް އެމަނިކުފާނު ވަނީ ބުރާސްފަތި ދުވަހު އެދިވަޑައިގަންނަވާފައެވެ.
އެގޮތުން ލިޔުމުން ޖަވާބުދާރީވެވަޑައިގަތުމުގެ ފުރުސަތު 31 މެއިގެ ޖަލްސާގައި ދެއްވާފައިނުވާތީ، ގާނޫނު އަސާސީގައިވާ ގޮތުގެ މަތީން، އަނގަބަހުން ދިފާއުގައި މަސައްކަތްކުރެއްވުމުގެ ހައްގު އިޚުތިޔާރުކުރައްވަން އެދިވަޑައިގަންނަވާކަމަށް ރިފްއަތު ނަޝީދަށް ފޮނުއްވި ސިޓީފުޅެއްގައި ވަނީ ވިދާޅުވެފައެވެ. ހޯމަ ދުވަހު މައްސަލަ އަލުން އެޖެންޑާކުރީ އެގޮތުގެ މަތީންނެވެ.
